…………………………………………………………………….

(ສພຊ) ເພື່ອຮັບປະກັນໃຫ້ແກ່ການກະກຽມເນື້ອໃນລາຍງານຜົນການຕິດຕາມກວດກາ ການປະເມີນຜົນການຈັດຕັ້ງປະຕິບັດກົດໝາຍຂົງເຂດຍຸຕິທຳ 4 ສະບັບ ໃຫ້ມີຄວາມເປັນເອກະພາບ ແລະ ມີຄຸນນະພາບ ສາມາດນໍາເຂົ້າກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ພິຈາລະນາ ແລະ ຮັບຮອງ; ເພື່ອສະຫຼຸບຖອດຖອນບົດຮຽນໃຫ້ແກ່ການຕິດຕາມກວດກາການປະເມີນຜົນການຈັດຕັ້ງປະຕິບັດກົດໝາຍຂົງເຂດຕ່າງໆໃນຕໍ່ໜ້າ. ກຳມາທິການຍຸຕິທຳ ສະພາແຫ່ງຊາດ ໄດ້ຈັດກອງປະຊຸມຕິດຕາມກວດກາຜົນການປະເມີນການຈັດຕັ້ງປະຕິບັດກົດໝາຍຂົງເຂດຍຸຕິທໍາ 4 ສະບັບ ໃນລະຫວ່າງວັນທີ 23-24 ພຶດສະພາ 2023 ທີ່ເມືອງວັງວຽງ ແຂວງວຽງຈັນ ໂດຍການເປັນປະທານຂອງທ່ານ ຄຳແພງ ວິລະພັນ ປະທານກຳມາທິການຍຸຕິທຳ, ໂດຍການເຂົ້າຮ່ວມຂອງທ່ານ ສຈ. ປອ. ຈະເລີນ ເຍຍປາວເຮີ ຮອງປະທານສະພາແຫ່ງຊາດ, ຜູ້ຊີ້ນຳກຳມາທິການຍຸຕິທຳ; ມີບັນດາທ່ານຮອງປະທານກຳມາທິການ, ບັນດາທ່ານຮອງລັດຖະມົນຕີ, ມີຕາງໜ້າຈາກຫ້ອງວ່າການສຳນັກງານປະທານປະເທດ, ຫ້ອງວ່າການສໍານັກງານນາຍົກລັດຖະມົນຕີ, ອົງການໄອຍະການປະຊາຊົນສູງສຸດ, ສານປະຊາຊົນສູງສຸດ, ສານທະຫານຂັ້ນສູງ ແລະ ແຂກຖືກເຊີນ.

ໃນກອງປະຊຸມ ໄດ້ຮັບຟັງລາຍງານຜົນການປະເມີນການຈັດຕັ້ງປະຕິບັດກົດໝາຍວ່າດ້ວຍສານປະຊາຊົນ ແລະ ກົດໝາຍວ່າດ້ວຍການດຳເນີນຄະດີແພ່ງ; ລາຍງານຜົນການປະເມີນການຈັດຕັ້ງປະຕິບັດກົດໝາຍວ່າດ້ວຍ ອົງການໄອຍະການປະຊາຊົນ ແລະ ກົດໝາຍ ການດຳເນີນຄະດີອາຍາ; ລາຍງານຜົນການຕິດຕາມກວດກາ ການປະເມີນຜົນການຈັດຕັ້ງປະຕິບັດກົດໝາຍຂົງເຂດຍຸຕິທຳ 4 ສະບັບ; ຜ່ານຮ່າງບົດປະກອບຄຳເຫັນຂອງຄະນະປະຈຳສະພາແຫ່ງຊາດ ແລະ ຮ່າງມະຕິຮັບຮອງຜົນການຕິດຕາມກວດກາການປະເມີນຜົນການຈັດຕັ້ງປະຕິບັດກົດໝາຍຂົງເຂດຍຸຕິທຳ 4 ສະບັບ. ຈາກນັ້ນ, ບັນດາຜູ້ເຂົ້າຮ່ວມກອງປະຊຸມ ກໍໄດ້ສຸມສະຕິປັນຍາຄົ້ນຄວ້າປະກອບຄຳຄິດຄຳເຫັນຕໍ່ບົດລາຍງານດັ່ງກ່າວ ເພື່ອເຮັດໃຫ້ມີເນື້ອໃນສອດຄ່ອງສົມບູນຂຶ້ນກວ່າເກົ່າ.

ໂອກາດນີ້, ທ່ານ ສຈ. ປອ. ຈະເລີນ ເຍຍປາວເຮີ ໄດ້ມີຄຳເຫັນໂອ້ລົມຕໍ່ກອງປະຊຸມ ເຊິ່ງກ່ອນອື່ນ ທ່ານໄດ້ສະແດງຄວາມຍ້ອງຍໍຊົມເຊີຍຄະນະຮັບຜິດຊອບຕິດຕາມກວດກາຂອງສະພາແຫ່ງຊາດ ທີ່ໄດ້ມີຄວາມເອົາໃຈໃສ່ໃນການປະຕິບັດໜ້າທີ່ ເປັນຕົ້ນແມ່ນໄດ້ພະຍາຍາມປະສານສົມທົບກັບພາກສ່ວນທີ່ກ່ຽວຂ້ອງ ທັງໄດ້ລົງຕິດຕາມກວດກາຢູ່ບັນດາແຂວງຈຳນວນໜຶ່ງ ແລະ ປະສານສົມທົບກັບສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ເພື່ອຄົ້ນຄວ້າປຶກສາຫາລື ໂດຍສະເພາະກໍແມ່ນກອງປະຊຸມໃນມື້ນີ້ ເພື່ອຈະກວດກາຄວາມພ້ອມ, ການກະກຽມ ການຕິດຕາມການປະເມີນແລ້ວລາຍງານຕໍ່ຄະນະປະຈຳສະພາແຫ່ງຊາດ ແລະ ກອງປະຊຸມສະໄໝສາມັນ ຕໍ່ບັນຫາດັ່ງກ່າວນີ້ ເປັນໜຶ່ງໃນບັນຫາທີ່ ຄະນະປະຈຳສະພາແຫ່ງຊາດ ໃຫ້ຄວາມສຳຄັນ ແລະ ເອົາໃຈໃສ່ຊີ້ນຳ; ສຳລັບເນື້ອໃນສັງລວມຂອງບົດລາຍງານ ແມ່ນເຫັນດີເປັນເອກະພາບ ແຕ່ຢາກເນັ້ນຕື່ມບາງບັນຫາດັ່ງນີ້: ການປະເມີນຊຸດນີ້ ຕ້ອງຕີລາຄາໃຫ້ໄດ້ວ່າ ການຈັດຕັ້ງກົງຈັກຂອງສານ, ຂອງໄອຍະການແຕ່ລະຂັ້ນ ສອດຄ່ອງແລ້ວບໍ່ ຖືກຕ້ອງແລ້ວບໍ່ ກັບສະພາບຄວາມເປັນຈິງ, ສອດຄ່ອງກັບທັດສະນະແນວທາງນະໂຍບາຍຂອງພັກໃນໄລຍະນີ້ ເປັນຕົ້ນແມ່ນສານຂັ້ນຕົ້ນ ຕ້ອງຕີລາຄາໃຫ້ໄດ້ການກຳນົດບົດບາດ, ສິດ ແລະ ໜ້າທີ່ ຫຼື ສິດອຳນາດຂອງສານ, ໄອຍະການແຕ່ລະຂັ້ນ ຈະເເຈ້ງຮັດກຸມຄົບຊຸດແລ້ວບໍ່ ຖ້າວ່າຈະແຈ້ງຄົບຖ້ວນແລ້ວ ການຈັດຕັ້ງປະຕິບັດມີອັນໃດດີອັນໃດອ່ອນ ສາເຫດຍ້ອນຫຍັງ; ໃຫ້ເອົາໃຈໃສ່ການຕີລາຄາບຸກຄະລາກອນ ຖັນແຖວບຸກຄະລາກອນຂອງສານ, ຂອງໄອຍະການມາຮອດປັດຈຸບັນການຕີລາຄາດ້ານປະລິມານຄຸນນະພາບເໝາະສົມ, ສອດຄ່ອງ, ພຽງພໍແລ້ວບໍ່ ດ້ານຄຸນທາດການເມືອງໜັກແໜ້ນຕໍ່ລະບອບການເມືອງແລ້ວບໍ່; ຕີລາຄາໃຫ້ອອກ ກົດໝາຍວ່າດ້ວຍການດຳເນີນຄະດີແພ່ງ, ຄະດີອາຍາ ເຊິ່ງເເມ່ນກົດໝາຍວ່າດ້ວຍການຈັດຕັ້ງປະຕິບັດພາລະບົດບາດຂອງແຕ່ລະອົງການ ສະນັ້ນ, ບັນຫາຫຼັກໆ ຕ້ອງເບິ່ງວ່າຂັ້ນຕອນ, ວິທີການ, ມາດຕະການຕ່າງໆ ທີ່ລະບຸໄວ້ໃນສອງກົດໝາຍ ສອດຄ່ອງຫຼືບໍ່ ຕ້ອງຕີລາຄາໃຫ້ອອກ ແລະ ຫຼັງຈາກນັ້ນ, ຈະປັບປຸງອັນໃດ ຈະແກ້ອັນໃດ ຈຶ່ງເຮັດໃຫ້ການປະຕິບັດໜ້າທີ່ມີຄຸນນະພາບ.