ໃນລະຫວ່າງວັນທີ 18 – 20 ກັນຍາ 2023 ນີ້, ທ່ານ ເລື່ອມ ສົນສີວິໄລ ສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 04 ແລະ ທ່ານ ນ. ສິດທິວອນ ຫົງສາຄອນ, ທ່ານ ສົມສັກ ຈັນທະຄໍາວົງສາ ສະມາຊິກສະພາປະຊາຊົນແຂວງ ຊຸດທີ II ປະຈໍາເຂດເລືອກຕັ້ງເມືອງງາ, ໄດ້ສໍາເລັດການລົງເຄື່ອນໄຫວພົບປະຜູ້ມີສິດເລືອກຕັ້ງຢູ່ສະໂມສອນເມືອງງາ, ມີບັນດາຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າ – ຮອງຫົວໜ້າຫ້ອງການ, ພະນັກງານລັດຖະກອນ, 2 ກໍາລັງປ້ອງກັນຊາດ – ປ້ອງກັນຄວາມສະຫງົບແຂວງ, ບັນດາວິສະຫະກິດ ແລະ ມີອົງການປົກຄອງບ້ານ, ປະຊາຊົນບັນດາເຜົ່າພາຍໃນບ້ານຕົງຕູ, ຮອງທູ່, ແສນໄຊ, ຫ້ວຍໄລ ແລະ ບ້ານດອນແອ່ນ ເຂົ້າຮ່ວມ 512 ຄົນ.

  

ການລົງເຄື່ອນໄຫວພົບປະຜູ້ມີສິດເລືອກຕັ້ງຢູ່ເມືອງງາໃນຄັ້ງນີ້, ໄດ້ຮັບຟັງການລາຍງານຜົນການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມໃນໄລຍະຜ່ານມາຂອງເມືອງ ແລະ ບ້ານ ຕິດພັນກັບການຈັດຕັ້ງປະຕິ ບັດ 2 ວາລະແຫ່ງຊາດ. ຈາກນັ້ນ, ສະມາຊິກສະພາແຫ່ງຊາດ ແລະ ສະພາປະຊາຊົນແຂວງ ໄດ້ພັດປ່ຽນກັນເຜີຍແຜ່ເນື້ອໃນຜົນສໍາເລັດຂອງກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX, ຂອງສະພາສະພາປະຊາຊົນແຂວງ ຊຸດທີ II, ບັນດາມະຕິຕ່າງໆ ເພື່ອໃຫ້ຜູ້ເຂົ້າຮ່ວມ ແລະ ປະຊາຊົນໄດ້ຮັບຮູ້ ແລະ ເຂົ້າໃຈ 2 ກອງປະຊຸມດັ່ງກ່າວວ່າ ໄດ້ພິຈາລະນາຮັບຮອງເອົາບັນຫາສໍາຄັນພື້ນຖານຂອງປະເທດຊາດ, ຂອງແຂວງແນວໃດ ພ້ອມທັງ ໄດ້ຮັບຟັງຄໍາຄິດເຫັນ ແລະ ຄໍາສະເໜີຂອງຜູ້ເຂົ້າຮ່ວມ ແລະ ປະຊາຊົນ, ຕໍ່ກັບການຄຸ້ມຄອງ, ບໍລິຫານລັດຂັ້ນຕ່າງໆ ເຊິ່ງບັນດາຄໍາສະເໜີເຫຼົ່ານັ້ນ ສະມາຊິກສະພາແຫ່ງຊາດ, ສະພາປະຊາຊົນແຂວງ ໄດ້ຊີ້ແຈງກັບທີ່ແລ້ວ ແລະ ບາງບັນຫາຄໍາສະເໜີທີ່ບໍ່ທັນຊີ້ແຈງແມ່ນຈະໄດ້ສັງລວມ, ນໍາໄປຄົ້ນຄວ້າໃນກອງປະຊຸມຄະນະປະຈໍາສະພາປະຊາຊົນແຂວງ ແລະ ຈະນໍາສົ່ງໃຫ້ພະແນກການ, ອົງການທີ່ກ່ຽວຂ້ອງພິຈາລະນາແກ້ໄຂ ຕາມພາລະບົດບາດຂອງຕົນ.

ຂ່າວ: ສະພາປະຊາຊົນແຂວງ.