(ສພຊ) – ຕອນບ່າຍວັນທີ 14 ສິງຫາຜ່ານມາ ທີ່ສະພາແຫ່ງຊາດ, ສະຫາຍ ສົມມາດ ພົລເສນາ ຮອງປະທານສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງສະຫາຍ ເວີ້ຍ ເຄີ້ຫຼຽງ ປະທານສະພາທີ່ປຶກສາການ ເມືອງ ນະຄອນເຊ້ຍເໝີນ ແຂວງຝູຈ້ຽນ, ສປຈີນ ພ້ອມດ້ວຍຄະນະ ໃນໂອກາດມາຢ້ຽມຢາມ ແລະ ເຮັດວຽກ ຢູ່ ສປປລາວ.

ສະຫາຍ ສົມມາດ ພົລເສນາ ໄດ້ສະແດງຄວາມຍິນດີຕ້ອນຮັບ ພ້ອມທັງຕີລາຄາສູງຕໍ່ການຢ້ຽມຢາມ ແລະ ເຮັດວຽກ ຢູ່ ສປປລາວ ຂອງສະຫາຍ ເວີ້ຍ ເຄີ້ຫຼຽງ ແລະ ຄະນະ ໃນຄັ້ງນີ້ ເຊິ່ງເປັນໂອກາດດີໃຫ້ແກ່ສອງພັກ, ສອງລັດ ລາວ ແລະ ຈີນ ໂດຍສະເພາະລະຫວ່າງແຂວງທ້ອງຖິ່ນຂອງສອງປະເທດ ທີ່ໄດ້ມີການພົບປະແລກປ່ຽນຄຳຄິດຄຳເຫັນນຳກັນ ເຊິ່ງເປັນການປະກອບສ່ວນເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ແລະ ການພົວພັນແບບຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ແລະ ການເປັນຄູ່ຮ່ວມຊາຕາກຳສັງຄົມນິຍົມ ລາວ-ຈີນ, ຈີນ-ລາວ ໃຫ້ແໜ້ນແຟ້ນຍິ່ງໆຂຶ້ນ.

ສໍາລັບການພົວພັນຮ່ວມມືລະຫວ່າງສະພາແຫ່ງຊາດລາວ ແລະ ນະຄອນເຊ້ຍເໝີນ ໃນຕໍ່ໜ້າ, ສະຫາຍ ສົມມາດ ພົລເສນາ ສະເໜີໃຫ້ສືບຕໍ່ແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງ ແລະ ຂັ້ນຕ່າງໆນໍາກັນ; ຈັດເຝິກອົບຮົມດ້ານວິຊາການຮ່ວມກັນ ທີ່ຕິດພັນກັບການແລກປ່ຽນຂໍ້ມູນ ແລະ ບົດຮຽນປະສົບການກ່ຽວກັບການຍົກລະດັບຄວາມອາດສາມາດໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ; ສືບຕໍ່ຊຸກຍູ້ໃຫ້ບັນດານັກທຸລະກິດ-ນັກລົງທຶນ, ປະຊາຊົນຈີນ ກໍຄືປະຊາຊົນແຂວງຝູຈ້ຽນ ເຂົ້າມາລົງທຶນຕາມຂະແໜງການທີ່ສອງຝ່າຍເຫັນວ່າມີທ່າແຮງນໍາກັນ ແລະ ເຂົ້າມາທ່ອງທ່ຽວ ສປປລາວ ໃຫ້ຫຼາຍຂຶ້ນ.

ສະຫາຍຮອງປະທານສະພາແຫ່ງຊາດ ຍັງແຈ້ງໃຫ້ຊາບວ່າ ສປປລາວ ໄດ້ຮັບກຽດເປັນປະທານອາຊຽນ ແລະ ສະພາແຫ່ງຊາດລາວ ເປັນປະທານ ແລະ ເປັນເຈົ້າພາບຈັດກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຄັ້ງທີ 45 ໃນກາງເດືອນຕຸລາທີ່ຈະມາເຖິງນີ້, ຫວັງວ່າຈະໄດ້ຮັບການສະໜັບສະໜູນຈາກ ສປຈີນ ເພື່ອເຮັດສໍາເລັດໜ້າທີ່ດ້ວຍຜົນສໍາເລັດອັນຈົບງາມ.

ສະຫາຍ ເວີ້ຍ ເຄີ້ຫຼຽງ ໄດ້ສະແດງຄວາມຂອບໃຈການຕ້ອນຮັບຢ່າງອົບອຸ່ນ ແລະ ເປັນເອກະພາບຕໍ່ຄໍາຄິດເຫັນຂອງສະຫາຍຮອງປະທານສະພາແຫ່ງຊາດ ຕໍ່ສາຍພົວພັນມິດຕະພາບອັນເປັນມູນເຊື້ອຕາມທິດ 4 ດີ ແລະ ການເປັນຄູ່ຮ່ວມຊາຕາກໍາສັງຄົມນິຍົມ ລະຫວ່າງສອງປະເທດ ຈີນ-ລາວ; ພ້ອມທັງແຈ້ງໃຫ້ຊາບການມາຢ້ຽມຢາມ ແລະ ເຮັດວຽກຢູ່ ສປປລາວ ຄັ້ງນີ້ ແມ່ນຕອບຮັບຕາມການເຊື້ອເຊີນຂອງຫ້ອງວ່າການປົກຄອງແຂວງຈຳປາສັກ ເຊິ່ງສະ ແດງໃຫ້ເຫັນເຖິງສາຍພົວພັນທີ່ແໜ້ນແຟ້ນລະຫວ່າງສອງພັກ, ສອງລັດ ນັບແຕ່ສູນກາງຈົນເຖິງທ້ອງຖິ່ນ.

(ອານຸສອນ ພູມມີທອນ)