ພິທີສະຫຼຸບປະເມີນຜົນການຈັດຕັ້ງປະຕິບັດ ຂໍ້ແຂ່ງຂັນ 3 ດີ ໄລຍະ II ( 2023-2024 ) ຂອງສະຫະພັນແມ່ຍິງສະພາປະຊາຊົນແຂວງຄຳມ່ວນ ໄດ້ຈັດຂຶ້ນໃນຕອນເຊົ້າຂອງວັນທີ 28 ພະຈິກ 2024 ທີ່ສະພາປະຊາຊົນແຂວງຄຳມ່ວນ ໂດຍການເປັນປະທານ ຂອງສະຫາຍ ນາງ ປັດຕິມາ ພິມມະເສນ ປະທານສະຫະພັນແມ່ຍິງຮາກຖານສະພາປະຊາຊົນແຂວງຄໍາມ່ວນ, ເປັນກຽດເຂົ້າຮ່ວມມີສະຫາຍ ນາງ ກ້ອນແກ້ວ ຫຼວງໄຊມຸງຄຸນ ກຳມະການຄະນະປະຈໍາສະພາປະຊາຊົນຂັ້ນແຂວງ ຄະນະບໍລິຫານງານ ສະຫະພັນແມ່ຍິງແຂວງ, ສະຫາຍ ບຸນສະຫວ່າງ ສີສຸຂະລາດ ຄະນະໜ່ວຍພັກ ສະພາປະຊາຊົນຂັ້ນແຂວງ, ມີຕາງໜ້າອົງການຈັດຕັ້ງມະຫາຊົນ ແລະສະມາຊິກແມ່ຍິງພາຍໃນຮາກຖານສະພາປະຊາຊົນຂັ້ນແຂວງເຂົ້າຮ່ວມ.

    ໃນພິທີສະຫາຍ ນາງ ປັດຕິມາ ພິມມະເສນ ປະທານສະຫະພັນແມ່ຍິງຮາກຖານສະພາປະຊາຊົນແຂວງຄໍາມ່ວນ, ໄດ້ຜ່ານບົດສະຫຼຸບ ການຈັດຕັ້ງປະຕິບັດວຽກງານຂະບວນການແຂ່ງຂັນ 3 ດີ ໄລຍະ II ແລະ ທິດທາງແຜນການຕໍ່ໜ້າ, ເຊິ່ງສະຫະພັນແມ່ຍິງຮາກຖານ ສະພາປະຊາຊົນແຂວງຄຳມ່ວນ ມີສະມາຊິກທັງໝົດ 26 ສະຫາຍ, ໃນຂະບວນການຂໍ້ແຂ່ງຂັນ 3 ດີ ມີຜູ້ສະໝັກແຂ່ງຂັນທັງໝົດ 26 ສະຫາຍ, ກວມເອົາ 100 % ຂອງຈໍານວນສະມາຊິກໃນຮາກຖານທີ່ສະມັກເຂົ້າແຂ່ງຂັນ, ຈາກນັ້ນ ບັນດາສະມາຊິກທີ່ເຂົ້າຮ່ວມ ໄດ້ພ້ອມກັນຄົ້ນຄວ້າປະກອບຄຳຄິດເຫັນ ແລະ ຮັບຮອງເອົາທິດທາງແຜນການຄາດໝາຍສູ້ຊົນໃນຕໍ່ໜ້າ. ພ້ອມນີ້ ເພື່ອສືບຕໍ່ຈັດຕັ້ງປະຕິບັດຂະບວນການຂໍ້ແຂ່ງຂັນ 3 ດີ ໃນຕໍ່ໜ້າໃຫ້ມີຜົນສໍາເລັດ ສະມາຊິກແມ່ຍິງຕາງໜ້າຂະແໜງການພາຍໃນສະພາປະຊາຊົນຂັ້ນແຂວງກໍ່ໄດ້ຂື້ນຈັບມືແຂ່ງຂັນກັນ.

   ໂອກາດນີ້ ສະຫາຍ ບຸນສະຫວ່າງ ສີສຸຂະລາດ ຄະນະໜ່ວຍພັກ ສະພາປະຊາຊົນຂັ້ນແຂວງ ຍັງໄດ້ມີຄໍາເຫັນມາຍັງສະມາຊິກເອື້ອຍນ້ອງແມ່ຍິງຈົ່ງໄດ້ສືບຕໍ່ເອົາໃຈໃສ່ວຽກງານການເມືອງແນວຄິດໃຫ້ໜັກແໜ້ນ, ຖືສໍາຄັນຄວາມສາມັກຄີເປັນປຶກແຜ່ນ, ເອົາໃຈໃສ່ສູ້ຊົນບຸກບືນພັດທະນາຕົນເອງໃຫ້ເປັນແບບຢ່າງທີ່ດີ, ພັດທະນາຄວາມຮູ້-ຄວາມສາມາດຂອງຕົນໃຫ້ສູງຂື້ນ, ເປັນເຈົ້າການໃນການຮັກສາມູນເຊື້ອຂອງແມ່ຍິງລາວ, ເອົາໃຈໃສ່ສືບຕໍ່ປະຕິບັດໜ້າທີ່ວຽກງານທີ່ໄດ້ຮັບມອບໝາຍຄຽງຄູ່ກັບການຈັດຕັ້ງປະຕິບັດຂະບວນການແຂ່ງຂັນ 3 ດີໃຫ້ເປັນຂະບວນຟົດຟື້ນ ແລະ ມີຜົນສໍາເລັດ.

ໂດຍ: ເອື້ອ ມະໂນສິງ