ໃນລະຫວ່າງວັນທີ 20–23 ສິງຫາ 2024 ທ່ານ ປອ ກໍລະກັນ ພົມມະວົງ ກໍາມະການປະຈໍາ ກໍາມາທິການວັດທະນະທໍາ-ສັງຄົມ ສະພາແຫ່ງຊາດ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 6 ແຂວງຫຼວງພະບາງ ໄດ້ລົງເຄື່ອນໄຫວພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສຳເລັດກອງປະຊຸມສະໄຫມສາມັນເທື່ອທີ 7 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຫຼວງພະບາງ ຊຸດທີ II ຢູ່ 4 ຈຸດ, ມີຜູ້ເຂົ້າຮ່ວມມາຈາກ 5 ບ້ານຄື: ບ້ານບັງກາໂລ, ບ້ານຫຼັກຫ້າ, ບ້ານສາລາພູຄູນ, ບ້ານຜາເກັ່ງໃຫ່ຍ ແລະ ບ້ານຜາເກັ່ງນ້ອຍ ເມືອງພູຄູນ ແຂວງຫຼວງພະບາງ,ເປົ້າໝາຍເຂົ້າຮ່ວມມີ ອົງການປົກຄອງບ້ານ, ເຖົ້າແກ່ແນວໂຮມ ຕະຫຼອດຮອດພໍ່ແມ່ປະຊາຊົນເຂົ້າຮ່ວມທັງຫມົດ 515 ຄົນ, ຍິງ 164 ຄົນ,​

ຈຸດປະສົງຂອງການລົງມາເຮັດວຽກໃນຄັ້ງນີ້ແມ່ນ, ມາເຜີຍແຜ່ຜົນສໍາເລັດຂອງກອງປະຊຸມໃຫ້ພະນັກງານ–ລັດຖະກອນ, ທະຫານ, ຕໍາຫຼວດ ແລະ ປະຊາຊົນລາວ ບັນດາເຜົ່າໄດ້ຮັບຮູ້ເຂົ້າໃຈ ແລະ ນໍາໄປຈັດຕັ້ງປະຕິບັດເຂົ້າສູ່ວຽກງານຕົວຈິງຢູ່ທ້ອງຖິ່ນຮາກຖານເມືອງ ແລະ ບ້ານທັງເປັນການພົບປະໂອ້ລົມ, ຮັບຟັງຄໍາຄິດຄໍາເຫັນ, ຄໍາສະເໜີ ຕິດພັນກັບການເກັບກໍາສະພາບການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມຢູ່ພາຍໃນເມືອງພູຄູນ.

ການລົງແຕ່ລະຈຸດແມ່ນໄດ້ຮັບຟັງສະພາບການພັດທະນາເສດຖະກິດ-ສັງຄົມ ພາຍໃນບ້ານ ເຊິ່ງແຕ່ລະບ້ານສ່ວນຫຼາຍແມ່ນມີອາຊີບຄ້າຂາຍ, ປູກຝັງ ແລະ ລ້ຽງສັດເປັນອາຊີບຕົ້ນຕໍ, ຄຽງຄູ່ກັນນັ້ນ ຍັງໄດ້ຮັບຟັງຄໍາສະເໜີຂອງພໍ່ແມ່ປະຊາຊົນ ເຊິ່ງປະຊາຊົນສະເໜີໃຫ້ປັບປຸງ ແລະ ແກ້ໄຂດ່ວນທີ່ສຸດແມ່ນສະເໜີໃຫ້ລັດຖະບານຊີ້ນໍາກະຊວງທີ່ກ່ຽວຂ້ອງ ລົງກວດກາ ແລະ ສ້ອມແປງເສັ້ນທາງແຫ່ງຊາດ ເລກທີ 13 ເໜືອທີ່ຜ່ານເມືອງພູຄູນ ເຊິ່ງມີສະພາບເປ່ເພ ເຮັດໃຫ້ການເດີນທາງພົບຄວາມຫຍຸ້ງຍາກ, ບໍ່ມີຄວາມປອດໄພແລະ ອື່ນໆ.

ໃນໂອກາດທ້າຍນີ້ ທ່ານ ປອ ກໍລະກັນ ພົມມະວົງ ກໍາມະການປະຈໍາກໍາມາທິການວັດທະນະທໍາ-ສັງຄົມ ສະພາແຫ່ງຊາດ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 6 ແຂວງຫຼວງພະບາງ ໄດ້ຮຽກຮ້ອງໃຫ້ອົງການປົກຄອງບ້ານ ແລະ ພໍ່ແມ່ປະຊາຊົນບັນດາເຜົ່າ ໃຫ້ມີຄວາມສາມັກຄີຊ່ວຍເຫຼືອເຊິ່ງກັນ ແລະ ກັນ, ເຊື່ອໝັ້ນຕໍ່ການນໍາພາຂອງພັກ-ລັດ, ເປັນເຈົ້າການໃນການສຶກສາອົບຮົມລູກຫຼານໃຫ້ເປັນພົນລະເມືອງດີ, ເອົາໃຈໃສ່ຜະລິດສິນຄ້າກະສິກໍາທີ່ເປັນທ່າແຮງຂອງບ້ານ ທີ່ເມືອງສົ່ງເສີມ  ແລະ ມີຕະຫຼາດຮອງຮັບ ສ່ວນຄໍາສະເໜີທີ່ປະຊາຊົນສະເໜີນັ້ນແມ່ນຈະໄດ້ສັງລວມ ແລະ ສົມທົບກັບພາກສ່ວນກ່ຽວຂ້ອງ ເພື່ອລົງກວດກາ ແລະ ແກ້ໄຂໃຫ້ທັນຕາມສະພາບການ.

                           ໂດຍ: ຄຳດີ ພັນທະລີ