ທ້າຍເດືອນ ກຸມພາ 2024 ທ່ານ ປອ ກໍລະກັນ ພົມມະວົງ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 6 ແຂວງຫຼວງພະບາງ ໄດ້ໄປລົງເຄື່ອນໄຫວພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສຳເລັດກອງປະຊຸມສະໄຫມສາມັນເທື່ອ ທີ 6 ຂອງສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ຢູ່ ບ້ານໂພນໄຊ, ບ້ານຫ້ວຍນາ, ບ້ານຫ້ວຍທອງ, ບ້ານຫ້ວຍໂງ່ນ ແລະ ບ້ານຈອມຍິງ ເມືອງງອຍ ແຂວງຫຼວງພະບາງ, ຈຸດປະສົງຂອງການມາເຮັດວຽກໃນຄັ້ງນີ້ ແມ່ນເພື່ອເຜີຍແຜ່ຜົນສໍາເລັດກອງປະຊຸມໃຫ້ພະນັກງານ–ລັດຖະກອນ, ທະຫານ, ຕໍາຫຼວດ ແລະ ປະຊາຊົນລາວ ບັນດາເຜົ່າໃຫ້ໄດ້ຮັບຮູ້ ເຂົ້າໃຈ ແລະ ນໍາໄປຈັດຕັ້ງປະຕິບັດເຂົ້າສູ່ວຽກງານຕົວຈິງຢູ່ທ້ອງຖິ່ນຮາກຖານເມືອງ ແລະ ບ້ານ.

ໂອກາດນີ້ຍັງໄດ້ຮັບຟັງການລາຍງານສະພາບການຈັດຕັ້ງແຜນພັດທະນາເສດຖະກິດ-ສັງຄົມຂອງແຕ່ລະບ້ານ ແລະ ຮັບຟັງຄໍາຄິດຄໍາເຫັນ, ຄໍາສະເໜີຂອງປະຊາຊົນພາຍໃນບ້ານ, ເຊິ່ງສະພາບເສດຖະກິດຂອງບ້ານ ຍັງຖືເອົາອາຊີບປູກຝັງ ແລະ ລ້ຽງສັດເປັນອາຊີບຕົ້ນຕໍ,

ໃນຕອນທ້າຍ ທ່ານ ປອ ກໍລະກັນ ພົມມະວົງ ໄດ້ໃຫ້ທິດຊີ້ນໍາ ແລະ ຮຽກຮ້ອງໃຫ້ການປົກຄອງບ້ານ ແລະ ປະຊາຊົນບັນດາເຜົ່າ, ມີຄວາມສາມັກຄີຊ່ວຍເຫຼືອເຊິ່ງກັນ ແລະ ກັນ, ເຊື່ອໝັ້ນຕໍ່ການນໍາພາຂອງພັກ-ລັດ, ເປັນເຈົ້າການໃນການສຶກສາອົບຮົມລູກຫຼານໃຫ້ເປັນພົນລະເມືອງດີ, ເອົາໃຈໃສ່ຜະລິດສິນຄ້າກະສິກໍາທີ່ເປັນທ່າແຮງຂອງບ້ານ ທີ່ເມືອງສົ່ງເສີມ  ແລະ ມີຕະຫຼາດຮອງຮັບ. ສໍາລັບຄໍາສະເໜີຕ່າງໆ ເຫັນວ່າມີຄວາມສໍາຄັນ ແລະ ຈໍາເປັນແທ້ ສະນັ້ນບ້ານຈະຕ້ອງເປັນເຈົ້າການຄົ້ນຄ້ວາ ແລະ ເລືອກບັນຫາທີ່ເຫັນວ່າມີຄວາມຈໍາເປັນທີ່ສຸດ ເພື່ອສະເໜີເຖິງເມືອງ ແລະ ຂະແໜງການກ່ຽວຂ້ອງ ເພື່ອລົງຊຸກຍູ້ ແລະ ຊອກຫາວິທີແກ້ໄຂ.

ພາບ ແລະ ຂ່າວໂດຍ: ຄຳດີ ພັນທະລີ

​