ຜູ້ແທນກອງປະຊຸມ ໄດ້ພ້ອມກັນຄົ້ນຄວ້າປະກອບຄຳຄິດຄຳເຫັນໃສ່ເນື້ອໃນຂອງບົດສະຫຼຸບການເຄື່ອນໄຫວວຽກງານຊາວໜຸ່ມຂອງໜ່ວຍຊາວໜຸ່ມຮາກຖານກຳມາທິການການຕ່າງປະເທດ ຢ່າງມີເນື້ອໃນເລິກເຊິ່ງ ແລະ ເປັນເອ ກະພາບກັນຮັບຮອງເອົາເນື້ອໃນຂອງບົດສະຫຼຸບດັ່ງກ່າວ ເປັນຕົ້ນແມ່ນການສັງເກດຕີລາຄາຜົນງານດ້ານຕັ້ງໜ້າ, ດ້ານອ່ອນ-ຂໍ້ຄົງຄ້າງ ໃນການເຄື່ອນໄຫວວຽກງານໄລຍະ 5 ປີຜ່ານມາ, ພ້ອມທັງວາງທິດທາງແຜນການທີ່ຈະຕ້ອງຈັດຕັ້ງປະ ຕິບັດໃນ 5 ປີຕໍ່ໜ້າ. ຜູ້ແທນກອງປະຊຸມ ຍັງໄດ້ພ້ອມກັນໃຊ້ສິດປະຊາທິປະໄຕປ່ອນບັດເລືອກຕັ້ງເອົາຄະນະໜ່ວຍຊາວໜຸ່ມຮາກຖານຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຕະຖານ ແລະ ເງື່ອນໄຂທີ່ກຳນົດໄວ້ ເຊິ່ງມີຜູ້ອອກສະໝັກ 5 ສະຫາຍ ຍິງ 2 ສະຫາຍ, ເລືອກເອົາ 3 ສະຫາຍ; ກອງປະຊຸມຄັ້ງປະຖົມມະລືກຂອງຄະນະໜ່ວຍຊາວໜຸ່ມຮາກຖານກໍາມາທິການການຕ່າງປະເທດ ຊຸດທີ II ໄດ້ເຫັນດີເປັນເອກະພາບເລືອກເອົາສະຫາຍ ນາງ ຄິດທະຈັນ ເພັດອຸທອນ ເປັນເລຂາ, ສະຫາຍ ສົມບູນ ເພັດໄຊຍະລາດ ເປັນຮອງເລຂາ ແລະ ປະທານກວດກາ, ສະຫາຍ ນາງ ວິໄລພອນ ຄໍາວົງສາ ເປັນຄະນະ.

ໂອກາດນີ້, ສະຫາຍ ເພັດລາ ທັນທະວົງສາ ໄດ້ມີຄຳເຫັນໂອ້ລົມຕໍ່ທີ່ປະຊຸມ ເຊິ່ງໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານຂອງຄະນະໜ່ວຍຊາວໜຸ່ມຊຸດຜ່ານມາ ແລະ ສະມາຊິກຊາວໜຸ່ມພາຍໃນໜ່ວຍ ທີ່ຍາດໄດ້ໃນຫຼາຍໆດ້ານ ; ຄຽງຄູ່ກັນນີ້ ຍັງໄດ້ສະແດງຄວາມເປັນຫ່ວງເປັນໄຍຕໍ່ດ້ານອ່ອນ-ຂໍ້ຄົງຄ້າງ ເຊິ່ງຮຽກຮ້ອງໃຫ້ຄະນະໜ່ວຍຊາວໜຸ່ມຊຸດໃໝ່ ຈະຕ້ອງສຸມໃສ່ປັບປຸງແກ້ໄຂໃຫ້ມີທິດທາງທີ່ຕັ້ງໜ້າກວ່າເກົ່າ. ພ້ອມກັນນັ້ນ, ສະຫາຍຍັງໃຫ້ຄວາມເຊື່ອໝັ້ນວ່າ ໃນຕໍ່ໜ້າ ຄະນະໜ່ວຍຊາວໜຸ່ມຊຸດໃໝ່ ຈະສືບຕໍ່ຊີ້ນຳ-ນຳພາສະມາຊິກພາຍໃນໜ່ວຍ ຈັດຕັ້ງປະຕິບັດໜ້າທີ່ການເມືອງຂອງຕົນຕາມມະຕິກອງປະຊຸມໃນຄັ້ງນີ້ ໃຫ້ຍາດໄດ້ຜົນງານ ແລະ ຜົນສຳເລັດໃໝ່ທີ່ຍິ່ງໃຫຍ່ກວ່າເກົ່າ; ພ້ອມທັງຮຽກ ຮ້ອງມາຍັງສະມາຊິກຊາວໜຸ່ມພາຍໃນໜ່ວຍ ຈົ່ງໄດ້ເຊີດຊູສະຕິປັນຍາ ແລະ ຄວາມຮັບຜິດຊອບ ເພື່ອພ້ອມກັນກັບຄະ ນະໜ່ວຍຊາວໜຸ່ມຊຸດໃໝ່ ເຮັດຫຼ້ອນໜ້າທີ່ການເມືອງຂອງຕົນໃຫ້ສູງຂຶ້ນຢ່າງບໍ່ຢຸດຢັ້ງ.

(ຂ່າວ-ພາບ: ນາງ ອາລິນ ສຸພິມມະປະດິດ)