(ສພຊ)ວັນທີ 30 ມີນາ 2018 ທີ່ຫ້ອງປະຊຸມຄະນະເລຂາທິການສະພາແຫ່ງຊາດ (ຫລັກ 6) ນະ ຄອນຫລວງວຽງຈັນ ໄດ້ຈັດກອງປະຊຸມໃຫຍ່ຂອງສະຫະພັນແມ່ຍິງສະພາແຫ່ງຊາດ ໂດຍການເປັນປະທານຂອງທ່ານ ນາງ ສວນສະຫວັນ ວິຍະເກດ ຄະນະບໍລິຫານງານສະຫະພັນແມ່ຍິງລາວ, ປະທານສະຫະພັນແມ່ງຍິງສະພາແຫ່ງຊາດ; ເຂົ້າຮ່ວມມີທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ, ທ່ານ ນາງ ອິນລາວັນ ແກ້ວບຸນພັນ ປະທານຄະນະບໍລິຫານງານສູນກາງສະຫະພັນແມ່ຍິງລາວ, ທ່ານ ນາງ ສີໃສ ລືເດດມູນສອນ ຮອງປະທານສະພາແຫ່ງຊາດ, ບັນດາທ່ານປະທານ-ຮອງປະທານກໍາມາທິການ, ຕາງໜ້າກົມ ແລະ ອົງການຈັດຕັ້ງມະຫາຊົນ ພ້ອມດ້ວຍເອື້ອຍນ້ອງແມ່ຍິງທັງໝົດພາຍໃນສະພາແຫ່ງຊາດ.
ກອງປະຊຸມຄັ້ງນີ້ ເປັນການສະຫລຸບຕີລາຄາການເຄື່ອນໄຫວວຽກງານ ໃນໄລຍະ 5 ປີຜ່ານ ມາ ແລະ ກໍານົດທິດທາງແຜນການເຄື່ອນໄຫວວຽກງານໃນຕໍ່ໜ້າ; ເປີດບັ້ນດໍາເນີນຊີວິດການເມືອງ, ປັບປຸງແຜນການຊີ້ນໍາ-ນໍາພາ ແລະ ແບບແຜນການເຄື່ອນໄຫວຂອງ ສະຫະພັນແມ່ຍິງສະພາແຫ່ງຊາດ ເພື່ອສໍາຫລວດກວດກາ, ຄັດເລືອກຕົວເດັ່ນ ແລະ ເພື່ອເລືອກຕັ້ງ ເອົາຄະນະສະຫະພັນແມ່ຍິງຊຸດໃໝ່ ແລະ ປັບປຸງກົງຈັກການຈັດຕັ້ງຂອງໜ່ວຍໃຫ້ສອດຄ່ອງກັບສະພາບຕົວຈິງຂອງສະຫະພັນແມ່ຍິງສະພາແຫ່ງຊາດໃນເງື່ອນໄຂປັດຈຸບັນ.
ໃນກອງປະຊຸມ ທ່ານ ນາງ ປານຄຳ ຂະຫຍອງເອກ ຮອງປະທານສະຫະພັນແມ່ຍິງສະພາ ແຫ່ງຊາດ ໄດ້ຍົກໃຫ້ເຫັນການຈັດຕັ້ງປະຕິບັດວຽກງານຂອງເອື້ອຍນ້ອງສະຫະພັນແມ່ຍິງສະພາແຫ່ງຊາດ ຕະຫລອດໄລຍະ 5 ປີຜ່ານມາ. ອົງການຈັດຕັ້ງສະຫະພັນແມ່ຍິງສະພາແຫ່ງຊາດ ແມ່ນ ອົງການທີ່ມີຄວາມສຳຄັນ ເຊິ່ງຍາມໃດກໍໄດ້ເອົາໃຈໃສ່ປັບປຸງກົງຈັກການຈັດຕັ້ງໃຫ້ມີຄວາມໜັກ ແໜ້ນ, ເຂັ້ມແຂງ, ເຄື່ອນໄຫວຕາມກົດລະບຽບ ແລະ ກົດໝາຍສະຫະພັນແມ່ຍິງລາວ ກ້າວເຂົ້າສູ່ຄຸນນະພາບໃໝ່. ນອກຈາກການຈັດຕັ້ງປະຕິບັດໜ້າທີ່ທາງດ້ານວິຊາສະເພາະຂອງຕົນແລ້ວ ເອື້ອຍນ້ອງແມ່ຍິງສະພາແຫ່ງຊາດ ຍັງໄດ້ໃຊ້ເວລານອກໂມງລັດຖະການ ເພີ່ມພູນຜະລິດຜົນປູກຝັງ-ລ້ຽງ ສັດ ແລະ ອື່ນໆ ເພື່ອສ້າງລາຍຮັບແກ່ຄອບຄົວ.
ກອງປະຊຸມໃຫຍ່ສະຫະພັນແມ່ຍິງສະພາແຫ່ງຊາດ ຊຸດທີ IV ເຊິ່ງມີແມ່ຍິງ 3 ດີ ປະເພດ I ຈໍານວນ 43 ທ່ານ, ປະເພດ II ມີ 23 ທ່ານ ແລະ ໜ່ວຍດີເດັ່ນ 6 ໜ່ວຍ. ໄດ້ຄັດເລືອກບຸກຄົນ ດີເດັ່ນໃນການເຄື່ອນໄຫວວຽກງານສະຫະພັນແມ່ຍິງສະພາແຫ່ງຊາດ ແຕ່ປີ 2012-2017 ເຊິ່ງມີ ແມ່ຍິງດີເດັ່ນ ປະເພດ I ຈໍານວນ 35 ທ່ານ, ປະເພດ II ມີ 19 ທ່ານ ແລະ ປະເພດ III ມີ 18 ທ່ານ.
ກອງປະຊຸມໃຫຍ່ໄດ້ດໍາເນີນການປ່ອນບັດເລືອກຕັ້ງ ແລະ ຮັບຮອງເອົາຄະນະສະຫະພັນ ແມ່ຍິງສະພາແຫ່ງຊາດຊຸດທີ V ຈໍານວນ 7 ທ່ານ ເພື່ອສືບຕໍ່ນໍາພາການຈັດຕັ້ງປະຕິບັດມະຕິກອງ ປະຊຸມໃຫຍ່ສະຫະພັນແມ່ຍິງສະພາແຫ່ງຊາດຊຸດທີ V, ຈັດຕັ້ງຜັນຂະຫຍາຍມະຕິກອງຊຸມໃຫຍ່ຄັ້ງ ທີ X ຂອງພັກ, ມະຕິກອງປະຊຸມໃຫຍ່ຄັ້ງທີ III ຂອງອົງຄະນະພັກສະພາແຫ່ງຊາດ, ແຜນພັດທະ ນາເສດຖະກິດ-ສັງຄົມແຫ່ງຊາດຄັ້ງທີ VIII ຂອງລັດ ໃຫ້ມີຜົນສໍາເລັດໃຫມ່ໃຫຍ່ຫລວງກວ່າເກົ່າ.
ກອງປະຊຸມຄັ້ງປະຖົມມະລືກ ຂອງຄະນະສະຫະພັນແມ່ຍິງສະພາແຫ່ງຊາດຊຸດທີ V ໄດ້ເປັນເອກະສັນຢ່າງສົມບູນ ເລືອກຕັ້ງເອົາ: ທ່ານ ນາງ ມະນີວັນ ເຢຍປາວເຮີ ເປັນປະທານສະຫະພັນແມ່ ຍິງສະພາແຫ່ງຊາດ, ທ່ານ ນາງ ທະວີໄສ ພະສະຖານ ເປັນຮອງປະທານສະຫະພັນແມ່ຍິງສະພາແຫ່ງຊາດ ທັງເປັນປະທານຄະນະກວດກາ ສະຫະພັນແມ່ຍິງສະພາແຫ່ງຊາດ, ທ່ານ ນາງ ດາວເພັດ ສີຫາວົງ ເປັນຮອງປະທານສະຫະພັນແມ່ຍິງສະພາແຫ່ງຊາດ, ທ່ານ ນາງ ກິ່ງນະຄອນ ຈັນທະກຸມມານ, ທ່ານ ນາງ ຄໍາຫລ້າ ສິດທະຈອນ, ທ່ານ ນາງ ແສງທະວີ ໄຊຍະວຶດ, ແລະ ທ່ານ ນາງ ອຸດນາລີ ໄຊຍະສັກ ເປັນຄະນະສະຫະພັນແມ່ຍິງສະພາແຫ່ງຊາດ.
(ທຸງໄຊ ວິໄລພອນ)