ສະມາຊິກສະພາແຫ່ງຊາດ ລົງພົບປະປະຊາຊົນ ຢູ່ແຂວງສາລະວັນ

ສ.ຫ. 29, 2023 | ເຂດ 14 ສາລະວັນ

ລະຫວ່າງວັນທີ 22-25 ສິງຫາ 2023, ທ່ານ ສຸບັນ ສະວະບຸດ ຄະນະປະຈຳສະພາແຫ່ງຊາດ, ປະທານກຳມາທິການວຽກງານສະມາຊິກສະພາແຫ່ງຊາດ, ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 14 ແຂວງສາລະວັນ ໄດ້ລົງເຄື່ອນໄຫວພົບປະ ປະຊາຊົນບັນດາເຜົ່າຢູ່ເມືອງຄົງເຊໂດນ, ເມືອງລະຄອນເພັງ, ເມືອງວາປີ ແລະ ເມືອງເລົ່າງາມ, ແຂວງສາລະວັນ ໂດຍມີທ່ານ ຂັນໄຊ ລັດຖະເຮົ້າ ຄະນະປະຈຳພັກແຂວງ, ຮອງປະທານຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ ທັງເປັນຮອງປະທານສະພາປະຊາຊົນແຂວງ ແລະ ບັນດາທ່ານ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງດັ່ງກ່າວ ເຂົ້າຮ່ວມ.

ການລົງພົບປະຜູ້ມີສິດເລືອກຕັ້ງຄັ້ງນີ້ ແມ່ນປະຕິບັດຕາມສິດ ແລະ ໜ້າທີ່ຂອງສະມາຊິກສະພາແຫ່ງຊາດ ທີ່ໄດ້ກຳນົດໄວ້ໃນກົດໝາຍວ່າດ້ວຍສະພາແຫ່ງຊາດ ໃນຖານະທີ່ເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າ. ຈຸດປະສົງ ເພື່ອລາຍງານການເຄື່ອນໄຫວປະຕິບັດສິດ ແລະ ໜ້າທີ່ ໄລຍະຜ່ານມາ ຂອງສະມາຊິກສະພາແຫ່ງຊາດ ຕໍ່ຜູ້ມີສິດເລືອກຕັ້ງ ໂດຍສະເພາະ ແມ່ນລາຍງານຜົນສຳເລັດກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ຢ້ຽມຢາມຖາມຂ່າວ, ຮັບຟັງຄໍາຄິດຄໍາເຫັນ ຄວາມມຸ້ງມາດປາຖະໜາຂອງປະຊາຊົນລາວບັນດາເຜົ່າ.

ການລົງພົບປະ ແມ່ນໄດ້ເຄື່ອນໄຫວຢູ່ 7 ຈຸດ ຄື: ບ້ານແກັງຫວດ-ນາທຶນ ເມືອງຄົງເຊໂດນ, ດ່ານທ້ອງຖິ່ນປາກຕະພານ ແລະ ຫ້ອງວ່າການເມືອງລະຄອນເພັງ, ຫ້ອງວ່າການເມືອງວາປີ, ເຮັດວຽກກັບຄະນະທີ່ປຶກສາ ແລະ ຄະນະວິຊາການໂຄງການຊົນລະປະທານບ້ານດົງມອນ ເມືອງວາປີ, ບ້ານດົງ ແລະ ຫ້ອງວ່າການເມືອງເລົ່າງາມ. ມີຄະນະພັກຮາກຖານກຸ່ມບ້ານ, ອົງການຈັດຕັ້ງບ້ານ, ພະນັກງານອາວຸໂສບຳນານ, ເຖົ້າແກ່ແນວໂຮມ, ພໍ່ແມ່ປະຊາຊົນບັນດາເຜົ່າ ເຂົ້າຮ່ວມ ຈໍານວນ 485 ຄົນ, ຍິງ 154 ຄົນ. ຜ່ານການລົງພົບປະໃນແຕ່ລະຈຸດ ໄດ້ຮັບຟັງລາຍງານສະພາບການພັດທະນາເສດຖະກິດ-ສັງຄົມພາຍໃນບ້ານ, ເມືອງ. ພ້ອມກັນນັ້ນ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ກໍໄດ້ສະເໜີຈຸດປະສົງການລົງພົບປະປະຊາຊົນ ແລະ ກໍເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ໃຫ້ພໍ່ແມ່ປະຊາຊົນໄດ້ຮັບຮູ້ ແລະ ເຂົ້າໃຈ. ຈາກນັ້ນ ກໍໄດ້ເປີດໂອກາດໃຫ້ພໍ່ແມ່ປະຊາຊົນ ໄດ້ມີຄຳເຫັນ ແລະ ຂໍ້ສະເໜີຕ່າງໆ ຊຶ່ງຂໍ້ສະເໜີດັ່ງກ່າວແມ່ນຕິດພັນກັບຊີວິດການເປັນຢູ່ຂອງເຂົາເຈົ້າ ເປັນຕົ້ນ ສ້າງເສັ້ນທາງ, ບັນຫາຄ່າຄອງຊີບແພງ, ນະໂຍບາຍຕໍ່ຜູ້ຜະລິດ ແລະ ອື່ນໆ.

ຜ່ານການສະເໜີຂອງປະຊາຊົນ, ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ກໍຄືພາກສ່ວນກ່ຽວຂ້ອງຈາກພະແນກການຕ່າງໆ ທີ່ເຂົ້າຮ່ວມໃນຄະນະ ກໍໄດ້ໃຫ້ການຊີ້ແຈງ, ອະທິບາຍໄປຕາມແຜນການຂອງລັດຖະບານ ກໍຄືຂອງແຂວງ ແລະເມືອງ ຕິດພັນກັບເນື້ອໃນກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງສາລະວັນ ຊຸດທີ II ຊຶ່ງຍົກໃຫ້ເຫັນຂໍ້ສະດວກ, ຂໍ້ຫຍຸ້ງຍາກ, ສິ່ງທ້າທາຍໃນການພັດທະນາເສດຖະກິດ-ສັງຄົມ ຂອງປະເທດຊາດ ໂດຍສະເພາະ ຍົກໃຫ້ເຫັນນະໂຍບາຍ, ມາດຕະການທີ່ລັດຖະບານ ກໍຄືທ້ອງຖິ່ນວາງອອກ ເພື່ອສູ້ຊົນຈັດຕັ້ງປະຕິບັດບັນລຸຕາມແຜນການທີ່ວາງອອກ. ພ້ອມດຽວກັນນັ້ນ, ທ່ານ ສຸບັນ ສະວະບຸດ ຄະນະປະຈຳສະພາແຫ່ງຊາດ, ປະທານກຳມາທິການວຽກງານສະມາຊິກສະພາແຫ່ງຊາດ ທັງເປັນສະມາຊິກສະພາແຫ່ງຊາດປະຈຳເຂດເລືອກຕັ້ງທີ 14 ແຂວງສາລະວັນ ກໍໄດ້ມີຄຳເຫັນໂອ້ລົມຕໍ່ຄະນະພັກ, ຄະນະນຳ, ພະນັກງານ-ລັດຖະກອນ ຕະຫຼອດຮອດພໍ່ແມ່ປະຊາຊົນ ແຕ່ລະຈຸດທີ່ລົງເຄື່ອນໄຫວ ຊຶ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດຂອງບັນດາເມືອງ, ບ້ານ ທີ່ໄດ້ເອົາໃຈໃສ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ, ເມືອງບັນລຸຕາມແຜນການ, ພັດທະນາບ້ານ, ເມືອງໃຫ້ມີຄວາມຈະເລີນຮຸ່ງເຮືອງ ແລະ ຍັງເນັ້ນໜັກໃຫ້ຄະນະພັກ, ອົງການປົກຄອງ ເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ພະນັກງານ-ລັດຖະກອນ, ປະຊາຊົນບັນດາເຜົ່າເປັນປົກກະຕິ, ດຳລົງຊີວິດຢ່າງມີສະຕິ; ເປັນເຈົ້າການເຂົ້າຮ່ວມ, ປະກອບສ່ວນຈັດຕັ້ງປະຕິບັດຮ່ວມກັບພັກ-ລັດ ພັດທະນາເສດຖະກິດ-ສັງຄົມ ຫັນການຜະລິດແບບທຳມະຊາດ ໄປເປັນເສດຖະກິດແບບໃໝ່, ທັນສະໄໝ, ຮັກສາສິ່ງແວດລ້ອມ; ເປັນເຈົ້າການໃນວຽກງານປ້ອງກັນຊາດ-ປ້ອງກັນຄວາມສະຫງົບ, ເພີ່ມທະວີການເຕົ້າໂຮມຄວາມສາມັກຄີບັນດາເຜົ່າໃຫ້ເປັນປຶກແຜ່ນ, ສືບຕໍ່ເສີມຂະຫຍາຍ ແລະ ຮັກສາມູນເຊື້ອຮີດຄອງປະເພນີອັນດີງາມຂອງເຜົ່າ, ທ້ອງຖິ່ນ ແລະຂອງຊາດ, ປະຕິບັດສິດ, ໜ້າທີ່ ແລະພັນທະຂອງພົນລະເມືອງ ປະກອບສ່ວນເຂົ້າໃນການປົກປັກຮັກສາ ແລະສ້າງສາພັດທະນາປະເທດຊາດ ໃຫ້ມີຄວາມຈະເລີນຮຸ່ງເຮືອງຂຶ້ນໄປຢ່າງບໍ່ຢຸດຢັ້ງ.

ໃນວາລະການພົບປະປະຊາຊົນໃນຄັ້ງນີ້, ທ່ານ ສຸບັນ ສະວະບຸດ ຄະນະປະຈຳສະພາແຫ່ງຊາດ, ປະທານກຳມາທິການວຽກງານສະມາຊິກສະພາແຫ່ງຊາດ, ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 14 ແຂວງສາລະວັນ ຍັງໄດ້ຢ້ຽມຢາມສະຖານທີ່ຕ່າງໆ ເປັນຕົ້ນ ຊົນລະປະທານແກັງຫວດ-ນາທຶນ ເມືອງຄົງເຊໂດນ, ດ່ານທ້ອງຖິ່ນປາກຕະພານ ແລະ ທ່າເຮືອເວີນຄອງຫຼວງ ເມືອງລະຄອນເພັງ, ຊົນລະປະທານດົງມອນ ແລະ ສວນກ້ວຍ ຢູ່ເມືອງວາປີ, ຢ້ຽມຊົມສວນກາເຟ, ສວນປູກຖົ່ວລ່ຽນ ເມືອງເລົ່າງາມ. ການຢ້ຽມຢາມແຕ່ລະຈຸດ ທ່ານ ສຸບັນ ສະວະບຸດ ຄະນະປະຈຳສະພາແຫ່ງຊາດ, ປະທານກຳມາທິການວຽກງານສະມາຊິກສະພາແຫ່ງຊາດ ກໍໄດ້ຊຸກຍູ້ໃຫ້ຄະນະອໍານາດການປົກຄອງ, ພໍ່ແມ່ປະຊາຊົນ ແລະ ຜູ້ປະກອບການ ຈົ່ງເປັນເຈົ້າການປົກປັກຮັກສາ, ຄຸ້ມຄອງ, ນຳໃຊ້ຊົນລະປະທານ, ສິ່ງກໍ່ສ້າງໃຫ້ເກີດຜົນປະໂຫຍດສູງສຸດ, ຮັກສາສິ່ງແວດລ້ອມ ແລະອຶ່ນໆ. ນອກຈາກນັ້ນ ກໍໄດ້ເນັ້ນໃຫ້ພໍ່ແມ່ປະຊາຊົນ, ຊາວກະສິກອນ ຫັນການຜະລິດແບບທຳມະຊາດ ໄປເປັນການຜະລິດທີ່ທັນສະໄໝ ເປັນສິນຄ້າສົ່ງອອກ ສ້າງເສດຖະກິດຄອບຄົວ ໃຫ້ນັບມື້ນັບເຂັ້ມແຂງມັ່ງຄັ່ງຮັ່ງມີ ຂຶ້ນຢ່າງບໍ່ຢຸດຢັ້ງ.