(ສພຊ) ເພື່ອຈັດຕັ້ງສະຫຼຸບຕີລາຄາການເຄື່ອນໄຫວວຽກງານປ້ອງກັນພາຍໃນ ແລະ ການປ້ອງກັນຕົວເອງ ຂອງສະພາແຫ່ງຊາດ ປະຈຳປີ 2022 ແລະ ວາງທິດທາງແຜນການວຽກງານ ປີ 2023; ເພື່ອເຮັດໃຫ້ຄະນະພັກ-ຄະນະນໍາ, ຄະນະປ້ອງກັນພາຍໃນ ແລະ ໜ່ວຍປ້ອງກັນຕົວ ຂອງສະພາແຫ່ງຊາດ ໄດ້ເຊື່ອມຊຶມ, ກຳແໜ້ນເຖິງຄວາມໝາຍຄວາມສໍາຄັນ, ພາລະບົດບາດໜ້າທີ່ ແລະ ເນື້ອໃນຈິດໃຈຕ່າງໆ ທີ່ກ່ຽວພັນເຖິງວຽກງານປ້ອງກັນພາຍໃນ ໃຫ້ເລິກເຊິ່ງ, ພ້ອມທັງຮູ້ນຳໄປຈັດຕັ້ງປະຕິບັດຢ່າງຖືກຕ້ອງ ແລະ ມີປະສິດທິຜົນ ແລະ ເພື່ອເຮັດໃຫ້ວຽກງານປ້ອງກັນພາຍໃນ ຢູ່ພາຍໃນສະພາແຫ່ງຊາດມີຄວາມເຂັ້ມແຂງ, ໜັກແໜ້ນ ສາມາດສະກັດກັ້ນ, ຕອບໂຕ້ຢ່າງທັນການ ຕໍ່ປາກົດການຫຍໍ້ທໍ້, ເລ່ກົນ ກໍຄືຍຸດທະສາດ “ຫັນປ່ຽນໂດຍສັນຕິ ຂອງພວກສັດຕູ ແລະ ກຸ່ມຄົນບໍ່ດີ ທີ່ມີຕໍ່ພັກ-ລັດພວກເຮົາ”. ໃນວັນທີ 22 ມີນາ 2023 ທີ່ສະພາແຫ່ງຊາດ, ນະຄອນຫຼວງວຽງຈັນ ໄດ້ມີກອງປະຊຸມສະຫຼຸບວຽກງານປ້ອງກັນພາຍໃນ ແລະ ການປ້ອງກັນຕົວ ຂອງສະພາແຫ່ງຊາດ ຊຸດທີ IX ປະຈຳປີ 2022 ແລະ ທິດທາງແຜນການປີ 2023 ໂດຍການເປັນປະທານກອງປະຊຸມຂອງສະຫາຍ ພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດ, ຫົວໜ້າຄະນະປ້ອງກັນພາຍໃນ; ມີສະຫາຍປະທານ-ຮອງປະທານກຳມາທິິການປ້ອງກັນຊາດ-ປ້ອງກັນຄວາມສະຫງົບ, ບັນດາສະຫາຍໃນຄະນະປ້ອງກັນພາຍໃນ ແລະ ໜ່ວຍປ້ອງກັນຕົວ ຂອງສະພາແຫ່ງຊາດ, ກອງເລຂາຄະນະປ້ອງກັນພາຍໃນ ແລະ ໜ່ວຍປ້ອງກັນຕົວ, ຄະນະກົມ, ຄະນະພະແນກ ພ້ອມດ້ວຍພະນັກງານ-ວິຊາການທີ່ກ່ຽວຂ້ອງຈຳນວນໜຶ່ງເຂົ້າຮ່ວມ.

ກອງປະຊຸມ ໄດ້ຮັບຟັງການຜ່ານບົດສະຫຼຸບການເຄື່ອນໄຫວວຽກງານປ້ອງກັນພາຍໃນ ປະຈຳປີ 2022 ແລະ ແຜນການປີ 2023 ຂອງຄະນະປ້ອງກັນພາຍໃນ ແລະ ໜ່ວຍປ້ອງກັນຕົວ ຂອງສະພາແຫ່ງຊາດ ຊຸດທີ IX; ຈາກນັ້ນ, ຕາງໜ້າກົມ 200 ກະຊວງປ້ອງກັນຄວາມສະຫງົບ ມີຄຳເຫັນແນະນຳກ່ຽວກັບການເຄື່ອນໄຫວວຽກງານປ້ອງກັນພາຍໃນ ແລະ ສະເໜີເອກະສານທີ່ກ່ຽວຂ້ອງຈຳນວນໜຶ່ງ; ຫຼັງຈາກນັ້ນ, ຍັງໄດ້ສະເໜີຜ່ານແຈ້ງການ ຂອງກະຊວງປ້ອງກັນຄວາມສະຫງົບ ກ່ຽວກັບການຈັດຕັ້ງເຝິກອົບຮົມວຽກງານກັນສະກັດກັ້ນ ອັກຄີໄພ; ຜ່ານຮ່າງແຜນການເຝິກອົບຮົມ ກ່ຽວກັບວຽກງານກັນສະກັດກັ້ນ ອັກຄີໄພ; ພ້ອມນັ້ນ, ກອງປະຊຸມຍັງໄດ້ແລກປ່ຽນຄຳຄິດຄຳເຫັນກ່ຽວກັບການເຄື່ອນໄຫວວຽກງານປ້ອງກັນພາຍໃນ ແລະ ການປ້ອງກັນຕົວ.

ໃນຕອນທ້າຍຂອງກອງປະຊຸມ, ສະຫາຍ ພົນໂທ ສຸວອນ ເລືອງບຸນມີ ໄດ້ມີຄໍາເຫັນກ່າວປິດກອງປະຊຸມວ່າ: ກອງປະຊຸມໄດ້ຄົ້ນຄວ້າປະກອບຄຳຄິດຄຳເຫັນ ແລະ ຮັບຮອງ ບົດສະຫຼຸບການເຄື່ອນໄຫວວຽກງານ ປະຈຳປີ 2022 ແລະ ທິດທາງວຽກງານຈຸດສຸມ ປີ 2023 ຂອງຄະນະປ້ອງກັນພາຍໃນ ແລະ ໜ່ວຍປ້ອງກັນຕົວ ຂອງສະພາແຫ່ງຊາດ ຊຸດທີ IX; ພ້ອມກັນນີ້, ຍັງໄດ້ຮັບຟັງການເຜີຍແຜ່ແນະນໍາກ່ຽວກັບວຽກງານວິຊາສະເພາະປ້ອງກັນພາຍໃນ ໂດຍພະນັກງານວິຊາສະເພາະປ້ອງກັນພາຍໃນກົມ 200 ກະຊວງປ້ອງກັນຄວາມສະຫງົບ ເຊິ່ງໄດ້ຍົກໃຫ້ເຫັນເຖິງຄວາມໝາຍ, ຄວາມສຳຄັນ, ວິທີເຮັດວຽກ ແລະ ແບບແຜນຕ່າງໆ ໃນການເຄື່ອນໄຫວວຽກງານປ້ອງກັນພາຍໃນ ແລະ ການປ້ອງກັນຕົວ, ພ້ອມກັນນັ້ນ, ກໍຍັງໄດ້ຍົກໃຫ້ເຫັນເຖິງບັນດາກົນອຸບາຍ ຂອງພວກຄົນບໍ່ດີ ແລະ ປາກົດການຕົວຈິງທີ່ເກີດຂຶ້ນ ແລະ ເປັນບົດຮຽນໃນໄລຍະຜ່ານມາ ເຊິ່ງເປັນຂໍ້ມູນຄວາມຮູ້ທີ່ສຳຄັນ ໃຫ້ແກ່ຄະນະປ້ອງກັນພາຍໃນ ນໍາໄປຈັດຕັ້ງປະຕິບັດ ແລະ ໝູນໃຊ້ຢ່າງປະດິດສ້າງ ເຂົ້າໃນສະພາບວຽກງານຕົວຈິງຂອງສະພາແຫ່ງຊາດ; ພ້ອມນັ້ນ, ສະຫາຍ ຍັງໄດ້ຮຽກຮ້ອງໃຫ້ທຸກສະຫາຍ ຈົ່ງເພີ່ມທະວີຄວາມສາມັກຄີເປັນເອກະພາບ, ເຊີດຊູນໍ້າໃຈເປັນເຈົ້າຕົນເອງ, ກຸ້ມຕົນເອງ, ເພິ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ, ເຕົ້າໂຮມທຸກກຳລັງແຮງສັງລວມ ສຸມໃສ່ການຈັດຕັ້ງປະຕິບັດໜ້າທີ່ອັນມີກຽດສະຫງ່າໃຫ້ມີຜົນສໍາເລັດຢ່າງແຂງແຮງ.

(ພາບ ແລະ ຂ່າວ: ນາງ ສຸພາວັນ ຫອມສະນິດ)