(ສພຊ) – ຕອນສວາຍວັນທີ 1 ເມສາຜ່ານມາ, ສະຫາຍ ສົມມາດ ພົລເສນາ ຮອງປະທານສະພາແຫ່ງຊາດ ໄດ້ຮັບການເຂົ້າຢ້ຽມຂ່ຳນັບຂອງສະຫາຍ ນາງ ຈົງ ມິງ ຮອງປະທານສະພາປະຊາຊົນນະຄອນຊຽງໄຮ້, ສປຈີນ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປລາວ; ສະຫາຍ ສົມມາດ ພົລເສນາ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການຢ້ຽມຢາມຂອງຄະນະໃນຄັ້ງນີ້ ນອກຈາກຈະສືບຕໍ່ຮັດແໜ້ນ ແລະ ເສີມຂະຫຍາຍການພົວພັນຮ່ວມມືລະຫວ່າງສະພາປະຊາຊົນນະຄອນຫຼວງວຽງຈັນ ແລະ ສະພາປະຊາຊົນນະຄອນຊຽງໄຮ້ ກໍຄືສະພາແຫ່ງຊາດລາວ ແລະ ສະພາຜູ້ແທນປະຊາຊົນທົ່ວປະເທດຈີນ, ປະກອບສ່ວນເພີ່ມທະວີສາຍພົວພັນມິດຕະພາບອັນເປັນມູນເຊື້ອ ແລະ ຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ແລະ ການເປັນຄູ່ຮ່ວມຊາຕາກໍາສັງຄົມນິຍົມ ລາວ-ຈີນ, ຈີນ-ລາວ ຍັງເປັນການຈັດຕັ້ງຜັນຂະຫຍາຍເນື້ອໃນຈິດໃຈຂໍ້ຕົກລົງການຮ່ວມມືລະຫວ່າງສະພາແຫ່ງຊາດ ແຫ່ງ ສປປລາວ ແລະ ສະພາຜູ້ແທນປະຊາຊົນທົ່ວປະເທດ ແຫ່ງ ສປຈີນ ທີ່ໄດ້ລົງນາມໃນເດືອນກັນຍາ 2023 ໃຫ້ເຂົ້າສູ່ລວງເລິກ, ໃຫ້ນັບມື້ເປັນຮູບປະທຳ.
ສະຫາຍຮອງປະທານສະພາແຫ່ງຊາດລາວ ຍັງໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນສໍາເລັດໃຫຍ່ຫຼວງຮອບດ້ານ ທີ່ປະຊາຊົນຈີນຍາດມາໄດ້ຕະຫຼອດໄລຍະຜ່ານມາ ແລະ ຜົນສຳເລັດຂອງກອງປະຊຸມສອງສະພາ ຄັ້ງທີ 3 ຊຸດທີ XIV ທີ່ປິດລົງຢ່າງຈົບງາມໃນວັນທີ 11 ມີນາຜ່ານມາ ເຊິ່ງໄດ້ຮັບຮອງເອົາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປີ 2024 ແລະ ທິດທາງແຜນການປີ 2025 ແລະ ບັນຫາສໍາຄັນອື່ນໆ ເວົ້າລວມ, ເວົ້າສະເພາະແມ່ນການພັດທະນາເສດຖະກິດ-ສັງຄົມຂອງນະຄອນຊຽງໄຮ້ ມີການພັດທະນາຢ່າງກ້າວກະໂດດ, ທັນສະໄໝ, ຮັ່ງມີເຂັ້ມແຂງ ແລະ ຈະເລີນຮຸ່ງເຮືອງ ເປັນຕົ້ນແບບນະຄອນທີ່ດີເລີດໃນໂລກ ທັງພາຍໃນປະເທດ, ເວທີພາກພື້ນ ແລະ ສາກົນ.
ສະຫາຍ ນາງ ຈົງ ມິງ ໄດ້ສະແດງຄວາມຂອບໃຈຕໍ່ສະຫາຍຮອງປະທານສະພາແຫ່ງຊາດ ທີ່ໃຫ້ການຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ສາຍພົວພັນມິດຕະພາບ ຈີນ-ລາວ, ແຈ້ງໃຫ້ຊາບຜົນສໍາເລັດການພົບປະລະຫວ່າງນະຄອນຊຽງໄຮ້ ແລະ ນະຄອນຫຼວງວຽງຈັນ ທີ່ໄດ້ທົບທວນຕີລາຄາຄືນການພົວພັນຮ່ວມມື ພ້ອມທັງປຶກສາຫາລືການພົວພັນຮ່ວມມືລະຫວ່າງສອງນະຄອນໃນຕໍ່ໜ້າ; ນອກຈາກນັ້ນ, ຍັງແຈ້ງໃຫ້ຊາບສະພາບການທີ່ພົ້ນເດັ່ນຕ່າງໆ ຂອງ ສປຈີນ ໂດຍສະເພາະແມ່ນການພັດທະນາເສດຖະກິດ-ສັງຄົມຂອງນະຄອນຊຽງໄຮ້ ພ້ອມທັງເຊື້ອເຊີນຄະນະຜູ້ແທນສະພາແຫ່ງຊາດລາວ ໄປຢ້ຽມຢາມ ແລະ ເຮັດວຽກຢູ່ນະຄອນຊຽງໄຮ້.
(ສອນສັກ ວັນວິໄຊ)