ໃນລະຫວ່າງວັນທີ 25-27 ສິງຫາ 2023 ຜ່ານມານີ້, ທ່ານ ນິສິດ ແກ້ວປັນຍາ ສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 04 ແລະ ທ່ານ ອິນແປງ ປັນຍາທອງ ສະມາຊິກສະພາປະຊາຊົນແຂວງ ຊຸດທີ II ປະຈໍາເຂດເລືອກຕັ້ງເມືອງປາກແບງ, ໄດ້ລົງເຄື່ອນໄຫວພົບປະຜູ້ມີສິດເລືອກຕັ້ງຢູ່ທີ່ສະໂມສອນເມືອງປາກແບງ, ມີບັນດາທ່ານຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າ-ຮອງຫົວໜ້າຫ້ອງການ, ພະນັກງານລັດຖະກອນ, 2 ກໍາລັງປ້ອງກັນຊາດ-ປ້ອງກັນຄວາມສະຫງົບແຂວງ, ບັນດາວິສະຫະກິດ, ມີນາຍບ້ານ, ອົງການປົກຄອງບ້ານ ແລະ ປະຊາຊົນບັນດາເຜົ່າພາຍໃນບ້ານຈອມແລງນ້ອຍ, ໄຊຊະນະ, ສຸກໄຊ, ຫ້ວຍແຊງຄໍາ ແລະ ບ້ານປາກເງີຍ ເຂົ້າຮ່ວມທັງໝົດ 693 ທ່ານ, ຍິງ 219 ທ່ານ.

  ການລົງເຄື່ອນໄຫວພົບປະຜູ້ມີສິດເລືອກຕັ້ງຢູ່ເມືອງປາກແບງໃນຄັ້ງນີ້, ໄດ້ຮັບຟັງການລາຍງານຜົນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໃນໄລຍະຜ່ານມາຂອງເມືອງ ແລະ ບ້ານ ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ແລະ ຫຼັງຈາກນັ້ນ, ບັນດາທ່ານສະມາຊິກສະພາແຫ່ງຊາດ ແລະ ສະພາປະຊາຊົນແຂວງ ໄດ້ພັດປ່ຽນກັນເຜີຍແຜ່ເນື້ອໃນຜົນສໍາເລັດຂອງກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX, ຂອງສະພາສະພາປະຊາຊົນແຂວງ ຊຸດທີ II ແລະ ບັນດາມະຕິຕ່າງໆຂອງກອງປະຊຸມ ເພື່ອໃຫ້ຜູ້ເຂົ້າຮ່ວມ ແລະ ພໍ່ແມ່ປະຊາຊົນໄດ້ຮັບຮູ້ ແລະ ເຂົ້າໃຈວ່າ 2 ກອງປະຊຸມດັ່ງກ່າວໄດ້ພິຈາລະນາຮັບຮອງເອົາບັນຫາສໍາຄັນພື້ນຖານຂອງປະເທດຊາດ, ຂອງແຂວງແນວໃດ.

ພ້ອມນັ້ນ, ຍັງໄດ້ຮັບຟັງຄໍາຄິດເຫັນ ແລະ ຄໍາສະເໜີຂອງບັນດາທ່ານທີ່ເຂົ້າຮ່ວມ, ຕໍ່ກັບການຄຸ້ມຄອງ, ບໍລິຫານລັດຂັ້ນຕ່າງໆ ແລະ ບັນດາຄໍາສະເໜີເຫຼົ່ານັ້ນ ສະມາຊິກສະພາແຫ່ງຊາດ, ສະພາປະຊາຊົນແຂວງ ໄດ້ຊີ້ແຈງກັບທີ່ແລ້ວ, ສ່ວນບາງບັນຫາທີບໍ່ທັນຊີ້ແຈງແມ່ນຈະໄດ້ນໍາໄປຄົ້ນຄວ້າ ແລະ ສົ່ງໃຫ້ພະແນກການ, ອົງການທີ່ກ່ຽວ ຂ້ອງພິຈາລະນາແກ້ໄຂ ຕາມພາລະບົດບາດ ແລະ ທັນເວລາ.

    ຂ່າວ: ສະພາປະຊາຊົນແຂວງ.