ເພື່ອເປັນການສະຫຼຸບຕີລາຄາຄືນໃນການຈັດຕັ້ງປະຕິບັດວຽກງານໃນໄລຍະ 1 ປີ 2023 ແລະ ກໍານົດທິດທາງແຜນການປະຈໍາປີ 2024 ຂອງຄະນະກໍາມະການ ແລະ ຄະນະເລຂາທິການສະພາປະຊາຊົນແຂວງ. ໃນວັນທີ 26 ມັງກອນ 2024. ທີ່ຫ້ອງປະຊຸມສະພາປະຊາຊົນແຂວງ, ໄດ້ຈັດກອງປະຊຸມ ຄົບຄະນະ ປະຈໍາປີ 2023 ຂອງຄະນະກໍາມະການເສດຖະກິດ, ແຜນການ ແລະ ການເງີນ, ຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ, ຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ ແລະ ຄະນະເລຂາທິການ, ໂດຍການເປັນປະທານຂອງ ທ່ານ ນາງ ມີນາພອນ ໄຊສົມພູ ປະທານສະພາປະຊາຊົນ ອັດຕະປື, ມີບັນດາທ່ານຄະນະປະຈໍາ,​ປະທານ-ຮອງປະທານຄະນະກໍາມະການ, ຄະນະເລຂາທິການ, ສະມາຊິກສະພາປະຊາຊົນແຂວງທີ່ເປັນຄະນະກໍາມະການ, ຕະຫຼອດຮອດພະນັກງານສະພາປະຊາຊົນແຂວງເຂົ້າຮ່ວມຢ່າງພ້ອມພຽງ.

ກອງປະຊຸມ, ຈະໄດ້ຮັບຟັງບົດສະຫຼຸບການເຄື່ອນໄຫວວຽກງານປະຈໍາປີ 2023 ແລະ ທິດທາງແຜນການປະຈໍາປີ 2024 ຂອງ ຄະນະກໍາມະການເສດຖະກິດ, ແຜນການ ແລະ ການເງິນ, ຄະນະກໍາມະການຍຸຕິທໍາ ແລະ ປກຊ-ປກສ, ຄະນະກໍາມະການວັດທະນາທໍາ-ສັງຄົມ ແລະ ບັນດາເຜົ່າ, ແລະ ຄະນະເລຂາທິການ,  ເຊິ່ງຍົກໃຫ້ເຫັນດ້ານດີ, ດ້ານອອ່ນ, ຂໍ້ຄົງຄ້າງ, ບົດຮຽນທີ່ຖອດຖອນໄດ້, ໂດຍສະເພາະການປະຕິບັດຕາມ 3 ພາລະບົດບາດ ເປັນຕົ້ນ:ດ້ານນິຕິກຳ, ດ້ານການຕົກລົງບັນຫາຂອງທ້ອງຖີ່ນ ແລະ ດ້ານການຕິດຕາມກວດກາ ຂອງບັນດາຄະນະກຳມະການ. ຕິດພັນກັບການປະຕິບັດພາລະບົດບາດ ຂອງຄະນະເລຂາທິການ ໃນການເປັນເສນາທິການດ້ານການຄົ້ນຄວ້າ-ສັງລວມເນື້ອໃນຮອບດ້ານ, ດ້ານການຄຸ້ມຄອງບໍລິຫານການເງີນ, ວຽກພັກ-ພະນັກງານ ແລະ ສ້າງສີ່ງອຳນວຍຄວາມສະດວກອື່ນໆ ໃຫ້ແກ່ສະພາປະຊາຊົນຂັ້ນແຂວງ,  ຈາກນັ້ນ, ຜູ້ແທນກອງປະຊຸມໄດ້ແລກປ່ຽນມີຄໍາຄິດ, ຄໍາເຫັນ ເພື່ອໃຫ້ເນື້ອໃນຄົບຖ້ວນ, ສົມບູນ ແລະ ຮັດກຸມ ຖຶກຕ້ອງສອດຄ່ອງກັບພາລະບົດບາດ, ສິດ ແລະ ໜ້າທີ່ຕາມກົດໝາຍກໍານົດໄວ້, ຮັບປະກັນເຮັດໃຫ້ການຈັດຕັ້ງປະຕິບັດໜ້າທີ່ວຽກງານໄດ້ຮັບຜົນສໍາເລັດ ແລະ ໄດ້ຮັບການປັບປຸງໃຫ້ເຂັ້ມແຂງໄປເທື່ອລະກ້າວ.  ນອກນັ້ນ, ກອງປະຊຸມຍັງຈະໄດ້ຮັບຟັງບົດລາຍງານການສະຫຼຸບຖອດຖອນບົດຮຽນ ໃນການກະກຽມ ແລະ ດໍາເນີນກອງປະຊຸມສະໄໝສາມັນເທື່ອ 6 ຂອງສະພາປະຊາຊົນຂັ້ນແຂວງ ຊຸດທີ II; ຮັບຟັງການລາຍງານກ່ຽວກັບແຜນການລົງເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອ 6 ຂອງສະພາແຫ່ງຊາດ  ຊຸດທີ IX ແລະ ສະພາປະຊາຊົນຂັ້ນແຂວງ ຊຸດທີ II.

ໃນໂອກາດນີ້ ທ່ານ ນາງ ມີນາພອນ ໄຊສົມພູ ຍັງໄດ້ມີຄໍາເຫັນໂອລົມ ເຊິ່ງທ່ານໄດ້ຕີລາຄາສູງຕໍ່ການຈັດຕັ້ງປະຕິບັດວຽກງານ ຂອງບັນດາຄະນະກໍາມະການ ແລະ ຄະນະເລຂາທິການ ພ້ອມທັງສະແດງຄວາມຍ້ອງຍໍຊົມເຊີຍທີ່ໄດ້ເອົາໃຈໃສ່ປະຕິບັດໜ້າທີ່ວຽກງານຕາມພາລະບົດ, ສິດ ແລະ ໜ້າທີ່ ເຊິ່ງສາມາດຍາດໄດ້ຜົນສໍາເລັດຫຼາຍໆດ້ານ ແລະ ໄດ້ເນັ້ນໃຫ້ບັນດາຄະນະກໍາມະການ ແລະ ຄະນະເລຂາທິການ ຈົ່ງໄດ້ເພີ່ມທະວີສືບຕໍ່ການພົວພັນ ປະສານງານໃຫ້ກົມກຽວກັນລະຫວ່າງບັນດາຄະນະກໍາມະການດ້ວຍກັນ, ຄະນະກໍາມະການກັບຂະແໜງການທີ່ກ່ຽວຂ້ອງຂອງແຂວງ,  ໃນການແລກປ່ຽນສະໜອງຂໍ້ມູນ, ສຸມໃສ່ຜັນຂະຫຍາຍບັນດານິຕິກໍາ, ກົດໝາຍລະບຽບການຕ່າງທີ່ໄດ້ຮັບຮອງ ແລະ ວາງອອກໃນໄລຍະຜ່ານມາ, ເພີ່ມທະວີວຽກງານສືກສາຮົບອົມການເມືອງແນວຄິດໃຫ້ແກ່ສະມາຊິກພັກ-ພະນັກງານຢ່າງຕໍ່ເນື່ອງ, ປັບປຸງແບບແຜນວິທີເຮັດວຽກ, ມີການຕິດຕາມກວດກາ, ມີການປະເມີນຜົນງານ, ສົ່ງເສີມຄວາມເປັນເຈົ້າການ ແລະ ມີຫົວຄິດປະດິດສ້າງ, ເອົາໃຈໃສ່ປົກປັກຮັກສາສໍານັກງານ, ຄຸ້ມຄອງພາຫະນະ, ອຸປະກອນຮັບໃຊ້ ແລະ ຊັບສີນສ່ວນລວມ, ຄຸ້ມຄອງການນໍາໃຊ້ງົບປະມານໃຫ້ມີປະສິທິພາບ, ໂປ່ງໃສ ແລະ ສາມາດກວດສອບໄດ້ ບົນພື້ນຖານຢືນໝັ້ນນະໂຍບາຍປະຢັດແຫ່ງຊາດ, ເພື່ອຮັບປະກັນຄຸນນະພາບເຮັດໃຫ້ການເສນາທິການແກ່ສະພາປະຊາຊົນແຂວງ, ເປັນເສນາທີ່ດີ, ການປະສານງານທີ່ດີ, ບໍລິການຮັບໃຊ້ທີ່ເກັ່ງ ແລະ ມີວິໃນ ພ້ອມທັງເປັນຊ່ຽວຊານ ແລະ ທັນສະໄໝວ່ອງໄວຂື້ນເທື່ອລະກ້າວ.

(ວິນັດ)