ຕອນເຊົ້າຂອງວັນທີ 25 ມິຖຸນາ 2024 ນີ້, ທີ່ຫ້ອງປະຊຸມສະພາປະຊາຊົນແຂວງສາລະວັນ ໄດ້ຈັດກອງປະຊຸມສະຫຼຸບການເຄື່ອນໄຫວວຽກງານຮອບດ້ານ ປະຈໍາເດືອນ ມິຖຸນາ 2024 ແລະ ວາງທິດທາງແຜນການ ປະຈໍາເດືອນ ກໍລະກົດ 2024 ຂອງສະພາປະຊາຊົນແຂວງ, ຕິດພັນກັບການປະກາດການຈັດຕັ້ງ ພາຍໃນສະພາປະຊາຊົນແຂວງ, ໂດຍການເປັນກອງປະຊຸມຂອງທ່ານ ນາງ ສູນໄຖ ໄຊຍະແສງ ກໍາມະການພັກແຂວງ ຮອງປະທານສະພາປະຊາຊົນແຂວງ (ຜູ້ປະຈໍາການ), ເຂົ້າຮ່ວມມີຮອງປະທານຄະນະກໍາມະການ, ຄະນະລຂາທິການ, ບັນດາທ່ານຫົວໜ້າ-ຮອງຫົວໜ້າຂະແໜງການ ຕະຫຼອດຮອດພະນັກງານ-ລັດຖະກອນ ເຂົ້າຮ່ວມໃນຄັ້ງນີ້;
ໃນທີ່ປະຊຸມຜູ້ເຂົ້າຮ່ວມໄດ້ຮັບຟັງການ ຜ່ານບົດສະຫຼຸບການເຄື່ອນໄຫວວຽກງານຮອບດ້ານ ປະຈໍາເດືອນ ມິຖຸນາ 2024 ແລະ ວາງທິດທາງແຜນການ ປະຈໍາເດືອນ ກໍລະກົດ 2024 ຂອງສະພາປະຊາຊົນແຂວງ ເຊິ່ງໂດຍລວມ ແມ່ນໄດ້ຈັດຕັ້ງປະຕິບັດຕາມ 3 ພາລະບົດບາດ, ສິດ ແລະ ໜ້າທີ່ ຂອງສະພາປະຊາຊົນຂັ້ນແຂວງ ໂດຍສະເພາະ ດ້ານນິຕິກຳ ໄດ້ນໍາສະເໜີທ່ານເຈົ້າແຂວງ ເພື່ອລົງລາຍເຊັນປະກາດໃຊ້ ນິຕິກໍາສໍາຄັນຂອງແຂວງ ທີ່ໄດ້ຮັບຮອງໃນກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງ ຢ່າງເປັນທາງການ ໃນນີ້, ປະກອບມີ 2 ສະບັບ ຄື: ຕົກລົງ ວ່າດ້ວຍ ການຄຸ້ມຄອງຮ້ານອາຫານ ຢູ່ແຂວງສາລະວັນ (ສ້າງໃໝ່) ແລະ ຂໍ້ຕົກລົງ ວ່າດ້ວຍ ການຄຸ້ມຄອງການບັນເທີງ ຢູ່ແຂວງສາລະວັນ (ສ້າງໃໝ່); ໄດ້ປະສານສົມທົບ ຊຸກຍູ້ອົງການປົກຄອງແຂວງ ໃນການປັບປຸງເນື້ອໃນ ຮ່າງນິຕິກໍາສໍາຄັນຂອງແຂວງ ທີ່ຈະນໍາເຂົ້າພິຈາລະນາ, ຮັບຮອງໃນກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງ ຊຸດທີ II; ດ້ານການຕົກລົງບັນຫາສຳຄັນພື້ນຖານຂອງທ້ອງຖິ່ນ ສໍາເລັດການພິຈາລະນາ ຮັບຮອງເອົາ ການສ້າງຕັ້ງ ໂຄງປະກອບກົງຈັກ ຂອງເມືອງສະໝ້ວຍ ຫ້ອງການພະລັງງານ ແລະ ບໍ່ແຮ່ເມືອງ ຕາມການສະເໜີຂອງເຈົ້າແຂວງ; ສໍາເລັດການພິຈາລະນາ ຮັບຮອງເອົາໂຄງປະກອບ ບຸກຄະລາກອນຂອງ ສພຂ ຄື: ການແຕ່ງຕັ້ງພະນັກງານ-ລັດຖະກອນ ຮັບໜ້າທີ່ໃໝ່ ເປັນຮອງເລຂາທິການ ແລະ ການແຕ່ງຕັ້ງພະນັກງານ-ລັດຖະກອນ ຮັບໜ້າທີ່ໃໝ່ ເປັນຫົວໜ້າຂະແໜງ ແລະ ຮອງຂະແໜງ ແລະ ດ້ານການຕິດຕາມ-ກວດກາ ສາມາດມີຜົນສຳເລັດຕາມຄາດໝາຍທີ່ວາງໄວ້ ທັງນີ້, ຍ້ອນຄວາມເປັນເຈົ້າການບຸກບືນເອົາໃຈໃສ່ຊີ້ນໍາ-ນໍາພາວຽກງານຮອບດ້ານ ຂອງຄະນະປະຈໍາສະພາປະຊາຊົນແຂວງ ແລະ ມີຄວາມສາມັກຄີເປັນເອກະພາບພາຍໃນຈຶ່ງເຮັດໃຫ້ວຽກງານຫຼາຍດ້ານມີຜົນສໍາເລັດ, ມີການກໍານົດແຜນການເຄື່ອນໄຫວວຽກງານຂອງຕົນ ຢ່າງເປັນລະບົບຕໍ່ເນື່ອງໃນແຕ່ລະເດືອນຢ່າງລະອຽດ, ມີລະບອບການສ່ອງແສງລາຍງານຢ່າງເປັນປົກກະຕິ, ມີການຮ່ວມມືສະໜັບສະໜູນຈາກສະພາແຫ່ງຊາດ ແລະ ອໍານາດການປົກຄອງຂັ້ນຕ່າງໆຂອງແຂວງ, ເພື່ອສ້າງສິ່ງເອື້ອອໍານວຍຄວາມສະດວກໃນການເຄື່ອນໄຫວປະຕິບັດໜ້າທີ່ວຽກງານ; ຈາກນັ້ນ, ບັນດາທ່ານທີ່ເຂົ້າຮ່ວມໄດ້ປະກອບຄໍາຄິດຄໍາເຫັນ ແລະ ລາຍງານວຽກງານເພີ່ມຕື່ມທີ່ຕິດພັນກັບບັນດາຂະແໜງການ ເພື່ອໃຫ້ເນື້ອໃນຂອງບົດສະຫຼຸບດັ່ງກ່າວ ມີຄວາມລະອຽດຄົບຖ້ວນ ແລະ ແທດເໝາະກັບການຈັດຕັ້ງປະຕິບັດຕົວຈິງ;
ຫຼັງຈາກນັ້ນ, ທ່ານ ນາງ ວິນິດໃສ ຊະນະສິດ ຕາງໜ້າຂະແໜງຈັດຕັ້ງ ແລະ ກວດກາ ໄດ້ຂຶ້ນຜ່ານ ມະຕິຕົກລົງ ຂອງຄະນະປະຈໍາສະພາປະຊາຊົນແຂວງ ສະບັບເລກທີ 132 ແລະ 133/ຄຈສຂ.ສວ ລົງວັນທີ 7/6/2024 ວ່າດ້ວຍການແຕ່ງຕັ້ງຮອງເລຂາທິການ, ຍົກຍ້າຍ ຫົວໜ້າຂະແໜງ, ແຕ່ງຕັ້ງຮອງຫົວໜ້າຂະແໜງ ພາຍໃນສະພາປະຊາຊົນແຂວງ ຢ່າງເປັນທາງການ ປະກອບມີ 4 ທ່ານ ຄື: 1)ແຕ່ງຕັ້ງທ່ານ ຄົງສະໄໝ ວົງພັນ ຫົວໜ້າຂະແໜງບໍລິຫານ-ການເງິນ ມາເປັນຮອງເລຂາທິການ ສະພາະຊາຊົນແຂວງ; 2)ຍົກຍ້າຍທ່ານ ນາງ ນົກວິທະຍາ ພັນທະວົງ ຫົວໜ້າຂະແໜງເສດຖະກິດ ເປັນຫົວໜ້າຂະແໜງບໍລິຫານ-ການເງິນ; 3)ແຕ່ງຕັ້ງທ່ານ ນາງ ວິນິດໃສ ຊະນະສິດ ວິຊາການຂະແໜງຈັດຕັ້ງ-ກວດກາ ເປັນຮອງຫົວໜ້າຂະແໜງຈັດຕັ້ງ-ກວດກາ; 4) ແຕ່ງຕັ້ງທ່ານ ວິລະກອນ ອິນດາວົງ ວິຊາການຂະແໜງບໍລິຫານ-ການເງິນ ເປັນຮອງຫົວໜ້າຂະແໜງຄົ້ນຄວ້າ,ສັງລວມ ແລະ ຂໍ້ມູນ-ຂ່າວສານ;
ຕອນທ້າຍ ທ່ານ ນາງ ສູນໄຖ ໄຊຍະແສງ ປະທານກອງປະຊຸມໄດ້ມີຄໍາເຫັນໂອລົມວ່າ: ການປະກາດການຈັດຕັ້ງໃນຄັ້ງນີ້ ເພື່ອໃຫ້ແທດເໝາະ ແລະ ສອດຄ່ອງກັບຄວາມຮຽກຮ້ອງຕ້ອງການຂອງໜ້າທີ່ວຽກງານຂອງສະພາປະຊາຊົນແຂວງ ໃຫ້ມີຄວາມໜັກແໜ້ນເຂັ້ມແຂງຂຶ້ນຕື່ມ ແລະ ທ່ານຍັງໄດ້ສະແດງຄວາມຊົມເຊີຍຕໍ່ບັນດາສະຫາຍທີ່ໄດ້ຮັບການແຕ່ງຕັ້ງ ກໍໄດ້ຜ່ານຂະບວນການຝຶກຝົນຫຼໍ່ຫຼອມ ແລະ ຜ່ານບັ້ນທົດສອບໃນການປະຕິບັດວຽກງານຕົວຈິງມາເປັນເວລາດົນພໍສົມຄວນ, ມີຄວາມບຸກບືນຈັດຕັ້ງປະຕິບັດໜ້າທີ່ວຽກງານຕາມການມອບຂອງຂັ້ນເທິງ ກໍ່ມີຜົນສຳເລັດເປັນກ້າວໆມາ ແລະ ໄດ້ຮັບຄວາມໄວ້ເນື້ອເຊື່ອໃຈຈາກຄະນະປະຈໍາສະພາປະຊາຊົນແຂວງ, ບັນດາສະຫາຍທີ່ໄດ້ຮັບການແຕ່ງຕັ້ງຄັ້ງນີ້ ຈົ່ງສືບຕໍ່ເສີມຂະຫຍາຍບົດຮຽນ, ປະສົບການ ແລະ ຄວາມຮູ້ຄວາມສາມາດຂອງຕົນ ເຂົ້າໃນການຈັດຕັ້ງປະຕິບັດໜ້າທີ່ວຽກງານ, ຕ້ອງມີການແບ່ງວຽກແບ່ງຄວາມຮັບຜິດຊອບໃຫ້ກັນຢ່າງລະອຽດ ແລະ ສຸມທຸກສະຕິປັນຍາເຂົ້າໃນການຄົ້ນຄວ້າວຽກງານທີ່ຕົນຮັບຜິດຊອບຢ່າງປະດິດສ້າງ ໃຫ້ເກີດດອກອອກຜົນ ແລະ ມີປະສິດທິຜົນສູງຂຶ້ນເລື້ອຍໆ.
ພາບ-ຂ່າວ: ດີລໍາພົນ ພົມມະຈັນ