(ສພຊ) ກອງປະຊຸມສະຫຼຸບຖອດຖອນບົດຮຽນການເຄື່ອນໄຫວວຽກງານຂອງສະພາແຫ່ງຊາດຊຸດທີ IX ແລະ ສະພາປະຊາຊົນຂັ້ນແຂວງ ຊຸດທີ II ໄລຍະກາງສະໄໝຂອງແຜນການ 5 ປີ (2021 2025) ໄດ້ຈັດຂຶ້ນໃນລະຫວ່າງວັນທີ 21-22 ທັນວາ 2023 ທີ່ຫໍປະຊຸມແຫ່ງຊາດ, ໂດຍການເປັນປະທານຂອງທ່ານ ໄຊສົມພອນ ພົມວິ ຫານ ປະທານສະພາແຫ່ງຊາດ; ເຂົ້າຮ່ວມມີທ່ານຮອງນາຍົກລັດຖະມົນຕີ, ປະທານສານປະຊາຊົນສູງສຸດ, ຫົວໜ້າອົງການໄອຍະການປະຊາຊົນສູງສຸດ, ບັນດາບັນດາທ່ານລັດຖະມົນຕີ ພ້ອມດ້ວຍແຂກຖືກເຊີນຈາກສູນກາງ ແລະ ທ້ອງຖິ່ນ.

ໃນພິທີເປີດ ທ່ານ ໄຊສົມພອນ ພົມວິຫານ ກ່າວວ່າ: ຈຸດປະສົງກອງປະຊຸມໃນຄັ້ງນີ້ ເພື່ອສະຫຼຸບຕີລາຄາຖອດຖອນບົດຮຽນການເຄື່ອນໄຫວວຽກງານຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໄລຍະກາງສະ ໄໝ ເຊິ່ງຈະໄດ້ຍົກໃຫ້ເຫັນດ້ານດີເພື່ອເສີມຂະຫຍາຍ, ດ້ານອ່ອນຄົງຄ້າງທີ່ຈະຕ້ອງສືບຕໍ່ປັບປຸງແກ້ໄຂ ແລະ ຕີລາຄາຢ່າງກົງໄປກົງມາ; ກອງປະຊຸມຈະໄດ້ຮັບຟັງ, ປຶກສາຫາລື ແລະ ປ່ຽນບົດຮຽນນໍາກັນຕໍ່ບັນດາເນື້ອໃນສຳຄັນ ຄື: 1. ບົດລາຍງານຂອງຄະນະປະຈຳສະພາແຫ່ງຊາດ ກ່ຽວກັບການເຄື່ອນໄຫວວຽກງານຂອງສະພາແຫ່ງຊາດຊຸດທີ IX ແລະ ສະພາປະຊາຊົນຂັ້ນແຂວງ ຊຸດທີ II ໄລຍະກາງສະໄໝ (2021-2023) ແລະ ທິດທາງແຜນການເຄື່ອນໄຫວວຽກງານທ້າຍສະໄໝ (2023-2025); 2. ການປະກອບຄຳເຫັນໃນຫົວຂໍ້ຕ່າງໆຂອງບັນດາກຳມາທິການສະພາແຫ່ງຊາດ ແລະ ຄະນະປະຈຳສະພາປະຊາຊົນຂັ້ນແຂວງ ຈຳນວນ 8 ຫົວຂໍ້, ໃນນີ້ ສະພາແຫ່ງຊາດ ປະກອບມີ 4 ຫົວຂໍ້ຄື: ການຍົກສູງຄຸນນະພາບໃນການສ້າງ ແລະ ປັບປຸງກົດໝາຍ, ປະສິດທິຜົນການຮັບຮອງ ແລະ ການຈັດຕັ້ງປະຕິບັດບັນຫາສໍາຄັນພື້ນຖານຂອງຊາດ, ເພີ່ມທະວີວຽກງານຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ເພື່ອຮັບປະກັນການຄຸ້ມຄອງລັດຢ່າງມີປະສິດທິຜົນ, ແລະ ການພິຈາລະແກ້ໄຂຄຳຮ້ອງຂໍຄວາມເປັນທຳຂອງສະພາແຫ່ງຊາດ; ສຳລັບສະພາປະຊາຊົນຂັ້ນແຂວງ ຈະມີບົດປະກອບຄໍາເຫັນ 4 ຫົວຂໍ້ຄື: ການສ້າງ ແລະ ປັບປຸງນິຕິກໍາທີ່ສຳຄັນຂອງທ້ອງຖິ່ນ ເພື່ອຮັບປະກັນທັງປະລິມານ ແລະ ຄຸນນະພາບ ຈະຊ່ວຍເປັນເຄື່ອງມືສຳ ຄັນແກ່ການພັດທະນາເສດຖະກິດ-ສັງຄົມຂອງທ້ອງຖິ່ນໃຫ້ເຂັ້ມແຂງ, ປະສິດທິຜົນການຮັບຮອງ ແລະ ຈັດຕັ້ງປະຕິ ບັດບັນຫາສໍາຄັນພື້ນຖານທີ່ສໍາຄັນຂອງທ້ອງຖິ່ນ, ການຕິດຕາມກວດກາຂອງສະພາປະຊາຊົນແຂວງມີຄວາມເຂັ້ມ ແຂງ ຈະຊ່ວຍໃຫ້ການພັດທະນາທ້ອງຖິ່ນມີປະສິດທິຜົນ, ແລະ ການພົບປະປະຊາຊົນຂອງສະມາຊິກສະພາແຫ່ງຊາດ, ສະພາປະຊາຊົນຂັ້ນແຂວງ ເປັນການປະກອບສ່ວນປັບປຸງວຽກງານການເມືອງຢູ່ຂັ້ນຮາກຖານ. ນອກນັ້ນ, ບັນ ດາເນື້ອໃນທີ່ນໍາເຂົ້າມາລາຍງານ ແລະ ການປະກອບຄວາມເຫັນ, ປຶກສາຫາລື ໃນກອງປະຊຸມຄັ້ງນີ້ ລ້ວນແລ້ວເປັນເນື້ອໃນວຽກງານສຳຄັນຢູ່ໃນພາລະບົດບາດ, ສິດ ແລະ ໜ້າທີ່ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ແລະ ພົວພັນກັບວຽກງານຂອງບັນດາອົງການອຳນາດລັດທັງຂັ້ນສູນກາງ ແລະ ຂັ້ນທ້ອງຖິ່ນ; ສະນັ້ນ, ເພື່ອເຮັດໃຫ້ກອງປະຊຸມມີຄຸນນະພາບ, ປະສິດທິຜົນ ແລະ ບັນລຸຜົນຕາມແຜນການທີ່ວາງໄວ້, ຂ້າພະເຈົ້າຂໍຮຽກຮ້ອງໃຫ້ທຸກທ່ານໄດ້ເອົາໃຈໃສ່ຄົ້ນຄວ້າ ແລະ ເປັນເຈົ້າການປະກອບຄວາມຄິດຄວາມເຫັນຕໍ່ແຕ່ລະເນື້ອໃນຢ່າງກົງໄປກົງມາ, ມີເຫດມີຜົນ, ຖືກກັບສະພາບຕົວຈິງບົນພື້ນຖານແນວທາງປ່ຽນແປງໃໝ່ຂອງພັກ, ລັດຖະທຳມະນູນ, ກົດໝາຍຂອງລັດ ພ້ອມທັງພ້ອມກັນຊອກຫາວິທີການ, ມາດຕະການແກ້ໄຂບັນດາບັນຫາທີ່ຍັງເປັນຄວາມບົກຜ່ອງ, ມີຄວາມຫຍຸ້ງຍາກອຸດຕັນ ເພື່ອເຮັດແນວໃດໃຫ້ການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງສະພາແຫ່ງຊາດ, ສະພາປະຊາຊົນຂັ້ນແຂວງ ກໍຄືບັນດາອົງການລັດທຸກຂັ້ນ ມີຄວາມຖືກຕ້ອງຕາມລັດຖະທຳມະນູນ ແລະ ກົດໝາຍ ຮ່ວມກັບລັດຖະບານ ແລະ ອົງການຕ່າງໆທັງຢູ່ສູນກາງ ແລະ ທ້ອງຖິ່ນ ເພື່ອນໍາພາປະເທດພວກເຮົາຈະເລີນກ້າວ ໜ້າຍິ່ງຂຶ້ນ, ນຳເອົາປະເທດຫຼຸດພົ້ນອອກຈາກຄວາມຫຍຸ້ງຍາກທີ່ພວມປະເຊີນໃນປັດຈຸບັນ.

(ພາບ ແລະ ຂ່າວ: ສອນສັກ ວັນວິໄຊ)