(ສພຊ) ເນື່ອງໃນໂອກາດວັນແມ່ຍິງສາກົນ ຄົບຮອບ 111 ປີ ວັນທີ 12 ມີນາ 2021 ສະຫະພັນແມ່ຍິງສະພາແຫ່ງຊາດ (ສພຊ) ໄດ້ເຂົ້າອວຍພອນສະຫາຍ ນາງ ປານີ ຢາທໍ່ຕູ້ ປະທານສະພາແຫ່ງຊາດ ສພຊ ນຳໂດຍສະຫາຍ ນາງ ມະນີວັນ ເຍຍປາວເຮີ ປະທານສະຫະພັນແມ່ຍິງ ສພຊ ພ້ອມດ້ວຍຄະນະ.

ທັງນີ້, ເພື່ອເປັນການສ້າງຂະບວນການສະເຫລີມສະຫລອງໃຫ້ແກ່ວັນແມ່ຍິງສາກົນທີ່ໄດ້ໝູນວຽນມາບັນຈົບຄົບຮອບ 111 ປີ ແລະ ທັງເປັນການອວຍພອນໃຫ້ແກ່ການນຳພັກ-ລັດ ເພດຍິງ ເພື່ອເປັນຂວັນ ແລະ ກຳລັງໃຈໃຫ້ແກ່ແມ່ຍິງ ສພຊ ກໍຄືລັດຖະກອນພາຍໃນ ສພຊ.

ໃນພິທີ, ສະຫາຍ ນາງ ປານີ ຢາທໍ່ຕູ້ ໄດ້ສະແດງຄວາມຂອບອົກຂອບໃຈມາຍັງສະຫະພັນແມ່ຍິງ ສພຊ ທີ່ໄດ້ມາອວຍພອນໃນຄັ້ງນີ້ ພ້ອມທັງຮຽກຮ້ອງໃຫ້ເອື້ອຍນ້ອງແມ່ຍິງສືບຕໍ່ຜັນຂະຫຍາຍດ້ານດີທີ່ສາມາດເຮັດໄດ້ ໄປພ້ອມໆກັບການຍົກລະດັບຄວາມຮູ້ຄວາມສາມາດ, ຄວາມບຸກບືນປະຕິບັດໜ້າທີ່ວຽກງານຕ່າງ ທັງເປັນເມຍເປັນແມ່ທີ່ດີໃນຄອບຄົວ, ເປັນບຸກຄົນທີ່ດີໃນສັງຄົມ ແລະ ປະເທດຊາດ;  ມີຄຸນສົມບັດ, ມີສຸຂະພາບເຂັ້ມແຂງ ແລະ ມີຄວາມສາມັກຄີຈູບຈ້າວຫ້າວຫັນຄຽງບ່າຄຽງໄຫລ່ກັບເພດຊາຍ; ຕີຕ້ານທຸກປະກົດການຫຍໍ້ທໍ້ຕ່າງໆທີ່ເກີດຢູ່ພາຍໃນຖັນແຖວເອື້ອຍນ້ອງແມ່ຍິງ ໂດຍໃຫ້ຖືເອົາວຽກງານການສຶກສາອົບຮົມແນວຄິດ-ການເມືອງເປັນສຳຄັນ ທັງສົ່ງເສີມຫົວຄິດປະດິດສ້າງ ແລະ ສຸຂະພາບຈະເລີນພັນໃຫ້ແກ່ເອື້ອຍນ້ອງແມ່ຍິງ ເພື່ອໃຫ້ສັງຄົມມີການພັດທະນາໄປຄຽງຄູ່ກັບວັດທະນະທຳຂອງແມ່ຍິງລາວເຮົາ.

ໃນວັນທີ 11 ມີນາຜ່ານມາ, ຄະນະສະຫະພັນແມ່ຍິງ ສພຊ ຍັງໄດ້ເຂົ້າອວຍພອນສະຫາຍ ນາງ ສວນສະຫວັນ ວິຍະເກດ ເລຂາທິການສະພາແຫ່ງຊາດ ເນື່ອງໃນໂອກາດວັນແມ່ຍິງສາກົນຕື່ມອີກ.

ແຫຼ່ງຂ່າວທີ່ມາ: ສະພາແຫ່ງຊາດ