ຮາກຖານສະຫະພັນແມ່ຍິງສະພາປະຊາຊົນແຂວງຄໍາມ່ວນ ໄດ້ຈັດພິທີປະຖະກະຖາຫວນຄືນປະຫວັດຄວາມເປັນມາຂອງວັນແມ່ຍິງສາກົນ ຄົບຮອບ 114 ປີ ( ວັນທີ 8 ມີນາ 1910 – ວັນທີ 8 ມີນາ 2024 ), ພາຍໃຕ້ຄໍາຂວັນ: “ລົງທຶນເລັ່ງໃສ່ການພັດທະນາຄວາມກ້າວໜ້າຂອງແມ່ຍິງ”,  ໃນວັນທີ 27 ກຸມພາ 2024 ທີ່ຫ້ອງປະຊຸມສະພາປະຊາຊົນແຂວງຄໍາມ່ວນ ໂດຍພາຍໃຕ້ການເປັນປະທານຂອງທ່ານ ນາງ ບັງອອນ ໄຊຍະສິດ ກຳມະການປະຈໍາພັກແຂວງ ຮອງປະທານສະພາປະຊາຊົນແຂວງຄໍາມ່ວນ, ເຂົ້າຮ່ວມມີ ທ່ານ ບົວພັນ ແສງຈັນ ກຳມະການພັກແຂວງ ຮອງປະທານສະພາປະຊາຊົນແຂວງ, ຄະນະກຳມະການສະພາປະຊາຊົນແຂວງ, ຄະນະເລຂາທິການ ແລະ ຫົວໜ້າ/ຮອງຫົວໜ້າຂະແໜງ, ຕະຫຼອດຮອດສະມາຊິກສະຫະພັນແມ່ຍິງ, ສະມາຊິກຊາວໜຸ່ມພາຍໃນສະພາປະຊາຊົນແຂວງເຂົ້າຮ່ວມຮັບຟັງຢ່າງພ້ອມພຽງ.

ໃນພິທີ ທ່ານ ນາງ ບັງອອນ ໄຊຍະສິດ ຮອງປະທານສະພາປະຊາຊົນແຂວງຄໍາມ່ວນ ໄດ້ໃຫ້ກຽດປາຖະກະຖາ ເຊິ່ງທ່ານໄດ້ເລົ່າຄືນມູນເຊື້ອອັນສະຫງ່າລ່າສີຂອງແມ່ຍິງ, ປະຫວັດຄວາມເປັນມາແຫ່ງການກໍາເນີດ ແລະ ເຕີບໃຫຍ່ຂະຫຍາຍຕົວ ຂອງອົງການຈັດຕັ້ງສະຫະພັນແມ່ຍິງ, ມູນເຊື້ອຮັກຊາດ, ມູນເຊື້ອແຫ່ງຄວາມສາມັກຄີຂອງແມ່ຍິງ ແລະ ບັນດາອົງການຈັດຕັ້ງ ສົນທິສັນຍາ, ຖະແຫຼ່ງການ ແລະ ກອງປະຊຸມຕ່າງໆກ່ຽວກັບແມ່ຍິງໃນລະດັບສາກົນ ພາກພຶ້ນ ແລະ ອາຊຽນ, ນະໂຍບາຍ ແລະ ກົນໄກສົ່ງເສີມຄວາມກ້າວໜ້າຂອງແມ່ຍິງໃນ ສປປ ລາວ, ວຽກງານພົວພັນ ແລະ ຮ່ວມມືກັບຕ່າງປະເທດ ປີ 2023. ພ້ອມນັ້ນ ທ່ານ ຍັງໄດ້ຍົກໃຫ້ເຫັນເຖິງຄວາມໝາຍ ຄວາມສໍາຄັນ ຂອງວັນແມ່ຍິງສາກົນ ວັນທີ 8 ມີນາ ເຊິ່ງແມ່ນເຫດການການເມືອງທີ່ສໍາຄັນ, ເປັນຂີດໝາຍແຫ່ງໄຊຊະນະອັນພຶ້ນຖານຂອງ ຂະບວນແມ່ຍິງສາກົນໃນການຕໍ່ສູ້ທວງເອົາສິດຜົນປະໂຫຍດອັນເປັນທໍາໃຫ້ແກ່ແມ່ຍິງຊາວຜູ້ອອກແຮງງານໃນທົ່ວໂລກ, ເປັນວັນລະນຶກເຖິງການຕໍ່ສູ້ຂອງແມ່ຍິງເພື່ອປົດປ່ອຍຕົນເອງ ແລະ ທວງໃຫ້ມີສິດສະເໝີພາບຍິງ-ຊາຍ, ທວງໃຫ້ພວກນາຍທຶນແກ້ໄຂຊີວິດການເປັນຢູ່ຂອງພວກເຂົາໃຫ້ດີຂຶ້ນ ໂດຍພາຍໃຕ້ຄໍາຂວັນທີ່ວ່າ: “ຜູ້ໜຶ່ງເຮັດວຽກມື້ລະ 8 ຊົ່ວໂມງ, ແມ່ຍິງ ແລະ ຜູ້ຊາຍເຮັດວຽກຄືກັນ ຕ້ອງໄດ້ຮັບເງິນເດືອນເທົ່າກັນ, ຕ້ອງມີລະບອບປ້ອງກັນສຸຂະພາບຂອງແມ່ຍິງ ແລະ ເດັກນ້ອຍ; ຕ້ານສົງຄາມຮຸກຮານ, ປົກປັກຮັກສາສັນຕິພາບຂອງໂລກ”.

ຕອນທ້າຍຂອງພິທິ ທ່ານ ນາງ ບັງອອນ ໄຊຍະສິດ ໄດ້ໃຫ້ທິດຊີ້ນໍາຕໍ່ຮາກຖານສະຫະພັນແມ່ຍິງສະພາປະຊາຊົນແຂວງຄໍາມ່ວນ ກ່ອນອື່ນທ່ານໄດ້ກ່າວຍ້ອງຍໍຊົມເຊີຍຜົນງານການເຄື່ອນໄຫວຂອງ ຮາກຖານສະຫະພັນແມ່ຍິງສະພາປະຊາຊົນແຂວງຄໍາມ່ວນ ໃນໄລຍະຜ່ານມາ ແລະ ໄດ້ເໜັ້ນໜັກໃຫ້ສະມາຊິກແມ່ຍິງ ທຸກສະຫາຍ ພ້ອມກັນເພີ່ມທະວີຄວາມເອົາໃຈໃສ່ໃນການເຮັດວຽກງານການເມືອງແນວຄິດ, ສຶກສາຮໍ່າຮຽນແນວທາງ, ເພີ່ມທະວີຄວາມເປັນເຈົ້າການ, ຄວາມເປັນແບບຢ່າງນໍາໜ້າ ໃນການປະຕິບັດກົດລະບຽບຂອງພັກ, ລະບຽບກົດໝາຍຂອງລັດຢ່າງເຂັ້ມງວດ, ຕັ້ງໜ້າຝຶກຝົນຫຼໍ່ຫຼອມຕົນເອງທາງດ້ານຄຸນທາດການເມືອງ ຄຸນສົມບັດ ສິນທໍາປະຕິວັດ, ເພີ່ມທະວີຄວາມສາມັກຄີພາຍໃນ-ພາຍນອກ ໃຫ້ມີຄວາມໜັກແໜ້ນ, ສຸມສະຕິປັນຍາ, ຄວາມຮູ້ຄວາມສາມາດ ເຂົ້າໃນການປະຕິບັດໜ້າທີ່ວຽກງານວິຊາສະເພາະ ທີ່ການຈັດຕັ້ງມອບໝາຍໃຫ້ປະກົດຜົນເປັນຈິງເທື່ອລະກ້າວ.

ໂດຍ: ເອື້ອ ມະໂນສິງ