(ສພຊ) ລະຫວ່າງວັນທີ 14-15 ກຸມພາ 2023, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 7 ແຂວງໄຊຍະບູລີ ໄດ້ພົບປະຢ້ຽມຢາມ ແລະ ເຜີຍແຜ່ຜົນສໍາເລັດ ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ແລະ ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງ ຊຸດທີ II ຢູ່ 2 ເມືອງຄື: ເມືອງປາກລາຍ ແລະ ເມືອງໄຊຍະບູລີ ນໍາໂດຍທ່ານ ພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດ ທັງເປັນສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 7 ແຂວງໄຊຍະບູລີ ຮ່ວມກັບທ່ານ ເພັງນິລັນ ຄຳພັນເພັງ ປະທານຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງທີ 7 ແຂວງໄຊຍະບູລີ, ມີສະມາຊິກສະພາປະຊາຊົນແຂວງ, ຄະນະປະຈຳພັກ, ຄະນະພັກຄະນະບັນຊາ, ພະແນກການ, ພ້ອມດ້ວຍພະນັກງານຫຼັກແຫຼ່ງ ຂອງທັງ 2 ເມືອງເຂົ້າຮ່ວມ.

ໂອກາດດັ່ງກ່າວ, ຄະນະ ໄດ້ຜັດປ່ຽນກັນເຜີຍແຜ່ຜົນຂອງ 2 ກອງປະຊຸມ ປະກອບມີບັນດາມະຕິ, ກົດໝາຍ ແລະ ບັນດາເນື້ອໃນເອກະສານບົດລາຍງານຕ່າງໆ ທີ່ນຳເຂົ້າພິຈາລະນາ ແລະ ຮັບຮອງເອົາຢູ່ໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ແລະ ກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງ ໄຊຍະບູລີ ຊຸດທີ II; ຈາກນັ້ນ, ຜູ້ເຂົ້າຮ່ວມກອງປະຊຸມ ກໍໄດ້ມີຄຳຄິດຄໍາເຫັນແລກປ່ຽນຕໍ່ກອງປະຊຸມ ແລະ ຮັບເອົາຄຳສະເໜີຈາກຜູ້ມີສິດເລືອກຕັ້ງ ເພື່ອສະເໜີຕໍ່ພາກສ່ວນກ່ຽວຂ້ອງຄົ້ນຄວ້າແກ້ໄຂ.

ນອກຈາກນັ້ນ, ຄະນະ ຍັງໄດ້ຕິດຕາມກວດກາໂຄງການເຂື່ອນໄຟຟ້າພະລັງງານນ້ຳ ທີ່ເມືອງປາກລາຍ ແລະ ນຳເອົາເຄື່ອງຈຳນວນໜຶ່ງ ມູນຄ່າ 3 ລ້ານກີບ ມອບໃຫ້ ເມືອງໄຊຍະບູລີ.