(ສພຊ) ໃນຕອນເຊົ້າຂອງວັນທີ 3 ກຸມພາ 2022, ທີ່ສະພາແຫ່ງຊາດ ໄດ້ມີກອງປະຊຸມສຳມະນາວິທະຍາສາດ ແນວຄິດ ໄກສອນ ພົມວິຫານ ໃນການສ້າງ ແລະ ປະຕິບັດລັດຖະທຳມະນູນ ແຫ່ງ ສປປລາວ ໂດຍການເປັນປະທານຂອງທ່ານ ປອ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດ; ເຂົ້າຮ່ວມມີບັນດາທ່ານຮອງປະທານສະພາແຫ່ງຊາດ, ຄະນະປະຈຳສະພາແຫ່ງຊາດ, ປະທານ-ຮອງປະທານກໍາມາທິການ, ເລຂາທິການ, ຮອງລັດຖະມົນຕີ, ນັກວິທະຍາກອນ, ນັກວິທະຍາສາດ ແລະ ແຂກຖືກເຊີນ.

ກອງປະຊຸມ, ໄດ້ຮັບຟັງການສະເໜີຫຼາຍຫົວຂໍ້ທີ່ສຳຄັນ ເປັນຕົ້ນແນວຄິດ ໄກສອນ ພົມວິຫານ ກ່ຽວກັບການສ້າງ ແລະ ຈັດຕັ້ງປະຕິບັດລັດຖະທຳມະນູນ ແຫ່ງ ສປປລາວ; ບົດບາດຂອງສະພາແຫ່ງຊາດ, ລັດຖະບານ, ສານປະຊາຊົນ ແລະ ໄອຍະການປະຊາຊົນ ກັບການຈັດຕັ້ງປະຕິບັດລັດຖະທຳມະນູນ ຕາມແນວຄິດ ໄກສອນ ພົມວິຫານ ແລະ ການປັບປຸງແບບແຜນການນຳພາຂອງຄະນະພັກແຕ່ລະຂັ້ນ ໃຫ້ສອດຄ່ອງຕາມລັດຖະທຳມະນູນ ຕາມແນວຄິດ ໄກສອນ ພົມ ວິຫານ.

ໃນຕອນທ້າຍ, ທ່ານປະທານສະພາແຫ່ງຊາດ ໄດ້ຕີລາຄາສູງ ແລະເຊື່ອໝັ້ນຢ່າງໜັກແໜ້ນວ່າ ກອງປະຊຸມສໍາມະນາວິທະຍາສາດໃນເທື່ອນີ້ແມ່ນມີຄວາມໝາຍສຳຄັນ ທັງໃນດ້ານທິດສະດີ, ພຶດຕິກຳ ແລະ ເປັນປະໂຫຍດໃຫຍ່ຫຼວງແທດຕົວຈິງ ຮັບໃຊ້ໃຫ້ແກ່ການປັບປຸງລະບົບອໍານາດລັດໃນປັດຈຸບັນພ້ອມທັງຮຽກຮ້ອງມາຍັງບັນດານັກວິທະຍາສາດ ຈົ່ງຍົກສູງຄວາມຮັບຜິດຊອບການເມືອງ, ຄົ້ນຄວ້າ, ນໍາສະເໜີບົດດ້ວຍເນື້ອໃນທີ່ເລິກເຊິ່ງ, ຄົບຖ້ວນ ເພື່ອຊອກໃຫ້ເຫັນເຖິງເນື້ອແທ້ຂອງແນວຄິດ ໄກສອນ ພົມວິຫານ ກ່ຽວກັບການສ້າງ ແລະ ການຈັດຕັ້ງປະຕິບັດລັດຖະທຳມະນູນ ແລະ ກົດໝາຍ ເພື່ອກາຍເປັນຄັງສາງທິດສະດີ ໃຫ້ຄົນຮຸ່ນສືບທອດໄດ້ຄົ້ນຄວ້າຮ່ຳຮຽນ ແລະໝູນໃຊ້ສອດຄ່ອງກັບສະພາບຄວາມເປັນຈິງ.

(ພາບ ແລະ ຂ່າວ: ສົມນຶກ ແກ້ວໄຊຍະຈັກ)