ໃນຕອນບ່າຍວັນທີ 30 ທັນວາ 2024 ນີ້, ຮາກຖານຊາວໜຸ່ມສະພາປະຊາຊົນແຂວງໆສະຫວັນນະເຂດ ໄດ້ຈັດກອງປະຊຸມໃຫຍ່ ຄັ້ງທີ III ຂອງຕົນຂື້ນຢ່າງເປັນທາງການ ທີ່ຫ້ອງປະຊຸມຊັ້ນ 2 ຂອງສະພາປະຊາຊົນແຂວງ, ໃຫ້ກຽດຮ່ວມເປັນປະທານໂດຍ ສະຫາຍ ນາງ ບັງອອນ ພິມມະສານ ກຳມະການສູນກາງຊາວໜຸ່ມ ປະຊາຊົນປະຕິວັດລາວ, ເລຂາຄະນະບໍລິຫານງານຊາວໜຸ່ມແຂວງ, ສະຫາຍ ນາງ ພູທອນ ແກ້ວພູວົງ ຄະນະພັກຮາກຖານສະພາປະຊາຊົນແຂວງ ຮອງປະທານສະພາປະຊາຊົນແຂວງ ທັງເປັນຜູ້ຊີ້ນຳອົງການຈັດຕັ້ງມະຫາຊົນ ມີຄະນະເລຂາຊາວໜຸ່ມອ້ອມຂ້າງ ແລະ ແຂກຖືກເຊີນຈຳນວນໜຶ່ງເຂົ້າຮ່ວມ.

 

ໃນກອງປະຊຸມ ສະຫາຍ ມີໄຊ ໄຊຍະວົງ ເລຂາຮາກຖານຊາວໜຸ່ມສະພາປະຊາຊົນແຂວງ ກໍ່ໄດ້ຂື້ນຜ່ານບົດລາຍງານການເມືອງພາກ I , ພາກ II ແລະ ພາກ III ແລະ ທິດທາງແຜນການເຄື່ອນໄຫວໃນ 5 ປີຕໍ່ໜ້າ ແຕ່ປີ 2024-2028, ຈາກນັ້ນ ສະຫາຍ ນາງ ບັງອອນ ພິມມະສານ ເລຂາຄະນະບໍລິຫານງານຊາວໜຸ່ມແຂວງ ກໍໄດ້ມອບໃບຍ້ອງຍໍໃຫ້ຮາກຖານຊາວໜຸ່ມສະພາປະຊົນແຂວງ; 4 ໜ່ວຍຊາວໜຸ່ມທີ່ຂຶ້້ນຮາກຖານຊາວໜຸ່ມສະພາປະຊົນແຂວງ ແລະ ໃຫ້ແກ່ຊາວໜຸ່ມຜູ້ມີຜົນງານຕະຫຼອດໄລຍະ 5 ປີຜ່ານມາ.ຈາກນນ, ຜູ້ແທນສົມບູນຍັງໄດ້ໃຊ້ສິດປະຊາທິປະໄຕປ່ອນບັດຄັດເລືອກເອົາຄະນະຮາກຖານຊາວໜຸ່ມສະພາປະຊາຊົນແຂວງຊຸດໃໝ່ ຊຶ່ງມີຜູ້ແທນສົມບູນທັງໝົດ 32 ສະຫາຍ, ຍິງ 18 ສະຫາຍ. ໂດຍມີຜູ້ເຂົ້າຮ່ວມສະໝັກທັງໝົດ 7 ສະຫາຍ, ຍິງ 2 ສະຫາຍ, ໃນນັ້ນ ເລືອກເອົາ 5 ສະຫາຍ. ເຊີ່ງຜົນກອງປະຊຸມຄັ້ງປະຖົມມະລຶກໄດ້ຕົກລົງເຫັນດີເປັນເອກະສັນເລືອກເອົາ:ສະຫາຍມີໄຊ ໄຊຍະວົງ ເປັນເລຂາ; ສະຫາຍ ສອນ ສຸລິຈັນ ເປັນຮອງເລຂາ ທັງເປັນປະທານກວດກາ; ສະຫາຍ ນ ຂັນທິຈອນ ໄຊສະອາດ ເປັນຮອງເລຂາ; ສະຫາຍ ທະນູສິດ ສິງມາວົງ ເປັນກຳມະການ ແລະ ສະຫາຍ ພິດສະໄໝ ຄຳລຽງຈັນທິລາດ ເປັນກຳມະການ.

ໃນຕອນທ້າຍຂອງກອງປະຊຸມ ສະຫາຍ ນາງ ບັງອອນ ພິມມະສານ ເລຂາຄະນະບໍລິຫານງານຊາວໜຸ່ມແຂວງ ກໍ່ໄດ້ໃຫ້ທິດຊີ້ນຳແກ່ຄະນະຊາວໜຸ່ມຊຸດໃໝ່ ກໍ່ຄືສະມາຊິກຊາວໜຸ່ມຮາກຖານສະພາປະຊາຊົນແຂວງ ຈົ່ງໄດ້ເອົາໃຈໃສ່ຕິດຕາມຊຸກຍູ້ແຜນພັດທະນາເສດຖະກິດ-ສັງຄົມຂອງແຂວງ ແຕ່ລະໄລຍະ, ເພີ່ມທະວີສຶກສາອົບຮົມການເມືອງ-ແນວຄິດໃຫ້ຖັນແຖວສະມາຊິກຊາວໜຸ່ມໃນຂັ້ນຂອງຕົນໃຫ້ມີຄວາມໜັກແໜ້ນ-ເຂັ້ມແຂງ ນຳພາຂັບເຄື່ອນວຽກງານຂະບວນການຂອງຊາວໜຸ່ມໃຫ້ພົ້ນເດັ່ນສູງຂື້ນ.