(ສພຊ) – ກອງປະຊຸມໃຫຍ່ຄັ້ງທີ II ຂອງໜ່ວຍຊາວໜຸ່ມຮາກຖານກົມຈັດຕັ້ງ-ພະນັກງານ ໄດ້ຈັດຂຶ້ນໃນຕອນບ່າຍວັນຈັນທີ 01 ກໍລະກົດ 2024 ໂດຍການເປັນປະທານຮ່ວມຂອງສະຫາຍ ແສງແກ້ວ ວົງນະລາດ ຄະນະພັກຮາກຖານຄະນະເລຂາທິການສະພາແຫ່ງຊາດ, ເລຂາໜ່ວຍພັກກົມຈັດຕັ້ງ-ພະນັກງານ, ສະຫາຍ ພອນແກ້ວ ຕົ້ນວໍລະຈິດ ກຳມະການຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ເລຂາຄະນະບໍລິຫານງານຊາວໜຸ່ມສະພາແຫ່ງຊາດ ແລະ ສະຫາຍ ສິດທິກອນ ພະຈັນສິດທິ ເລຂາໜ່ວຍຊາວໜຸ່ມຮາກຖານກົມຈັດຕັ້ງ-ພະ ນັກງານ; ເຂົ້າຮ່ວມມີຜູ້ຕາງໜ້າຈາກບັນດາໜ່ວຍຊາວໜຸ່ມອ້ອມຂ້າງສະພາແຫ່ງຊາດ ແລະ ອົງການຈັດຕັ້ງມະຫາຊົນພາຍໃນກົມດັ່ງກ່າວ.
ຜູ້ແທນກອງປະຊຸມ ໄດ້ພ້ອມກັນຄົ້ນຄວ້າປະກອບຄຳຄິດຄຳເຫັນໃສ່ເນື້ອໃນຂອງບົດສະຫຼຸບການເຄື່ອນ ໄຫວວຽກງານຂອງໜ່ວຍຊາວໜຸ່ມຮາກຖານກົມຈັດຕັ້ງ-ພະນັກງານ ຢ່າງມີເນື້ອໃນເລິກເຊິ່ງ ແລະ ເປັນເອກະພາບກັນຮັບຮອງເອົາບົດສະຫຼຸບດັ່ງກ່າວ ເປັນຕົ້ນແມ່ນການສັງເກດຕີລາຄາຜົນງານດ້ານຕັ້ງໜ້າ, ດ້ານອ່ອນ-ຂໍ້ຄົງຄ້າງ ໃນການເຄື່ອນໄຫວວຽກງານໄລຍະ 5 ປີຜ່ານມາ, ພ້ອມທັງວາງທິດທາງແຜນການທີ່ຈະຕ້ອງຈັດຕັ້ງປະຕິບັດໃນ 5 ປີຕໍ່ໜ້າ. ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕປ່ອນບັດເລືອກຕັ້ງເອົາຄະນະໜ່ວຍຊາວໜຸ່ມຮາກຖານຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຕະຖານ ແລະ ເງື່ອນໄຂທີ່ກຳ ນົດໄວ້ ເຊິ່ງມີຜູ້ອອກສະໝັກ 5 ສະຫາຍ ຍິງ 2 ສະຫາຍ, ເລືອກເອົາ 3 ສະຫາຍ; ກອງປະຊຸມຄັ້ງປະຖົມມະລືກຂອງຄະນະໜ່ວຍຊາວໜຸ່ມຮາກຖານກົມຈັດຕັ້ງ-ພະນັກງານ ຊຸດທີ II ໄດ້ເຫັນດີເປັນເອກະພາບເລືອກເອົາສະຫາຍ ຈິດຕິສັກ ລາດສິມຄຳ ເປັນເລຂາ, ສະຫາຍ ນາງ ກອງມະນີ ແກ້ວມະນີວອນ ເປັນຮອງເລຂາ ແລະ ປະທານກວດ ກາ, ສະຫາຍ ນາງ ກຸ້ງແກ້ວ ວິໄລວົງ ເປັນຄະນະ.
ໂອກາດນີ້, ສະຫາຍ ແສງແກ້ວ ວົງນະລາດ ໄດ້ມີຄຳເຫັນໂອ້ລົມຕໍ່ທີ່ປະຊຸມ ເຊິ່ງໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານຂອງຄະນະໜ່ວຍຊາວໜຸ່ມຊຸດຜ່ານມາ ແລະ ສະມາຊິກຊາວໜຸ່ມພາຍໃນໜ່ວຍ ທີ່ຍາດໄດ້ໃນຫຼາຍໆດ້ານ. ໂຄງປະກອບຂອງຄະນະໜ່ວຍຊາວໜຸ່ມຮາກຖານຊຸດໃໝ່ນີ້ ສ່ອງແສງໃຫ້ເຫັນລັກສະນະສືບທອດ, ຜົນໄດ້ຮັບດັ່ງກ່າວນີ້ ດ້ານໜຶ່ງກໍຍ້ອນການເອົາໃຈໃສ່ຊີ້ນໍາຂອງຄະນະໜ່ວຍພັກກົມຈັດຕັ້ງ-ພະນັກງານ, ຄະນະໜ່ວຍຊາວໜຸ່ມຮາກຖານຊຸດເກົ່າ, ດ້ານໜຶ່ງກໍຍ້ອນຄວາມຮັບຜິດຊອບດ້ານການເມືອງ ແລະ ຄວາມສາມັກຄີເປັນເອກະພາບຂອງບັນດາສະຫາຍຜູ້ແທນກອງປະຊຸມ; ເຖິງຢ່າງໃດກໍດີ, ຮຽກຮ້ອງມາຍັງບັນດາສະຫາຍໃນຄະນະໜ່ວຍຊາວໜຸ່ມຊຸດໃໝ່ ຕ້ອງເອົາໃຈໃສ່ເພີ່ມທະວີຄວາມສາມັກຄີ, ຄວາມເປັນເອກະພາບພາຍໃນໃຫ້ເປັນປຶກແຜ່ນ, ຍົກສູງຄວາມຮັບຜິດຊອບທາງການເມືອງ, ປັບປຸງແຜນການນໍາພາ ແລະ ວິທີເຮັດວຽກໃຫ້ດີຂຶ້ນຕື່ມ ແລະ ຕ້ອງເປັນແບບຢ່າງໃນການດໍາລົງຊີວິດໃຫ້ສົມກັບຄວາມເຊື່ອໝັ້ນ ແລະ ຄວາມໄວ້ວາງໃຈຂອງສະມາຊິກຊາວໜຸ່ມ ທີ່ໄດ້ເລືອກມາເປັນຕົວແທນແກນນໍາຂອງໜ່ວຍຊາວໜຸ່ມ.
(ຂ່າວ-ພາບ: ອານຸສອນ ພູມມີທອນ)