ໃນລະຫວ່າງວັນທີ 23-25 ມັງກອນ 2024 ສະມາຊິສະພາແຫ່ງຊາດປະຈໍາເຂດເລືອກຕັ້ງທີ 11 ແຂວງບໍລິຄໍາໄຊ  ແລະ ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງຄໍາເກີດ, ການນໍາຂອງເມືອງ,  ແລະ ວິຊາການຊ່ວຍວຽກຈໍານວນໜຶ່ງ ໄດ້ລົງພົບປະ ປະຊາຊົນ ແລະ ເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ  IX ແລະ ຂອງສະພາປະຊາຊົນແຂວງຊຸດທີ II ໃຫ້ປະຊາຊົນ ໄດ້ຮັບຮູ້ ບັນດາເນື້ອໃນສໍາຄັນຕ່າງໆ ທີ່່ລັດຖະບານສະເໜີຕໍ່ກອງປະຊຸມສະພາ ແລະ ທັງເປັນການຢ້ຽມຢາມ-ຖາມຂ່າວຟັງຄໍາຄິດເຫັນ, ຄໍາສະເໜີຂອງພໍ່ແມ່ປະຊາຊົນ ຢູ່ 6 ບ້ານຄື: ບ້ານນາກະດົກ, ບ້ານນາໄຮ, ບ້ານນໍ້າພາວ, ບ້ານວັງກໍ່, ບ້ານປຸ່ງປ່າຕາວ, ບ້ານກວນຈັນ ເມືອງຄໍາເກີດ ໂດຍການໃຫ້ກຽດນໍາພາໂດຍ ທ່ານ ນາງ ປິ່ງຄໍາ ລາຊິສິມມາ  ກຳມະການສູນກາງພັກ, ເລຂາທິການສະພາແຫ່ງຊາດ, ສະມາຊິສະພາແຫ່ງຊາດປະຈໍາເຂດເລືອກຕັ້ງທີ 11  ພ້ອມດ້ວຍສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງຄໍາເກີດ, ພະນັກງານກໍ່ສ້າງຮາກຖານ ພະແນກການທີ່ກ່ຽວຂ້ອງ ຕະຫຼອດຮອດພໍ່ແມ່ປະຊາຊົນຜູ້ມີສິດເລືອກຕັ້ງພາຍໃນບ້ານເຂົ້າຮ່ວມຢ່າງພ້ອມພຽງ.

ການລົງເຄື່ອນໄຫວເຜີຍແຜ່ໃນຄັ້ງນີ້ ໄດ້ຮັບຟັງການລາຍງານໂດຍຫຍໍ້ກ່ຽວກັບສະພາບຈຸດພິເສດທີ່ຕັ້ງຂອງບ້ານ, ການຊີ້ນໍາໆພາຂອງອົງການປົກຄອງບ້ານ ແລະ ການພັດທະນາເສດຖະກິດ-ສັງຄົມ ຂອງບ້ານໃນໄລຍະຜ່ານມາ, ພ້ອມຄຳສະເໜີຫຼາຍບັນຫາເປັນຕົ້ນແມ່ນ: ບັນຫາທີ່ດິນ, ບັນຫາລາຄາສິນຄ້າເພີ່ມຂຶ້ນສູງ ແລະ ອື່ນໆ ຕໍ່ຄະນະ ສສຊ ແລະ ສສຂ ເພື່ອຂໍທິດຊີ້ນໍາ ແລະ ຊຸກຍູ້ພາກສ່ວນທີ່ກ່ຽວຂ້ອງແກ້ໄຂຊ່ວຍຕາມຄວາມເໝາະສົມ ຈາກທ່ານ ນາຍບ້ານແຕ່ລະບ້ານ; ຈາກນັ້ນ, ສສຊ ແລະ ສສຂ ກໍໄດ້ຜັດປ່ຽນກັນຂຶ້ນເຜີຍແຜ່ຜົນສໍາເລັດຂອງກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ IX ແລະ ສະພາປະຊາຊົນແຂວງ ຊຸດທີ II ໂດຍໄດ້ຍົກໃຫ້ເຫັນບັນຫາສໍາຄັນຕ່າງໆທີ່ໄດ້ຄົ້ນຄວ້າ, ພິຈາລະນາ ແລະ ຮັບຮອງເອົາໃນກອງປະຊຸມ ແລະ ບັນດາເນື້ອໃນຕ່າງໆທີ່  ສສຊ ແລະ ສສຂ ໄດ້ສະເໜີຕໍ່ກອງປະຊຸມ ໂດຍສະເພາະບັນດາປະກົດການຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມ ກໍຄືແຂວງ ບໍລິຄໍາໄຊ, ພ້ອມກັນນັ້ນ ໄດ້ຮັບຟັງຄຳສະເໜີຈາກພໍ່ແມ່ປະຊາຊົນ ແລະ ໄດ້ຮັບເອົາຄໍາຄິດ-ຄໍາເຫັນ ຄໍາສະເໜີຂັດຂ້ອງໝອງໃຈຂອງປະຊາຊົນ ເພື່ອນໍາໄປຄົ້ນຄວ້າ ພິຈາລະນາ ແລະ ສະເໜີຕໍ່ອົງການປົກຄອງແຂວງ-ເມືອງ ເພື່ອແກ້ໄຂ ແລະ ອະທິບາຍ-ຊີ້ແຈງ ໃຫ້ປະຊາຊົນຮັບຊາບ.

ຂ່າວ – ພາບ : ໂສລະຢ໋າ