ໃນວັນທີ 20-21 ສິງຫາ 2024 ນີ້, ສະມາຊິກສະ ພາແຫ່ງຊາດ ປະຈໍາເຂດເລືອກຕັ້ງ ທີ 7 ແຂວງໄຊຍະບູລີ ເຊິ່ງນຳໂດຍ ທ່ານ ບຸນລ້ວນ ຊົມສີຫາປັນຍາ ຮອງປະທານສະພາປະຊາຊົນແຂວງ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ທີ7; ທ່ານ ສົມມະນາ ປິ່ນທິບ ສະມາຊິກສະພາແຫ່ງຊາດ ປະຈຳເຂດເລືອກຕັ້ງ ທີ7; ພ້ອມດ້ວຍຄະນະ;
ໄດ້ນຳເອົາເນື້ອໃນຈິດໃຈກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ແລະ ສະພາປະ ຊາຊົນແຂວງ ຊຸດທີ II ລົງເຜີຍແຜ່ເຊື່ອມຊຶມໃຫ້ແກ່ຜູ້ມີສິດເລືອກຕັ້ງ ຢູ່ເມືອງຊຽງຮ່ອນ ແລະ ເມືອງເງິນ ລວມມີ 6 ຈຸດ ໃນນັ້ນ, ກວມເອົາ 2 ຈຸດສໍານັກງານ-ອົງການອອ້ມຂ້າງເມືອງ ແລະ 4 ບ້ານ.
ເປັນກຽດເຂົ້າ ຮ່ວມຮັບຟັງມີບັນດາ ຄະນະສະມາຊິກສະພາປະຊາຊົນແຂວງປະຈໍາເມືອງ, ຄະ ນະນໍາຂອງເມືອງ, ພະນັກງານອາວຸໂສບໍານານ; ຄະນະ ພັກ, ຄະນະບັນຊາ; ພະນັກງານຫຼັກແຫຼ່ງຂອງເມືອງ ຕະ ຫຼອດຮອດອຳນາການປົກຄອງບ້ານ ແລະ ພໍ່ແມ່ປະຊາຊົນ ເຂົ້າຮ່ວມຮັບຟັງ.
ໃນການລົງເຄື່ອນໄຫວຄັ້ງນີ້, ໄດ້ຮັບຟັງລາຍງານການຈັດຕັ້ງປະຕິບັດວຽກງານທີ່ພົ້ນເດັ່ນຂອງບັນດາເມືອງ, ບ້ານ ໂດຍສັງເຂບ; ຈາກນັ້ນ, ບັນດາທ່ານສະມາຊິກສະພາແຫ່ງຊາດໄດ້ເຜີຍແຜ່ຜົນສຳເລັດຂອງກອງປະຊຸມສະໄໝສາມັນ ເທື່ອທີ7 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II
ໂດຍໄດ້ຍົກໃຫ້ເຫັນເຖິງເນື້ອໃນມະຕິກອງປະຊຸມສະພາແຫ່ງຊາດ ແລະ ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາ ຜົນການປະເມີນຄວາມໄວ້ວາງໃຈ ໃນການປະຕິບັດໜ້າທີ່ ຂອງບຸກຄະລາກອນ ທີ່ສະພາປະຊາຊົນແຂວງ ເລືອກຕັ້ງ ແລະ ຮັບຮອງເອົາການແຕ່ງຕັ້ງ. ນອກນັ້ນ, ຍັງໄດ້ຍົກໃຫ້ເຫັນສະພາບການຕ່າງໆ ຂອງໂລກ ແລະ ພາກພື້ນ ເວົ້າລວມ, ເວົ້າສະເພາະກໍ່ຄືສະພາບການທີ່ພວມເກີດຂື້ນຢູ່ພາຍໃນປະເທດ.
ທັ້ງນີ້, ກໍເພື່ອເປັນການຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ບັນດາເນື້ອໃນສໍາຄັນຕ່າງໆ ທີ່່ກອງປະຊຸມສະພາແຫ່ງຊາດ ແລະ ກອງປະຊຸມສະພາປະຊາຊົນແຂວງ ໄດ້ຄົ້ນຄວ້າ, ພິຈາລະນາ ແລະ ຮັບຮອງເອົາ ໃຫ້ຖັນແຖວພະນັກງານ-ລັດຖະກອນ, ທະຫານ, ຕຳຫຼວດ ແລະ ປະຊາຊົນບັນດາເຜົ່າ ຮັບຮູ້ຢ່າງກວ້າງຂວາງ, ທົ່ວເຖີງ ແລະ ທັງເປັນການຫັນລົງຮາກຖານ, ເກັບກຳຄໍາຄິດຄໍາເຫັນ, ຄໍາສະເໜີຕ່າງໆ ຂອງຜູ້ມີສິດເລືອກຕັ້ງ ຕໍ່ການສ້າງສາພັດທະນາປະເທດຊາດ.
ໂດຍ:ອິນທີ ຂຽວສີຟ້າ