ຕອນບ່າຍຂອງວັນທີ 31 ກໍລະກົດ 2024 ນີ້, ທີ່ສະໂມສອນແຂວງສາລະວັນ; ທ່ານ ສີເຮັງ ຫອມສົມບັດ ຮອງເລຂາພັກແຂວງ, ປະທານສະພາປະຊາຊົນແຂວງສາລະວັນ ໄດ້ກ່າວປິດກອງປະຊຸມ ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງສາລະວັນ ຊຸດທີ II ຂຶ້ນຢ່າງເປັນທາງການ; ໂດຍທ່ານໄດ້ກ່າວວ່າ: ກອງປະຊຸມໄດ້ດໍາເນີນຂຶ້ນຄັ້ງວັນທີ 30-31 ກໍລະກົດ 2024, ເປັນເວລາ 2 ວັນ, ດ້ວຍຄວາມເຄັ່ງຮ້ອນ, ເຕັມໄປດ້ວຍຄວາມຮັບຜິດຊອບສູງ, ມາຮອດມຶ້ນີ້ ໄດ້ບັນລຸຜົນສຳເລັດຕາມຈຸດປະສົງລະດັບຄາດໝາຍທີ່ວາງໄວ້, ກອງປະຊຸມຕີລາຄາສູງທີ່ສະມາຊິກສະພາປະຊາຊົນແຂວງ, ອົງການປົກຄອງແຂວງ, ອົງການຕຸລາການ, ຜູ້ແທນກອງປະຊຸມຈາກພາກສ່ວນທີ່ກ່ຽວຂ້ອງ ໄດ້ພ້ອມກັນທຸ້ມເທເຫື່ອແຮງ, ສະຕິປັນຍາ ແລະ ເສີມຂະຫຍາຍສິດປະຊາທິປະໄຕ ເຂົ້າໃສ່ການຄົ້ນຄວ້າ, ພິຈາລະນາບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານຂອງແຂວງ ແລະ ບັນຫາສໍາຄັນພື້ນຖານຂອງແຂວງ ເຊິ່ງເປັນການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ IX ຂອງແຂວງ ເຂົ້າສູ່ວຽກງານຕົວຈິງ ອັນໄດ້ເຮັດໃຫ້ແຂວງພວກເຮົາ ສືບຕໍ່ມີສະຖຽນລະພາບທາງການເມືອງທີ່ໜັກແໜ້ນ, ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍໂດຍພື້ນຖານ, ບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ໄດ້ຮັບການແກ້ໄຂເທື່ອລະກ້າວ, ເສດຖະກິດສືບຕໍ່ຂະຫຍາຍຕົວ, ຊີວິດການເປັນຢູ່ຂອງປະຊາຊົນພາຍໃນແຂວງ ໄດ້ຮັບການປັບປຸງດີຂຶ້ນ.

ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານຂອງແຂວງ ໄລຍະ 6 ເດືອນຕົ້ນປີ 2024 ແລະ ແຜນການໄລຍະ 6 ເດືອນທ້າຍປີ 2024, ກອງປະຊຸມໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຄວາມພະຍາຍາມ ຂອງອົງການປົກຄອງແຂວງ ແລະ ພາກສ່ວນທີ່ກ່ຽວຂ້ອງ ໃນການສູ້ຊົນແກ້ໄຂບັນຫາລວມຂອງແຂວງ, ການເກັບລາຍຮັບກໍເພີ່ມຂຶ້ນ, ການປະຕິບັດບັນດາຄາດໝາຍດ້ານຕ່າງໆ ກໍມີຄວາມຄືບໜ້າ. ກອງປະຊຸມສະເໜີໃຫ້ອົງການປົກຄອງແຂວງ ເພີ່ມທະວີຄວາມເອົາໃຈໃສ່ໃນການແກ້ໄຂບາງບັນຫາ ທີ່ສັງຄົມເປັນຫ່ວງ ເປັນຕົ້ນ: ການຄຸ້ມຄອງລັດ, ຄຸ້ມຄອງສັງຄົມຕາມກົດໝາຍ, ການເພີ່ມຂຶ້ນຂອງລາຄາສີນຄ້າ, ຄ່າຄອງຊີບສູງຂຶ້ນ ເຊິ່ງສົ່ງຜົນກະທົບໂດຍກົງຕໍ່ຊີວິດການເປັນຢູ່ຂອງພະນັກງານ, ທະຫານ, ຕໍາຫຼວດ ກໍຄືປະຊາຊົນບັນດາເຜົ່າ ແລະ ນໍາເອົາຄວາມຄິດເຫັນ ຂອງກອງປະຊຸມໄປປັບປຸງເຂົ້າໃສ່ແຜນພັດທະນາເສດຖະກິດ-ສັງຄົມ, ແຜນງົບປະມານຂອງແຂວງ ໃຫ້ມີເນື້ອໃນຮັດກຸມ, ຄົບຖ້ວນ ແລະ ສາມາດຈັດຕັ້ງປະຕິບັດໃຫ້ເປັນຮູບປະທໍາຫຼາຍຂຶ້ນ ຢ່າງເປັນລະ ບົບຕໍ່ເນື່ອງ.

1. ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດຄາດໝາຍວຽກພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງແຂວງສາລະວັນ ໃນໄລຍະຜ່ານມາ ແລະ ຄາດໝາຍສູ້ຊົນຮອດປີ 2024 ຕິດພັນກັບການຈັດຕັ້ງປະຕິບັດມະຕິກອງປະຊຸມສະພາປະຊາຊົນແຂວງ; ກອງປະຊຸມຕີລາຄາສູງ ຕໍ່ອົງການປົກຄອງທີ່ໄດ້ຕັ້ງໜ້ານໍາພາ-ຊີ້ນໍາ ການຈັດຕັ້ງປະຕິບັດບັນດາຄາດໝາຍ ດັ່ງກ່າວ ເປັນຕົ້ນແມ່ນ ການປະຕິບັດຄາດໝາຍການພັດທະນາຊົນນະບົດ ແລະ ແກ້ໄຂຄວາມທຸກຍາກ ໄດ້ບັນລຸຜົນສໍາເລັດຕາມຄາດໝາຍ ແລະ ຍັງປະຕິບັດບໍ່ທັນບັນລຸໄດ້ຕາມຄາດໝາຍ ເຊິ່ງໄດ້ເປັນການປະກອບສ່ວນອັນສໍາຄັນ ເຂົ້າໃນການແກ້ໄຂຄວາມທຸກຍາກ, ຍົກລະດັບຊີວິດການເປັນຢູ່ ຂອງປະຊາຊົນບັນດາເຜົ່າ; ພ້ອມທັງໃຫ້ຄົ້ນຄວ້າຈັດສັນງົບປະມານ ເຂົ້າໃສ່ວຽກງານດັ່ງກ່າວ ໃຫ້ສາມາດເຄື່ອນໄຫວໄດ້ຢ່າງຄ່ອງຕົວ ສາມາດບັນລຸຄາດໝາຍການພັດທະນາ ແລະ ແກ້ໄຂຄວາມທຸກຍາກ ຂອງປະຊາຊົນເທື່ອລະກ້າວ.
2. ກອງປະຊຸມໄດ້ຮັບຟັງການລາຍງານ ຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ, ຕະຫຼອດໄລຍະທີ່ຜ່ານມາ ອົງການປົກຄອງແຂວງ ໄດ້ສົມທົບກັບສະພາປະຊາຊົນແຂວງ ຈັດຕັ້ງຜັນຂະຫຍາຍມະຕິຂອງສະພາແຫ່ງຊາດ ແລະ ສະພາປະຊາຊົນແຂວງ ໃຫ້ເປັນອັນລະອຽດເຂົ້າໃນວຽກງານຂັ້ນຕົນ ແລະ ຕິດຕາມຊຸກຍູ້ການຈັດຕັ້ງປະຕິບັດວຽກງານດັ່ງກ່າວ ຢ່າງເປັນຂະບວນກວ້າງຂວາງຢູ່ຂັ້ນແຂວງ ແລະ ບັນດາເມືອງ ເຊີ່ງໄດ້ຮັບຜົນສໍາເລັດຫຼາຍດ້ານ ເປັນການປະກອບສ່ວນເຮັດໃຫ້ປະເທດຊາດ ກໍຄືແຂວງສາລະວັນພວກເຮົາ ສາມາດແກ້ໄຂບັນຫາຢາເສບຕິດໃຫ້ຫຼຸດໜ້ອຍຖອຍລົງເລື້ອຍໆ, ມອບໃຫ້ອົງການປົກຄອງແຂວງ ສືບຕໍ່ຊີ້ນໍາບັນດາພະແນກການ, ອົງການ ແລະ ອົງການປົກຄອງເມືອງ ຈົ່ງຍົກສູງຄວາມຮັບຜິດຊອບຂອງຕົນ ຕັ້ງໜ້າເຂົ້າຮ່ວມການຈັດຕັ້ງປະຕິບັດວາລະແຫ່ງຊາດ ໃຫ້ມີປະສິດທິພາບ, ປະສິດທິຜົນ ແລະ ເປັນຮູບປະທໍາຕົວຈິງ.
3. ກອງປະຊຸມໄດ້ພິຈາລະນາ ແລະ ຮັບຮອງເອົາບົດລາຍງານ ຂອງສະພາປະຊາຊົນແຂວງ ກ່ຽວກັບ ການຈັດຕັ້ງປະຕິບັດແຜນການເຄື່ອນໄຫວວຽກງານ ແຕ່ກອງປະຊຸມສະໄໝສາມັນ ເທື່ອທີ 6 ຫາ ເທື່ອທີ 7 ແລະ ທິດທາງແຜນການຮອດກອງປະຊຸມສະໄໝສາມັນ ເທື່ອທີ 8. ກອງປະຊຸມຕີລາຄາສູງ ຕໍ່ການຊີ້ນໍາ-ນໍາພາ ຂອງຄະນະປະຈໍາສະພາປະຊາຊົນແຂວງ, ການປະຕິບັດໜ້າທີ່ຂອງ ສະມາຊິກສະພາປະຊາຊົນແຂວງ ແລະ ກົງຈັກເສນາທິການຊ່ວຍວຽກ ທີ່ໄດ້ເອົາໃຈໃສ່ຈັດຕັ້ງຜັນຂະຫຍາຍວຽກງານຂອງຕົນ ຕາມພາລະບົດບາດ ແລະ ສິດໜ້າທີ່ ໃນ 6 ເດືອນຜ່ານມາມີຜົນສໍາເລັດຫຼາຍດ້ານ. ເຮັດໃຫ້ພາລະບົດບາດ ຂອງສະພາປະຊາຊົນແຂວງໄດ້ຮັບການເຊີດຊູນັບມື້ສູງຂຶ້ນ, ໄດ້ຮັບຄວາມເຊື່ອໝັ້ນ ຈາກອົງການຈັດຕັ້ງລັດຂັ້ນຕ່າງໆ ແລະ ໄດ້ຮັບຄວາມໄວ້ເນື້ອເຊື່ອໃຈ ຈາກປະຊາຊົນຜູ້ມີສິດເລືອກຕັ້ງຢ່າງກວ້າງຂວາງ.
4. ກອງປະຊຸມພິຈາລະນາ, ຮັບຮອງເອົາການສ້າງ ແລະ ປັບປຸງນິຕິກໍາສໍາຄັນຂອງແຂວງ ຈຳນວນ 2 ສະບັບ ຄື: ຂໍ້ຕົກລົງ ວ່າດ້ວຍ ການຄຸ້ມຄອງອາຫານປອດໄພ ຕາມຮ້ານອາຫານ ພາຍໃນແຂວງສາລະວັນ (ສ້າງໃໝ່); ຂໍ້ຕົກລົງ ວ່າດ້ວຍ ການຄຸ້ມຄອງຢາປາບສັດຕູພືດ ຢູ່ແຂວງສາລະວັນ (ປັບປຸງ), ການພິຈາລະນາ, ຮັບຮອງເອົາບັນດານິຕິກໍາທີ່ສຳຄັນຂອງແຂວງ ດັ່ງກ່າວ ເປັນການຈັດຕັ້ງປະຕິບັດແຜນການສ້າງ ແລະ ປັບປຸງນິຕິກໍາ 5 ປີ ຂອງສະພາປະຊາຊົນແຂວງ ຊຸດທີ II ທັງເປັນການປະກອບ ສ່ວນສໍາຄັນ ໃນການປັບປຸງ ແລະ ເພີ່ມທະວີເຄື່ອງມືຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ຂອງແຂວງເຮົາ ໃຫ້ເປັນລະບົບຄົບຊຸດ ເພື່ອຮັບປະກັນການປົກປ້ອງສິດ ແລະ ຜົນປະໂຫຍດຂອງລັດ, ລວມໝູ່, ນິຕິບຸກຄົນ ແລະ ປະຊາຊົນລາວບັນດາເຜົ່າ ເປັນການສືບຕໍ່ຜັນຂະຫຍາຍປະກອບສ່ວນ ໃນການສ້າງລັດທີ່ປົກຄອງດ້ວຍກົດໝາຍ ຂອງປະຊາຊົນໂດຍປະຊາຊົນ ແລະ ເພື່ອປະຊາຊົນເທື່ອລະກ້າວ.
5. ກອງປະຊຸມໄດ້ຮັບຟັງການຊີ້ແຈງ ຕໍ່ຄໍາຊັກຖາມທີ່ສະມາຊິກສະພາປະຊາຊົນແຂວງ ກໍຄືປະຊາຊົນບັນດາເຜົ່າພາຍໃນແຂວງ ທີ່ມີຄວາມສົນໃຈຫຼາຍ ຈາກທ່ານເຈົ້າແຂວງ, ຫົວໜ້າພະແນກແຜນການ ແລະ ການລົງທຶນ, ຫົວໜ້າພະແນກການເງິນ, ຫົວໜ້າພະແນກກະສິກຳ ແລະ ປ່າໄມ້ແຂວງ, ຫົວໜ້າກອງບັນຊາການປ້ອງກັນຄວາມສະຫງົບແຂວງ, ຫົວໜ້າພະແນກອຸດສາຫະກຳ ແລະ ການຄ້າແຂວງ, ພະແນກສຶກສາທິການ ແລະ ກິລາແຂວງ, ຫົວໜ້າຄະນະກໍ່ສ້າງຮາກຖານການເມືອງຂັ້ນແຂວງ ປະຈຳເມືອງສາລະວັນ.

ພາບ-ຂ່າວ: ດີລໍາພົນ ພົມມະຈັນ