ກອງປະຊຸມສະໄໝສາມັນເທື່ອທີ 05 ຂອງສະພາປະຊາຊົນແຂວງຄໍາມ່ວນຊຸດທີ II ໄດ້ໄຂຂຶ້ນໃນຕອນເຊົ້າຂອງວັນທີ 22 ສິງຫາ ແລະ ໄດ້ປິດລົງດ້ວຍຜົນສໍາເລັດອັນຈົບງາມໃນພາກເຊົ້າຂອງວັນທີ 26 ສິງຫາ 2023 ພາຍຫຼັງທີ່ໄດ້ດໍາເນີນມາເປັນເວລາ 4 ວັນເຄິ່ງໂດຍພາຍໃຕ້ການເປັນປະທານຂອງທ່ານ ບຸນມີ ພິມມະສອນ ປະທານສະພາປະຊາຊົນແຂວງ; ກອງປະຊຸມໄດ້ເປັນກຽດຢ່າງສູງທີ່ໄດ້ຕ້ອນຮັບການເຂົ້າຮ່ວມຂອງທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ , ທ່ານ ວັນໄຊ ພອງສະຫວັນ ເຈົ້າແຂວງໆຄໍາມ່ວນ ; ມີບັນດາທ່ານການນໍາພັກ-ລັດ , ຜູ້ອາວຸໂສບໍານານ , ບັນດາທ່ານສະມາຊິກສະພາແຫ່ງຊາດ , ສະມາຊິກສະພາປະຊາຊົນຂັ້ນແຂວງ , ບັນດາຫົວໜ້າ , ຮອງຫົວໜ້າພະແນກການອ້ອມຂ້າງແຂວງ , ຕາງໜ້າອົງການຈັດຕັ້ງມະຫາຊົນ , ຕາງໜ້າກໍາລັງ ປກຊ – ປກສ , ຕາງໜ້າຜູ້ປະກອບການທຸລະກິດ ແລະ ພາກສ່ວນກ່ຽວຂ້ອງເຂົ້າຮ່ວມ.
ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານຂອງອົງການປົກຄອງແຂວງກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມໄລຍະກາງສະໄໝຂອງແຜນການ 05 ປີ ( 2021 – 2025 ) ແລະ ທິດທາງແຜນການທ້າຍສະໄໝ ແລະ ໄລຍະປະຈໍາ 06 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ 2023 . ພ້ອມກັນນັ້ນກອງປະຊຸມໄດ້ສະແດງຄວາມຍ້ອງຍໍຊົມເຊີຍຕໍ່ຄວາມພະຍາຍາມຂອງອົງການປົກຄອງແຂວງໃນການບໍລິຫານ , ບັນຊາການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມ ດ້ວຍການວາງມາດຕະການຕ່າງໆເຮັດໃຫ້ເສດຖະກິດສາມາດຂະຫຍາຍຕົວໃນລະດັບ 5,34 % , ການຊຸກຍູ້ຂະບວນການຜະລິດເພື່ອຊ່ວຍພາຍໃນແຂວງ ແລະ ຂາອອກໄດ້ມີໜໍ່ແໜງໃໝ່ຈໍານວນໜຶ່ງ , ການເກັບລາຍຮັບມີການເພີ້ມຂຶ້ນ , ການປະຕິບັດບັນດາຄາດໝາຍໃນດ້ານຕ່າງໆກໍ່ມີຄວາມຄືບໜ້າ; ກອງປະຊຸມໄດ້ສະເໜີໃຫ້ອົງການປົກຄອງແຂວງເພີ້ມທະວີຄວາມເອົາໃຈໃສ່ໃນການແກ້ໄຂບັນຫາທີ່ສັງຄົມເປັນຫ່ວງເຊັ່ນ : ການແກ້ໄຂບັນຫາເງິນເຟີ້ , ອັດຕາແລກປ່ຽນເໜັງຕີງແຮງ , ຄ່າຄອງຊີບສູງຂຶ້ນເຊິ່ງສົ່ງຜົນກະທົບໂດຍກົງຕໍ່ຊີວິດການເປັນຢູ່ຂອງພະນັກງານ, ທະຫານ , ຕໍາຫຼວດກໍ່ຄືປະຊາຊົນບັນດາເຜົ່າຊາວແຂວງຄໍາມ່ວນ , ແກ້ໄຂບັນຫາໄພນໍ້າຖ້ວມ , ແກ້ໄຂບັນຫາການຈັດສັນການລົງທຶນຂອງລັດໃຫ້ທັນເວລາ , ການແກ້ໄຂບັນຫາຂອງຄູ , ແພດອາສາສະໝັກ , ບັນຫາຄຸນນະພາບຂອງການສຶກສາ , ສາທາລະນະສຸກ , ບັນຫາສະຫວັດດີການສັງຄົມ , ບັນຫາແຮງງານ , ບັນຫາຂຸດຄົ້ນແຮ່ທາດ ແລະ ອື່ນໆ; ກອງປະຊຸມໄດ້ຮັບຟັງການຊີ້ແຈງ ແລະ ຕອບຄໍາຊັກຖາມທີ່ບັນດາທ່ານສະມາຊິກສະພາປະຊາຊົນຂັ້ນແຂວງກໍ່ຄືປະຊາຊົນບັນດາເຜົ່າມີຄວາມສົນໃຈຫຼາຍຈາກທ່ານເຈົ້າແຂວງ , ຫົວໜ້າພະແນກແຜນການ ແລະ ການລົງທຶນແຂວງ , ຫົວໜ້າພະແນກການເງິນແຂວງ , ຫົວໜ້າພະແນກກະສິກໍາ ແລະ ປ່າໄມ້ແຂວງ , ຫົວໜ້າພະແນກອຸດສາຫະກໍາ ແລະ ການຄ້າແຂວງ , ຫົວໜ້າພະແນກໂຍທາທິການ ແລະ ຂົນສົ່ງແຂວງ , ຫົວໜ້າພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ , ຫົວໜ້າພະແນກພະລັງງານ ແລະ ບໍ່ແຮ່ແຂວງ , ຮອງຫົວໜ້າພະແນກສຶກສາທິການ ແລະ ກິລາແຂວງ , ຫົວໜ້າພະແນກສາທາລະນະສຸກແຂວງ , ຫົວໜ້າພະແນກຖະແຫຼງຂ່າວ-ວັດທະນະທໍາ ແລະ ທ່ອງທ່ຽວແຂວງ , ຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ , ຫົວໜ້າກອງບັນຊາການປ້ອງກັນຄວາມສະຫງົບແຂວງ ແລະ ຮອງຫົວໜ້າພະແນກຍຸຕິທໍາແຂວງ .
ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານການເຄື່ອນໄຫວວຽກງານຂອງອົງການໄອຍາການປະຊາຊົນແຂວງ , ສານປະຊາຊົນແຂວງໄລຍະກາງສະໄໝຂອງແຜນການ 05 ປີ ( 2021-2025 ) , ທິດທາງແຜນການທ້າຍສະໄໝ ແລະ ໄລຍະປະຈໍາ 06 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ 2023. ເຊິ່ງກອງປະຊຸມໄດ້ຕີລາຄາທັງສອງອົງການໄດ້ພະຍາຍາມປະຕິບັດພາລະບົດບາດ , ສິດ ແລະ ໜ້າທີ່ຂອງຕົນດ້ວຍຄວາມຮັບຜິດຊອບສູງ, ໄດ້ຍົກສູງຄວາມຮັບຜິດຊອບໃນການດໍາເນີນຄະດີຕາມຂະບວນການຍຸຕິທໍານັບມື້ມີຄຸນນະພາບສູງຂຶ້ນ; ກອງປະຊຸມໄດ້ສະເໜີໃຫ້ສານປະຊາຊົນແຂວງ ແລະ ອົງການໄອຍະການປະຊາຊົນແຂວງມີມາດຕະການໃນການແກ້ໄຂບັນດາຈຸດອ່ອນ, ຂໍ້ຄົງຄ້າງເພື່ອເຮັດໃຫ້ບັນດາປະກົດການຫຍໍ້ທໍ້ໄດ້ຮັບການແກ້ໄຂຢ່າງຈິງຈັງ ແລະ ນັບມື້ຫຼຸດໜ້ອຍຖ້ອຍລົງ .ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານການເຄື່ອນໄຫວວຽກງານຂອງສະພາປະຊາຊົນຂັ້ນແຂວງໄລຍະກາງສະໄໝຂອງແຜນການ 05 ປີ ( 2021-2025 ) , ທິດທາງແຜນການທ້າຍສະໄໝ ແລະ ການເຄື່ອນໄຫວວຽກງານໃນໄລຍະແຕ່ກອງປະຊຸມສະໄໝສາມັນເທື່ອທີ 04 ຫາ ກອງປະຊຸມສະໄໝສາມັນເທື່ອທີ 05 , ທິດທາງແຜນການເຄື່ອນໄຫວວຽກງານຮອດກອງປະຊຸມສະໄໝສາມັນເທື່ອທີ 06; ກອງປະຊຸມໄດ້ພິຈາລະນາ ແລະ ຮັບຮອງເອົານິຕິກໍາໃຕ້ກົດໝາຍຂອງອົງການປົກຄອງແຂວງຈໍານວນ 03 ສະບັບຄື : ຮ່າງຂໍ້ຕົກລົງວ່າດ້ວຍຄຸ້ມຄອງເຂດສະຫງວນທາງຫຼວງ, ຮ່າງຂໍ້ຕົກລົງ ວ່າດ້ວຍຄຸ້ມຄອງແຮງງານພາຍໃນ ແລະ ຕ່າງປະເທດຢູ່ແຂວງຄໍາມ່ວນ ແລະ ຮ່າງຂໍ້ຕົກລົງ ວ່າດ້ວຍການຈົດທະບຽນຄວາມຖືກຕ້ອງຂອງສັນຍາ ແລະ ເອກະສານ; ກອງປະຊຸມໄດ້ຈັດຕັ້ງການປະເມີນຄວາມໄວ້ວາງໃຈຕໍ່ການປະຕິບັດໜ້າທີ່ຂອງບຸກຄະລາກອນດໍາລົງຕໍາແໜ່ງທີ່ສະພາປະຊາຊົນແຂວງຄໍາມ່ວນຊຸດທີ II ເລືອກຕັ້ງ ແລະ ຮັບຮອງການແຕ່ງຕັ້ງເຊິ່ງປະກອບມີບຸກຄະລາກອນຂອງສະພາປະຊາຊົນຂັ້ນແຂວງຈໍານວນ 12 ທ່ານ , ບຸກຄະລາກອນຂອງອົງການປົກຄອງແຂວງ ຈໍານວນ 32 ທ່ານ ແລະ ບຸກຄະລາກອນຂອງສານປະຊາຊົນແຂວງ , ເຂດ , ອົງການໄອຍາການປະຊາຊົນແຂວງ , ເຂດຈໍານວນ 03 ທ່ານ .ນອກຈາກນັ້ນກອງປະຊຸມຍັງໄດ້ປະເມີນໃຫ້ຄະແນນຕໍ່ບຸກຄະລາກອນທີ່ຂຶ້ນລາຍງານ ແລະ ຊີ້ແຈງໃນກອງປະຊຸມສະໄໝສາມັນເທື່ອທີ 05 ຂອງສະພາປະຊາຊົນແຂວງຄໍາມ່ວນຊຸດທີ II ຈໍານວນ 16 ທ່ານ . ຜົນສໍາເລັດຂອງກອງປະຊຸມຄັ້ງນີ້ ເປັນຕົ້ນ ກອງເລຂາກອງປະຊຸມ ທີ່ຮັບໃຊ້ກອງປະຊຸມສະໄໝສາມັນເທື່ອນີ້ຢ່າງຫ້າວຫັນ ແລະ ມີຄວາມຮັບຜິດຊອບສູງ; ຂໍສະແດງຄວາມຂອບໃຈຕໍ່ກໍາລັງປ້ອງກັນຊາດ-ປ້ອງກັນຄວາມສະຫງົບ ທີ່ເອົາໃຈໃສ່ວຽກງານການປ້ອງກັນຄວາມສະຫງົບ, ຄວາມປອດໄພໃຫ້ກອງປະຊຸມຄັ້ງນີ້ ແລະ ຂອບໃຈຕໍ່ບັນດາສື່ມວນຊົນທີ່ໄດ້ນໍາສະເໜີຂ່າວສານ ໂດຍການຖ່າຍທອດສົດຂ່າວຜ່ານວິທະຍຸ, ແລະ ສື່ເອເລັກໂຕນິກ ເຊິ່ງໄດ້ອໍານວຍຄວາມສະດວກໃຫ້ສັງຄົມໄດ້ຕິດຕາມ ການດໍາເນີນກອງປະຊຸມໄດ້ທັນສະພາບການ ແທດຕົວຈິງ ແລະ ຕໍ່ເນື່ອງ.ເພື່ອສືບຕໍ່ຈັດຕັ້ງຜັນຂະຫຍາຍ ຜົນສໍາເລັດຂອງກອງປະຊຸມຄັ້ງນີ້, ກອງປະຊຸມຮຽກຮ້ອງມາຍັງ ຄະນະປະຈໍາສະພາປະຊາຊົນແຂວງ, ບັນດາຄະນະກໍາມະການ, ຄະນະເລຂາທິການສະພາປະຊາຊົນແຂວງ, ສະມາຊິກສະພາປະຊາຊົນແຂວງປະຈໍາເຂດເລືອກຕັ້ງ, ອົງການປົກຄອງແຂວງ, ອົງການທີ່ກ່ຽວຂ້ອງ, ແລະ ທຸກພາກສ່ວນທີ່ກ່ຽວຂ້ອງ ຈົ່ງໄດ້ຜັນຂະຫຍາຍມະຕິກອງປະຊຸມຄັ້ງນີ້ ເຂົ້າໃນການປະຕິບັດວຽກງານໃນຂອບເຂດຄວາມຮັບຜິດຊອບຂອງຕົນ ໃຫ້ໄດ້ຮັບຜົນສໍາເລັດເປັນຢ່າງດີ.
ໂດຍ: ເອື້ອ ມະໂນສິງ