(ສພຊ) – ກອງປະຊຸມໃຫຍ່ສະມາຊິກຊາວໜຸ່ມໜ່ວຍຊາວໜຸ່ມຮາກຖານກຳມາທິການວັດທະນະທຳ-ສັງຄົມ (ກວທສ) ໄດ້ໄຂຂຶ້ນໃນຕອນບ່າຍຂອງວັນພຸດທີ 05 ມິຖຸນາ 2024 ພາຍໃຕ້ການເປັນປະທານຮ່ວມຂອງສະຫາຍ ນາງ ທຸມມາລີ ວົງພະຈັນ ຄະນະບໍລິຫານງານພັກສະພາແຫ່ງຊາດ, ເລຂາໜ່ວຍພັກຮາກຖານກໍາມາທິການວັດທະນະທໍາ-ສັງ ຄົມ, ສະຫາຍ ເປຄໍາ ລໍຄໍາສອນ ຮອງເລຂາ ທັງເປັນປະທານກວດກາຄະນະບໍລິຫານງານຊາວໜຸ່ມສະພາແຫ່ງຊາດ ແລະ ສະຫາຍ ນາງ ສຸວັນໄຊ ເກິ່ງດາລາ ເລຂາໜ່ວຍຊາວໜຸ່ມຮາກຖານ ກວທສ; ມີຜູ້ແທນສົມບູນ ແລະ ແຂກຖືກເຊີນ ເຂົ້າຮ່ວມຫຼາຍກວ່າ 20 ສະຫາຍ.
ກອງປະຊຸມໄດ້ເປັນເອກະສັນຮັບຮອງເອົາລາຍງານການເມືອງ ແລະ ສະແດງຄວາມເຫັນດີເຫັນພ້ອມຕໍ່ບົດສະ ຫຼຸບຕີລາຄາຜົນງານຂອງໜ່ວຍຊາວໜຸ່ມຮາກຖານກໍາມາທິການວັດທະນະທໍາ-ສັງຄົມ ທີ່ຍາດມາໄດ້ໃນໄລຍະຜ່ານມາ ເຊິ່ງແມ່ນຜົນງານໃນການນໍາພາ-ຊີ້ນໍາຂອງຄະນະໜ່ວຍຊາວໜຸ່ມຮາກຖານ ຕໍ່ຂົງເຂດວຽກງານຕ່າງໆຕາມຄວາມຮັບຜິດ ຊອບ; ພ້ອມກັນນີ້, ກໍເປັນເອກະພາບຕາມທິດທາງລວມ, ຄາດໝາຍສູ້ຊົນ ແລະ ທິດທາງວຽກງານລະອຽດແຕ່ລະດ້ານ ໃນ 5 ປີຕໍ່ໜ້າ. ຮັບຟັງການລາຍງານ ແລະ ຮັບຮອງເອົາບົດສໍາຫຼວດການນໍາພາຂອງຄະນະໜ່ວຍຊາວໜຸ່ມຮາກຖານກວທສ ໃນໄລຍະຜ່ານມາ ເຊິ່ງໄດ້ຕີລາຄາດ້ານດີ, ດ້ານອ່ອນ ຂໍ້ຄົງຄ້າງ ແລະ ບົດຮຽນຖອດຖອນໄດ້ຈໍານວນໜຶ່ງ ທີ່ຄະ ນະໜ່ວຍຊາວໜຸ່ມຮາກຖານຊຸດໃໝ່ ຈະໄດ້ປັບປຸງແກ້ໄຂຂໍ້ບົກຜ່ອງ ແລະ ເສີມຂະຫຍາຍດ້ານຕັ້ງໜ້າຢ່າງແຂງແຮງ.
ຜູ້ແທນສົມບູນ ໄດ້ໃຊ້ສິດປະຊາທິປະໄຕປ່ອນບັດເລືອກເອົາຄະນະໜ່ວຍຊາວໜຸ່ມຮາກຖານກໍາມາທິການວັດທະນະທໍາ-ສັງຄົມ ຊຸດໃໝ່ ບົນພື້ນຖານຕາມຫຼັກການລວມສູນປະຊາທິປະໄຕ, ຖືກຕ້ອງຕາມມາດຕະຖານເງື່ອນໄຂທີ່ໄດ້ກໍານົດໄວ້ ເຊິ່ງມີຜູ້ສະໝັກທັງໝົດ 7 ສະຫາຍ ຍິງ 2 ສະຫາຍ, ເລືອກເອົາ 5 ສະຫາຍ; ກອງປະຊຸມຄັ້ງປະຖົມມະລືກຂອງຄະນະໜ່ວຍຊາວໜຸ່ມຮາກຖານຊຸດໃໝ່ ໄດ້ເປັນເອກະພາບເລືອກເອົາສະຫາຍ ນິມິດໄຊ ເທບພະວັນ ເປັນເລ ຂາ, ສະຫາຍ ປິ່ນແກ້ວ ຄູນສະຫວັດ ເປັນຮອງເລຂາ ແລະ ປະທານກວດກາ, ສະຫາຍ ອຳພອນ ສອນມີໄຊ ເປັນຮອງເລຂາ, ສະຫາຍ ນາງ ປານທອງ ອຸ່ນເຄືອ ແລະ ສະຫາຍ ນິກອນ ວອນມະນີຈັນ ເປັນກໍາມະການ.
ໃນໂອກາດນີ້, ສະຫາຍ ນາງ ທຸມມາລີ ວົງພະຈັນ ໄດ້ມີຄຳເຫັນໂອ້ລົມຕໍ່ທີ່ປະຊຸມ ເຊິ່ງໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ຜົນງານທີ່ໜ່ວຍຊາວໜຸ່ມຮາກຖານກໍາມາທິການວັດທະນະທໍາ-ສັງຄົມ ຍາດມາໄດ້ໃນໄລຍະຜ່ານມາ. ພ້ອມນັ້ນ, ກໍໄດ້ເນັ້ນໜັກໃຫ້ຄະນະໜ່ວຍຊາວໜຸ່ມຮາກຖານຊຸດໃໝ່ ເພີ່ມທະວີເອົາໃຈໃສ່ຊີ້ນໍາ-ນໍາພາຈັດຕັ້ງປະຕິບັດວຽກງານໃຫ້ໄປຕາມທິດທາງແຜນການທີ່ກຳນົດໄວ້; ຕັ້ງໜ້າສຶກສາອົບຮົມຄຸນທາດການເມືອງ, ຄຸນສົມບັດສິນທຳປະຕິວັດ ໃຫ້ສະມາຊິກຂອງຕົນມີຄວາມໜັກແໜ້ນທາງດ້ານການເມືອງແນວຄິດ, ມີສະຕິ, ມີນໍ້າໃຈຮັກຊາດ, ຮັກລະ ບອບໃໝ່, ເຊື່ອໝັ້ນຕໍ່ການນໍາພາຂອງພັກ, ຮັກອາຊີບ ປະກອບສ່ວນຢ່າງຕັ້ງໜ້າເຂົ້າໃນການປົກປັກຮັກສາ ແລະ ພັດ ທະນາປະເທດຊາດ; ເອົາໃຈໃສ່ຄົ້ນຄວ້າ, ກຳແໜ້ນແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ແຜນພັດ ທະນາເສດຖະກິດ-ສັງຄົມ, ມະຕິກອງປະຊຸມສະພາແຫ່ງຊາດ, ມະຕິກອງປະຊຸມໃຫຍ່ຂອງຜູ້ແທນຊາວໜຸ່ມທົ່ວປະ ເທດ, ມະຕິຄະນະບໍລິຫານງານຊາວໜຸ່ມສະພາແຫ່ງຊາດ ແຕ່ລະໄລຍະ, ກົດໝາຍວ່າດ້ວຍຊາວໜຸ່ມປະຊາຊົນປະຕິວັດລາວ ແລະ ກົດລະບຽບຂອງຊາວໜຸ່ມ; ເຜີຍແຜ່ເນື້ອໃນຈິດໃຈຂໍ້ແຂ່ງຂັນຂອງຊາວໜຸ່ມສະພາແຫ່ງຊາດ ໃຫ້ແກ່ສະມາ ຊິກພາຍໃນໜ່ວຍຢ່າງປົກກະຕິ; ເອົາໃຈໃສ່ປະຕິບັດລະບອບສ່ອງແສງລາຍງານ, ມີການຕໍານິຕົນເອງ, ຕຳນິສົ່ງຂ່າວເພື່ອກໍ່ສ້າງເຊິ່ງກັນ ແລະກັນຢ່າງສ້າງສັນ, ມີການດຳເນີນຊີວິດທີ່ຕິດພັນກັບວຽກວິຊາສະເພາະຂອງແຕ່ລະສະຫາຍເປັນປົກ ກະຕິ. ຕັ້ງໜ້າສຸມໃສ່ປະຕິບັດຂໍ້ແຂ່ງຂັນຂອງໜ່ວຍພັກ ກ່ຽວກັບການສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ໄປຄຽງຄູ່ກັບການສ້າງຂະບວນການປະຕິບັດຂໍ້ແຂ່ງຂັນ 4 ບຸກຂອງຊາວໜຸ່ມຢ່າງຫ້າວຫັນ ໂດຍສະເພາະດ້ານແນວຄິດ, ດ້ານການເຝິກຝົນຫຼໍ່ຫຼອມ-ຮ່ຳຮຽນ, ດ້ານການຈັດຕັ້ງ ແລະ ດ້ານວິຊາຊີບ ໃຫ້ປາກົດຜົນເປັນຮູບປະທຳ. ບັນດາສະມາ ຊິກຊາວໜຸ່ມ ຕ້ອງເປັນເຈົ້າການ ແລະ ເປັນແບບຢ່າງໃນການເຄົາລົບ ແລະ ປະຕິບັດກົດໝາຍ, ຕັ້ງໜ້າຍົກລະດັບຄວາມຮູ້, ຄວາມສາມາດ ປະກອບສ່ວນເຂົ້າໃນວຽກງານຊາວໜຸ່ມ ແລະ ວຽກງານວິຊາສະເພາະ ດ້ວຍຄວາມຫ້າວຫັນ ດັ່ງຄໍາຂວັນທີ່ວ່າ: ຊາວໜຸ່ມຈົ່ງເປັນດັ່ງອິນຊີ ທີ່ບໍ່ຫວັນກົວຕໍ່ພາຍຸລົມແດງ ຈົ່ງກາຍເປັນສິນໄຊຂອງຍຸກສະໄໝພວກເຮົາ, ບ່ອນໃດຍາກຊາວໜຸ່ມບຸກ ບ່ອນໃດທຸກຊາວໜຸ່ມຜ່ານຜ່າ ເມື່ອໃດຊາດຕ້ອງການ ຊາວໜຸ່ມຂານອາສາ.
(ຂ່າວ-ພາບ: ອານຸສອນ ພູມມີທອນ)