ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງຫລວງນໍ້າທາຊຸດທີ II ໄດ້ສໍາເລັດລົງດ້ວຍຜົນສຳເລັດຕາມລະດັບຄາດໝາຍໃນຕອນແລງຂອງວັນທີ 25 ກໍລະກົດ 2024 ທີ່ສະໂມສອນຂອງແຂວງພາຍໃຕ້ການເປັນປະທານ ຂອງທ່ານ ຄຳຟອງ ອິນມານີ ຮອງເລຂາຄະນະບໍລິຫານງານພັກແຂວງ ປະທານສະພາປະຊາຊົນແຂວງ, ໃຫ້ກຽດເຂົ້າຮ່ວມຂອງ ທ່ານ ພົຕ. ປອ ວົງສັກ ພັນທະວົງ ກໍາມະການຄະນະປະຈໍາສະພາແຫ່ງຊາດ, ປະທານກໍາມາທິການ ປກຊ-ປກສ ສະພາແຫ່ງຊາດ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ3, ບັນດາທ່ານ ກຳມະການຄະນະປະຈຳພັກແຂວງ, ມີອະດີດການນໍາຂອງແຂວງ, ບັນດາທ່ານອະດີດສະມາຊິກສະພາແຫ່ງຊາດປະຈໍາເຂດເລືອກຕັ້ງ, ອະດີດສະມາຊິກສະພາປະຊາຊົນແຂວງ, ອົງການແນວລາວສ້າງຊາດ, ສະຫະພັນນັັກຮົບເກົ່າ, ບັນດາທ່ານສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ແຂກຖືກເຊີນເຂົ້າຮ່ວມທັງໝົດ 150 ກວ່າທ່ານ.
ກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງ ຊຸດທີ II ໄດ້ດໍາເນີນມາເປັນເວລາ ສອງວັນ, ແຕ່ວັນທີ 24-25 ກໍລະກົດ 2024 ດ້ວຍບັນຍາກາດທີ່ດີ ແຫ່ງການເສີມຂະຫຍາຍ ສິດປະຊາທິປະໄຕ ແລະ ເຕັມໄປດ້ວຍຄວາມຮັບຜິດຊອບສູງ ຂອງບັນດາຜູ້ແທນກອງປະຊຸມ; ກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງໃນຄັ້ງນີ້ໄດ້ຮັບຟັງ ແລະ ພິຈາລະນາ, ຮັບຮອງເອົາ 4 ບັນຫາສໍາຄັນ ດັ່ງນີ້: ໄດ້ຮັບຟັງການລາຍງານໂດຍຫຍໍ້ ຂອງທ່ານເຈົ້າແຂວງ ກ່ຽວກັບບັນຫາພົ້ນເດັ່ນ ໃນການຈັດ ຕັ້ງປະບັດແຜນພັດທະນາເສດຖະກິດ-ສັງຄົມ ປະຈໍາ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2024 ຂອງແຂວງ;ໄດ້ພິຈາລະນາ, ຮັບຮອງເອົາບົດລາຍງານ ກ່ຽວກັບການຈັດຕັ້ງປະບັດແຜນພັດທະນາເສດຖະ ກິດ-ສັງຄົມ ປະຈໍາ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2024 ຂອງແຂວງ;ໄດ້ພິຈາລະນາ, ຮັບຮອງເອົາບົດລາຍງານ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2024 ຂອງແຂວງ; ຮັບຮອງເອົາບົດລາຍງານ ກ່ຽວກັບການຈັດຕັ້ງປະຕິບັດວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ 6 ເດືອນຕົ້ນປີ 2024 ແລະ ທິດທາງແຜນການ 6 ເດືອນທ້າຍປີ 2024, ໄດ້ພິຈາລະນາ, ຮັບຮອງເອົາບົດລາຍງານ ກ່ຽວກັບການເຄື່ອນໄຫວວຽກງານ ແຕ່ກອງປະຊຸມສະໄໝສາມັນເທື່ອທີ 6 ຫາ ເທື່ອທີ 7 ແລະ ແຜນການເຄື່ອນໄຫວວຽກງານຮອດ ກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງ.
ຜົນສໍາເລັດຂອງກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງ ຊຸດທີ II ຄັ້ງນີ້ ແມ່ນໝາກຜົນແຫ່ງສະຕິປັນຍາ, ສິດປະຊາທິປະໄຕ ກໍຄື ການຍົກສູງຄວາມຮັບຜິດຊອບ ຂອງບັນດາທ່ານສະມາຊິກສະພາປະຊາຊົນແຂວງ, ບັນດາທ່ານຜູ້ແທນກອງປະຊຸມ ເປັນບ່ອນອີງ, ເປັນຂໍ້ມູນໃຫ້ອົງການປົກຄອງແຂວງ ແລະ ທຸກພາກສ່ວນກ່ຽວຂ້ອງ ນໍາໄປແກ້ໄຂ ບັນຫາຄວາມຫຍຸ້ງຍາກຕ່າງໆ ຢູ່ພາຍໃນແຂວງ ໃຫ້ມີຜົນສໍາເລັດເປັນຢ່າງດີ.
ພາບ ແລະ ຂ່າວ ໂດຍນັກຂ່າວ ສພຂ ຫຼວງນໍ້າທາ