ພາຍຫຼັງ​ດຳເນີນກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງສະຫວັນນະເຂດ ຊຶ່ງເປັນໄລຍະເວລາ 04 ວັນເຕັມ ເລິິ່ມແຕ່ວັນທີ 24-27 ມັງກອນ 2023 ຢູ່ທີ່ຫໍວັດທະນະທໍານະຄອນໄກສອນພົມວິຫານ​ ໄດ້ອັດລົງດ້ວຍຜົນສໍາເລັດຢ່າງສະຫງ່າງາມ ໂດຍການເປັນປະທານຂອງທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ປະທານສະພາປະຊາຊົນແຂວງ. ເປັນກຽດເຂົ້າຮ່ວມກອງປະຊຸມໂດຍທ່ານ ສັນຕິພາບ ພົມວິຫານ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງສະຫວັນນະເຂດ, ການນໍາຂອງແຂວງ, ຕາງໜ້າຄະນະປະຈໍາສະພາປະຊາຊົນແຂວງ, ພ້ອມບັນດາທ່ານ ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 13, ສະມາຊິກສະພາປະຊາຊົນແຂວງ, ອາດີດການນໍາຂອງແຂວງ, ອາດີດສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 13 ແລະ ອາດີດສະມາຊິກສະພາປະຊາຊົນແຂວງ ຊຸດທີ I, ອົງການກວດສອບປະຈໍາພາກກາງ,ອົງການກວດກາລັດແຂວງ, ອົງການໄອຍະການປະຊາຊົນແຂວງ, ສານປະຊາຊົນແຂວງ, ອົງການແນວລາວສ້າງຊາດແຂວງ, ອົງການຈັດຕັ້ງມະຫາຊົນ, ເຈົ້ານະຄອນໄກສອນພົມວິຫານ, ບັນດາທ່ານເຈົ້າເມືອງ, ຫົວໜ້າພະແນກການຕ່າງໆ, ຫົວໜ່ວຍທຸລະກິດ ແລະ ບັນດາທ່ານແຂກຖືກເຊີນ ກໍ່ໄດ້ເຂົ້າຮ່ວມຢ່າງພ້ອມພຽງ.

ກອງປະຊຸມໃນຄັ້ງນີ້,​ ໄດ້ພິຈາລະນາ, ຮັບຮອງເອົາບັນຫາສໍາຄັນຄື:

1. ໄດ້ພິຈາລະນາ, ຮັບຮອງເອົາບົດ​ລາຍ​ງານຂອງອົງການປົກຄອງແຂວງ ກ່ຽວ​ກັບ ການຈັດຕັ້ງປະຕິບັດແຜນ​ພັດທະນາ​ເສດຖະກິດ​-ສັງຄົມ, ​ແຜນ​ງົບປະມານ​ແຫ່ງ​ລັດຂອງແຂວງ ປະຈຳປີ 2022 ແລະ ທິດທາງແຜນ​ການ ປະຈໍາປີ 2023; ຮັບຮອງເອົາບົດລາຍງານຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປີ 2021, ບົດສະຫຼຸບການເຄື່ອນໄຫວວຽກງານ ປີ 2022 ແລະ ທິດທາງແຜນການເຄື່ອນໄຫວ ປີ 2023 ຂອງອົງການກວດສອບປະຈໍາພາກກາງ; 3. ຮັບຮອງເອົາບົດລາຍງານ ຂອງອົງການກວດກາລັດແຂວງ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການ ປະຈໍາປີ 2023; 4. ຮັບຮອງເອົາບົດລາຍງານການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການເຄື່ອນໄຫວວຽກງານ ປະຈໍາປີ 2023 ຂອງອົງການໄອຍະການປະຊາຊົນແຂວງ; 5. ຮັບຮອງເອົາບົດລາຍງານການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການເຄື່ອນໄຫວປະຈໍາປີ 2023 ຂອງສານປະຊາຊົນແຂວງ;6. ພິຈາລະນາ, ຮັບຮອງເອົານິຕິກໍາຂອງອົງການປົກຄອງແຂວງ ຈໍານວນ 02 ສະບັບຄື:

+ຂໍ້ຕົກລົງຂອງທ່ານເຈົ້າແຂວງໆສະຫວັນນະເຂດ ວ່າດ້ວຍການສະກັດກັ້ນ ແລະ ຕ້ານອັກຄີໄພ ພາຍໃນແຂວງສະຫວັນນະເຂດ;

+ຂໍ້ຕົກລົງຂອງທ່ານເຈົ້າແຂວງໆສະຫວັນນະເຂດ ວ່າດ້ວຍການຄຸ້ມຄອງຂີ້ເຫຍື້ອໃນທົ່ວແຂວງສະຫວັນນະເຂດ.

7. ພິຈາລະນາ, ຮັບຮອງເອົາບົດລາຍງານການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການເຄື່ອນໄຫວປະຈໍາປີ 2023 ຂອງສະພາປະຊາຊົນແຂວງ ຊຸດທີ II; 8. ກອງປະຊຸມໄດ້ລົງຄະແນນສຽງຮັບຮອງ ເອົາການເລືອກຕັ້ງ ທ່ານ ຄໍາແດງ ຂັນຕະມາລາ ວ່າການຫົວໜ້າອົງການໄອຍະການປະຊາຊົນແຂວງ ເປັນຫົວໜ້າອົງການໄອຍະການປະຊາຊົນແຂວງສະຫວັນນະເຂດ.

ທ້າຍສຸດນີ້ ທ່ານປະທານກອງປະຊຸມກໍ່ໄດ້ສັງລວມ ຜົນສຳເລັດຂອງກອງປະຊຸມດັ່ງກ່າວນີ້ ແມ່ນໝາກຜົນແຫ່ງສະຕິປັນຍາໃນການຄົ້ນຄວ້າປະກອບຄຳຄິດຄຳເຫັນ ຢ່າງກວ້າງຂວາງ, ເລິກເຊິ່ງ, ມີຄວາມຮັບຜິດຊອບ ແລະ ເປັນເອກະພາບສູງ ຂອງບັນດາທ່ານ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13 ແລະ ສະມາຊິກສະພາປະຊາຊົນແຂວງ, ທັງເປັນການປະກອບສ່ວນອັນສຳຄັນ ແລະ ສົມກຽດ ຂອງສະພາປະຊາຊົນແຂວງ ໃນຖານະເປັນອົງການຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າ ເຂົ້າໃນການປັບປຸງບູລະນະ ລັດປະຊາທິປະໄຕ ປະຊາຊົນ ໃຫ້ມີຄວາມໜັກແໜ້ນ ແລະ ເຂັ້ມແຂງ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ໃຫ້ບັນລຸໄດ້ຕາມແຜນການຢ່າງມີຜົນສໍາເລັດໃນຕໍ່ໜ້າ ແລະ ສະແດງຄວາມຂອບໃຈມາຍັງພາກສ່ວນຕ່າງໆ ທີ່ກ່ຽວຂ້ອງ ທີ່ໄດ້ປະກອບສ່ວນເຂົ້າໃນການກະກຽມກອງປະຊຸມໃນຄັ້ງນີ້ ຈົນໄດ້ຮັບຜົນສໍາເລັດຕາມລະດັບຄາດໝາຍທີ່ວາງໄວ້  ພ້ອມທັງກ່າວປິດກອງປະຊຸມຢ່າງເປັນທາງການ.

(ຂ່າວ-ພາບ: ວັນນະສຸກ ອິນສີຊຽງໃໝ່)