ຕອນເຊົ້າວັນທີ7 ມີນາ 2024 ສະຫະພັນແມ່ຍິງຮາກຖານສະພາປະຊາຊົນແຂວງຫລວງນ້ຳທາ ໄດ້ຈັດພິທີປາຖະກະຖາວັນແມ່ຍິງສາກົນ ວັນທີ 8 ມີນາ 2024 ຄົບຮອບ 114 ປີ( 8 ມີນາ 1910-8 ມີນາ 2024 ) ຂຶ້ນທີ່ຫ້ອງປະຊຸມສະພາປະຊາຊົນແຂວງ ໂດຍໃຫ້ກຽດປາຖະກະຖາຂອງທ່ານ ນາງ ເກສອນ ແສງຍະວົງ ສະມາຊິກສະພາແຫ່ງຊາດປະຈຳເຂດເລືອກຕັ້ງ ປະທານຄະນະກຳມະການວັດທະນາທຳ-ສັງຄົມ ແລະ ບັນດາເຜົ່າ ຄະນະບໍລິຫານງານສະຫະພັນແມ່ຍິງແຂວງ ມີຄະນະປະທານກຳມະບານຮາກຖານ, ຄະນະໜ່ວຍຊາວໜຸ່ມ ພ້ອມດ້ວຍສະມາຊິກສະຫະພັນແມ່ຍິງຮາກຖານສະພາປະຊາຊົນແຂວງ ແລະ ໜ່ວຍສະຫະພັນແມ່ຍິງອົງການໄອຍະການປະຊາຊໍົນແຂວງ ເຂົ້າຮ່ວມ 29 ທ່ານ.
ໃນພິທີທ່ານ ນາງ ເກສອນ ແສງຍະວົງ ສະມາຊິກສະພາແຫ່ງຊາດປະຈຳເຂດເລືອກຕັ້ງ ປະທານຄະນະກຳມະການວັດທະນາທຳ-ສັງຄົມ ແລະ ບັນດາເຜົ່າ ຄະນະບໍລິຫານງານສະຫະພັນແມ່ຍິງແຂວງ ໄດ້ປາຖະກະຖາປະຫວັດຄວາມເປັນມາຂອງວັນແມ່ຍິງສາກົນ ວັນທີ 8 ມີນາ 2024 ຄົບຮອບ 114 ປີ( 8 ມີນາ 1910-8 ມີນາ 2024) ຊຶ່ງວັນແມ່ຍິງສາກົນ ວັນທີ 8 ມີນາ ແມ່ນເຫດການການເມືອງທີ່ສຳຄັນ ເປັນຂິດໝາຍແຫ່ງໄຊຊະນະອັນພື້ນຖານ ຂອງຂະບວນການແມ່ຍິງສາກົນ ໃນການຕໍ່ສູ້ທວງເອົາສິດຜົນປະໂຫຍດອັນຊອບທຳມາໃຫ້ແກ່ແມ່ຍິງຊາວຜູ້ອອກແຮງງານ ໃນທົ່ວໂລກ; ວັນແມ່ຍິງສາກົນໄດ້ກຳເນີດເກີດຂື້ນ ໃນທາມກາງສະພາບເສດຖະກິດຂອງພວກສັກດີນາ ແລະ ນາຍທືນຂະຫຍາຍຕົວ, ແມ່ຍິງຊາວຜູ້ອອກແຮງງານໃນທົ່ວໂລກລ້ວນແຕ່ເປັນຜູ້ດຸໝັ່ນ, ຂະຫຍັນພຽນໃນການຜະລິດ, ເພື່ອລ້ຽງດູຄອບຄົວ ແລະ ສັງຄົມ ແຕ່ບໍ່ໄດ້ຮັບການເອົາໃຈໃສ່ເບີ່ງແຍງຈາກສັງຄົມ, ສະນັ້ນ ມາຮອດວັນທີ 8 ມີນາ ປີ 1908 ຊາວກຳມະກອນແມ່ຍິງ ທີ່ເມືອງນິວຢອກສະຫະລັດອາເມລິກາ ໄດ້ຈັດຕັ້ງໂຮມຊຸມນຸມປະທ້ວງ ແລະ ຂັດຄ້ານຕໍ່ການໃຫ້ຄ່າແຮງງານຕ່ຳ ແລະ ສະຖານທີ່ເຮັດວຽກບໍ່ຮັບປະກັນຕໍ່ສຸຂະພາບ ແລະ ມາເຖີງປີ 1910 ຂະວນການຕໍ່ສູ້່ຂອງແມ່ຍິງ ໄດ້ແຜ່ຂະຫຍາຍກວ້າງອອກໄປສູ່ປະເທດນາຍທືນຢູ່ທະວີບເອີຣົບ ແລະ ໃນປີນີ້ເອງກອງປະຊຸມສາກົນກ່ຽວກັບບັນຫາແມ່ຍິງຄັ້ງທໍາອິດ ໄດ້ຈັດຂື້ນໂກເປນຮາບນະຄອນຫລວງຂອງປະເທດເດນມາກ ມີຜູ້ແທນ 100 ກວ່າຄົນ ຈາກ 17 ປະເທດເຂົ້າຮ່ວມ ກອງປະຊຸມດັ່ງກ່າວໄດ້ຮັບຮອງ, ຕົກລົງເອົາ ວັນທີ 8 ມີນາ ຂອງທຸກໆປີ ເປັນວັນແມ່ຍິງສາກົນ.
ຕອນທ້າຍພິທີທ່ານນາງ ເກສອນ ແສງຍະວົງ ສະມາຊິກສະພາແຫ່ງຊາດປະຈຳເຂດເລືອກຕັ້ງ ປະທານຄະນະກຳມະການວັດທະນາທຳ-ສັງຄົມ ແລະ ບັນດາເຜົ່າ ຄະນະບໍລິຫານງານສະຫະພັນແມ່ຍິງແຂວງ ຍັງໄດ້ໂອ້ລົມ ກ່ອນອື່ນທ່ານໃຫ້ຮູ້ເຖີງຄວາມສຳຄັນຂອງແມ່ຍິງ ພ້ອມທັງ ຮຽກຮ້ອງໃຫ້ແມ່ຍິງທຸກຄົນຈົ່ງຈັດຕັ້ງເຊື່ອມຊືມເອົາຄວາມເປັນມາຂອງແມ່ຍິງຢ່າງເລິກເຊິ່ງ ແລະ ໃຫ້ມີແນວຄິດອຸ່ນອຽນທຸນທ່ຽງຕໍ່ກັບເສດຖະກິດພົບຄວາມຫຍຸ້ງຍາກ, ພ້ອມທັງ ເອົາໃຈໃສ່ສ້າງເສດຖະກິດຄອບຄົວ, ປະຫຍັດມັດທະຍັດ, ພ້ອມທັງ ເອົາໃຈໃສ່ພັດທະນາຕົນເອງທຸກດ້ານໃຫ້ກາຍເປັນແມ່ຍິງທີ່ມີຄວາມພັດທະນາໃນອານາຄົດ.
ໃນວັນດຽວກັນ ສະພາປະຊາຊົນແຂວງຫລວງນ້ຳທາ ຍັງໄດ້ສ້າງຂະບວນການອອກແຮງງານລວມອານາໄມເຂດຮັບຜິດຊອບຂອງຕົນທັງພາຍໃນ ແລະ ນອກສະຖານທີ່ ເພື່ອຕ້ອນຮັບວັນແມ່ຍິງສາກົນ ວັນທີ 8 ມີນາ 2024 ຄົບຮອບ 114 ປີ( 8 ມີນາ 1910-8 ມີນາ 2024 ) ເພື່ອຜູກແໜ້ນຄວາມສາມັກຄີ ແລະ ຄວາມສະອາດງາມຕາ
ໂດຍ ນາງວັນນີ ແຝງບົວວັນ