ໃນວັນທີ 20 ກັນຍາ 2023, ນໍາໂດຍ ທ່ານ ຄໍາປານ ເຄນວົງສັກ ຮອງປະທານຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13 ພ້ອມດ້ວຍຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງພະລານໄຊ ໄດ້ລົງພົບປະກັບຜູ້ມີສິດເລືອກຕັ້ງ ແລະ ເຜີຍແຜ່ຜົນສໍາເລັດຂອງກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ຢູ່ບ້ານໂພນຕານ ແລະ ສະໂມສອນຫ້ອງວ່າການ ເມືອງພະລານໄຊ ໂດຍມີຜູ້ເຂົ້າຮ່ວມທັງໝົດ 183ຄົນ, ຍິງ 63 ຄົນ.

ໃນການພົບປະດັ່ງກ່າວ ຕາງໜ້າການນໍາເມືອງພະລານໄຊ ກໍ່ໄດ້ກ່າວຕ້ອນຮັບ ພ້ອມທັງລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງເມືອງ; ຈາກນັ້ນ ສສຊ, ສສຂ ກໍ່ໄດ້ເຜີຍແຜ່ຜົນສໍາເລັດຂອງກອງປະຊຸມສະໄໝສາມັນ ເທື່ອທີ 5 ພ້ອມທັງໄດ້ໂອ້ລົມຕໍ່ຜູ້ມີສິດເລືອກຕັ້ງວ່າ ຕ້ອງພັດທະນາຄອບຄົວ ສາມາດສ້າງລາຍຮັບກຸ້ມຕົນເອງ, ຜະລິດຂາຍເປັນສິນຄ້າ ເພື່ອທົດແທນການນໍາເຂົ້າ ແລະ ເອົາໃຈໃສ່ນໍາພາສິດສອນລູກ-ຫຼານໃຫ້ໄດ້ເຂົ້າໂຮງຮຽນ;

ຕໍ່ມາບັນດາຜູ້ມີສິດເລືອກຕັ້ງກໍ່ໄດ້ມີຄໍາສະເໜີເປັນຕົ້ນ: ລົດບັນທຸກແລ່ນໄວເກີນຂອບເຂດພາຍໃນເທສະບານເມືອງພະລານໄຊ ມີຄວາມສ່ຽງເຮັດໃຫ້ເກີດອຸປະຕິເຫດໄດ້, ການກໍ່ສ້າງເສັ້ນທາງບໍ່ໄດ້ຮັບມາດຕະຖານ ເຮັດໃຫ້ເສັ້ນທາງເປ້ເພໄວ ຄໍາສະເໜີເຫລົ່ານີ້ຄະນະຜູ້ແທນກໍ່ໄດ້ຮັບເອົາເພື່ອມາຊຸກຍູ້ໃຫ້ພາກສ່ວນທີ່ກ່ຽວຂ້ອງແກ້ໄຂ.

ໃນການເຄື່ອນໄຫວດັ່ງກ່າວຄະນະຜູ້ແທນກໍ່ໄດ້ໄປຢ້ຽມຢາມສະຖານທີ່ກັກຂັງ ຢູ່ກອງບັນຊາການ ປກສ ເມືອງ ໃນເວລາດຽວກັນນັ້ນ ທ່ານ ຄໍາປານ ເຄນວົງສັກ ກໍ່ໄດ້ມອບເງິນສົດຈໍານວນໜຶ່ງໃຫ້ຫົວໜ້າກອງບັນຊາການ ປກສ ເມືອງພະລານໄຊ ເພື່ອປະກອບຊື້ວັດສະດຸໃນການກໍ່ສ້າງຕໍ່ເຕີມຫ້ອງກັກຂັງນັກໂທດ ອີກດ້ວຍ. (ພາບຈາກນັກຂ່າວເມືອງພະລານໄຊ ແລະ ຂ່າວໂດຍ: ສະຫວັດດີ ສີບຸນເຮືອງ)