ໂດຍປະຕິບັດຕາມພາລະບົດບາດ, ສິດ ແລະ ໜ້າທີ່ ໃນຖານະເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າ.
ໃນວັນທີ 18 ມັງກອນ 2024 ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 11 ແຂວງບໍລິຄໍາໄຊ ແລະ ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງປາກກະດິງ, ການນໍາຂອງເມືອງ, ພະແນກການທີ່ກ່ຽວຂ້ອງຂອງແຂວງ, ເມືອງ ແລະ ວິຊາການຊ່ວຍວຽກຈໍານວນໜຶ່ງ ໄດ້ລົງເຄື່ອນໄຫວພົບປະ-ປະຊາຊົນ ແລະ ເຜີຍແຜ່ຜົນສໍາເລັດກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ຢູ່ບ້ານປາກສາ ເມືອງປາກກະດິງ ໃຫ້ກຽດນໍາພາໂດຍ ທ່ານ ໜູພັນ ອຸດສາ ຫົວໜ້າກົມອາຊີວະສຶກສາ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 11 ພ້ອມດ້ວຍສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງປາກກະດິງ ຈຸດປະສົງກໍເພື່ອໃຫ້ປະຊາຊົນ ໄດ້ຮັບຮູ້ ແລະ ເຂົ້າໃຈ ເຖິງບັນດາເນື້ອໃນສໍາຄັນຕ່າງໆ ຂອງກອງປະຊຸມ ທີ່ໄດ້ຄົ້ນຄວ້າ, ພິຈາລະນາຮັບຮອງ ເອົາບັນຫາສໍາຄັນຕ່າງໆຂອງຊາດ ແລະ ແຂວງບໍລິຄໍາໄຊ ແລະ ທັງເປັນການລົງມາຢ້ຽມຢາມຖາມຂ່າວ, ຮັບຟັງຄໍາຄິດ-ຄໍາເຫັນ, ຄໍາສະເໜີຂອງພໍ່ແມ່ປະຊາຊົນ ຜູ້ທີ່ມີສິດເລືອກຕັ້ງພາຍໃນບ້ານ.
ຂ່າວ:ພອນໄຊ; ພາບ: ຈັກກະພັນ
