(ສພຊ) – ກອງປະຊຸມໃຫຍ່ສະມາຊິກສະຫະພັນແມ່ຍິງສະພາແຫ່ງຊາດ ຄັ້ງທີ VI ໄດ້ຈັດຂຶ້ນໃນຕອນເຊົ້າ ແລະ ປິດລົງດ້ວຍຜົນສຳເລັດຢ່າງຈົບງາມໃນຕອນບ່າຍວັນພຸດທີ 2 ເມສານີ້ ໂດຍການເປັນປະທານຂອງສະຫາຍ ນາງ ມະນີວັນ ເຍຍປາວເຮີ ກໍາມະການຄະນະບໍລິຫານງານສູນກາງສະຫະພັນແມ່ຍິງລາວ, ປະທານຄະນະບໍລິຫານງານສະ ຫະພັນແມ່ຍິງສະພາແຫ່ງຊາດ, ມີສະຫາຍ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງເລຂາຄະ ນະບໍລິຫານງານພັກສະພາແຫ່ງຊາດ, ສະຫາຍ ນາງ ອາລີ ວົງໜໍ່ບຸນທໍາ ກໍາມະການສູນກາງພັກ, ປະທານຄະນະບໍລິ ຫານງານສູນກາງສະຫະພັນແມ່ຍິງລາວ, ບັນດາປ້າອາວຸໂສບຳນານ, ຜູ້ແທນສົມບູນ, ຄະນະໜ່ວຍພັກຮາກຖານ, ອົງ ການຈັດຕັ້ງມະຫາຊົນຂອງສະພາແຫ່ງຊາດ ແລະ ແຂກຖືກເຊີນ ເຂົ້າຮ່ວມຫຼາຍກວ່າ 160 ສະຫາຍ.

ກອງປະຊຸມໃຫຍ່ ໄດ້ຄົ້ນຄວ້າ, ປຶກສາຫາລື ແລະ ແລກປ່ຽນຄວາມເຫັນຢ່າງກົງໄປກົງມາຕໍ່ເນື້ອໃນກອງປະ ຊຸມ ດ້ວຍບັນຍາກາດຟົດຟື້ນ ແລະ ມີຄວາມເປັນເອກະ ພາບສູງ ໂດຍໄດ້ຮັບຮອງເອົາເນື້ອໃນສໍາຄັນຕົ້ນຕໍຄື: ຮ່າງບົດລາຍງານການເມືອງສະຫະພັນແມ່ຍິງສະພາແຫ່ງຊາດ ຕໍ່ກອງປະຊຸມໃຫຍ່ຄັ້ງທີ VI ເຊິ່ງໄດ້ສະຫຼຸບຕີລາຄາຜົນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ V ຂອງສະຫະ ພັນແມ່ຍິງສະພາແຫ່ງຊາດ ໃນໄລຍະ 6 ປີຜ່ານມາ, ເຊິ່ງກອງປະຊຸມໄດ້ສະແດງຄວາມຊົມເຊີຍຕໍ່ບັນດາຜົນງານຜົນສໍາເລັດທີ່ຍາດມາໄດ້ ແລະ ເປັນເອກະພາບຕໍ່ບັນດາຈຸດອ່ອນ-ຂໍ້ຄົງຄ້າງໃນການເຄື່ອນໄຫວວຽກງານ; ພ້ອມນີ້, ຍັງໄດ້ພ້ອມກັນຄົ້ນຄວ້າຊອກຫາສາເຫດຕົ້ນຕໍທີ່ພາໃຫ້ມີຈຸດອ່ອນ-ຂໍ້ຄົງຄ້າງ ເພື່ອຖອດຖອນບົດຮຽນ ແລະ ປັບປຸງແກ້ ໄຂໃນຕໍ່ໜ້າ. ກອງປະຊຸມມີຄວາມເປັນເອກະພາບສູງຕໍ່ທິດ ທາງວຽກງານໃນໄລຍະ 5 ປີ (2025-2030) ໂດຍກໍານົດມີ 5 ທິດທາງລວມ, 8 ຄາດໝາຍສູ້ຊົນ ແລະ 11 ວຽກງານແຕ່ລະດ້ານຂອງຄະນະສະຫະພັນແມ່ຍິງສະພາແຫ່ງຊາດ ແລະ ຮັບຮອງເອົາບົດສຳຫຼວດການນຳພາລວມຂອງຄະນະບໍລິຫານງານສະຫະພັນແມ່ຍິງສະພາແຫ່ງຊາດ ຊຸດທີ V ເຊິ່ງໄດ້ຕີລາຄາດ້ານດີ, ດ້ານອ່ອນ-ຂໍ້ຄົງຄ້າງ ແລະ ບົດຮຽນຖອດຖອນໄດ້ຈໍານວນໜຶ່ງ ພ້ອມທັງສະເໜີມາດຕະການແກ້ໄຂດ້ານອ່ອນ-ຂໍ້ຄົງຄ້າງດັ່ງກ່າວ ເພື່ອເສີມຂະຫຍາຍບົດບາດນໍາພາຂອງຄະນະບໍລິຫານງານສະຫະພັນແມ່ຍິງສະ ພາແຫ່ງຊາດໃນຕໍ່ໜ້າ.

ຜູ້ແທນສົມບູນ ຈໍານວນ 132 ສະຫາຍ ໄດ້ໃຊ້ສິດປະ ຊາທິປະໄຕປ່ອນບັດຄັດເລືອກເອົາຄະນະບໍລິຫານງານສະ ຫະພັນແມ່ຍິງສະພາແຫ່ງຊາດ ສະໄໝທີ VI ລວມມີ 9 ສະ ຫາຍ ເຊິ່ງປະກອບດ້ວຍຜູ້ທີ່ມີມາດຕະຖານ, ເງື່ອນໄຂຄົບ ຖ້ວນ ເພື່ອສືບຕໍ່ນໍາພາຜັນຂະຫຍາຍມະຕິກອງປະຊຸມໃຫຍ່ຜູ້ແທນອົງຄະນະພັກສະພາແຫ່ງຊາດ, ມະຕິກອງປະ ຊຸມໃຫຍ່ຜູ້ແທນແມ່ຍິງລາວທົ່ວປະເທດ ໃຫ້ມີຜົນສໍາເລັດຕາມລະດັບຄາດໝາຍ. ກອງປະຊຸມຄົບຄະນະຄັ້ງປະຖົມມະລືກຂອງຄະນະສະຫະພັນແມ່ຍິງສະພາແຫ່ງຊາດ ຄັ້ງທີ VI ໄດ້ເປັນເອກະສັນເລືອກຕັ້ງເອົາສະຫາຍ ນາງ ວິໄຊ ສຣິດທິຣາດ ເປັນປະທານ, ສະຫາຍ ນາງ ກິ່ງນະຄອນ ຈັນທະກຸມມານ ເປັນຮອງປະທານ ທັງເປັນປະທານກວດກາ, ສະຫາຍ ນາງ ກັນທິນາ ປ້ານອິນຫວນ ເປັນຮອງປະ ທານ, ສະຫາຍ ນາງ ນິດແກ້ວ ຄໍາມີ ເປັນຮອງປະທານ, ສະ ຫາຍ ນາງ ອ້ອມປະຊາ ໄຊຍະກຸມມານ ເປັນຮອງປະທານກວດກາ, ສະຫາຍ ນາງ ເພັດສາຄອນ ອຸ່ນມີໄຊ, ສະຫາຍ ນາງ ໄກສອນ ແກ້ວມະນີໂຄດ, ສະຫາຍ ນາງ ສີສະໝຸດ ຈັນທະວົງ ແລະ ສະຫາຍ ນາງ ມະນີວັນ ລິດສົມພານ ເປັນຄະນະ; ເລືອກເອົາຜູ້ແທນສົມບູນ, ສໍາຮອງ ໄປຮ່ວມກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ IX ຈໍານວນ 4 ສະຫາຍ ຄື: ສະຫາຍ ນາງ ວິໄຊ ສຣິດທິຣາດ, ສະຫາຍ ນາງ ກິ່ງນະຄອນ ຈັນທະກຸມມານ, ສະຫາຍ ນາງ ກັນທິນາ ປ້ານອິນຫວນ ແລະ ສະຫາຍ ນາງ ນິດແກ້ວ ຄໍາມີ (ຜູ້ແທນສໍາຮອງ).
ກອງປະຊຸມໃຫຍ່ໄດ້ຮັບຟັງການໂອ້ລົມຂອງສະຫາຍ ປອ. ນາງ ສູນທອນ ໄຊຍະຈັກ ເຊິ່ງສະຫາຍໄດ້ສະແດງຄວາມຍ້ອງຍໍຊົມເຊີຍ ແລະ ມີຄໍາເຫັນຊີ້ນໍາສຸດທີ່ມີຄວາມໝາຍສໍາຄັນ ເຊິ່ງເປັນທິດເຍືອງທາງ, ເປັນການມອບໝາຍໜ້າທີ່ໃຫ້ຄະນະບໍລິຫານງານສະຫະພັນແມ່ຍິງສະພາແຫ່ງ ຊາດ ໃນການນໍາພາ-ຊີ້ນໍາສະມາຊິກສະຫະພັນແມ່ຍິງ ຈັດຕັ້ງປະຕິບັດທິດທາງໜ້າທີ່ວຽກງານຈຸດສຸມໃນ 5 ປີຕໍ່ໜ້າ ໃຫ້ປະສົບຜົນສໍາເລັດຕາມລະດັບຄາດໝາຍ.

ກອງປະຊຸມໃຫຍ່ຮຽກຮ້ອງມາຍັງຄະນະບໍລິຫານງານສະຫະພັນແມ່ຍິງສະພາແຫ່ງຊາດ, ສະມາຊິກສະຫະພັນແມ່ຍິງທຸກສະຫາຍ ຈົ່ງເຊີດຊູຄວາມເປັນແບບຢ່າງນຳໜ້າໃນທຸກດ້ານ, ຮຽກຮ້ອງມາຍັງໜ່ວຍແມ່ຍິງຮາກຖານໃນທົ່ວສະພາແຫ່ງຊາດ ຈົ່ງເສີມຂະຫຍາຍມູນເຊື້ອຮັກຊາດອັນດູດດື່ມ ບົນຈິດໃຈເອກະລາດ, ສ້າງຄວາມເຂັ້ມແຂງດ້ວຍຕົນເອງ, ເພິ່ງຕົນເອງ, ເປັນເຈົ້າຕົນເອງ ປະກອບສ່ວນທາງດ້ານສະຕິປັນຍາ ແລະ ເຫື່ອແຮງ ເຂົ້າໃນການພັດທະນາວຽກງານສະພາແຫ່ງຊາດ ໃຫ້ເຕີບໃຫຍ່ ແລະ ເຂັ້ມແຂງຢ່າງບໍ່ຢຸດຢັ້ງ.
(ນາງ ໄຊໂສພາພອນ ມິ່ງມຸງຄຸນ)