ໃນລະຫວ່າງ ວັນທີ 15-16 ມີນາ 2023 ນີ້ ທ່ານ ນາງ ແກ້ວລາ ມະນີຈິດສະມາຊິກສະພາປຊາຊົນແຂວງ ປະຈໍາເຂດເລືອກຕັ້ງເມືອງນານ, ເລຂາທິການສະພາປະຊາຊົນແຂວງ ໄດ້ລົງຈັດຕັ້ງຜັນຂະຫຍາຍຜົນສຳເລັດກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນແຂວງ ຊຸດທີ II. ຢູ່ເມືອງ ນານແຂວງຫຼວງພະບາງ ລວມທັງໝົດ 5 ບ້ານຄື: ບ້ານ ນານວນ ,ບ້ານ ພູຈອງ , ບ້ານ ນາລິນ , ບ້ານ ຫາດຊາຍຄໍາ ແລະ ບ້ານ ຄົກຕົມ, ມີຜູ້ເຂົ້າຮ່ວມຮັບຟັງທັງໝົດ 313ທ່ານ, ຍິງ 165 ທ່ານ, ການລົງເຄື່ອນໄຫວວຽກງານໃນຄັ້ງນີ້ ແມ່ນນໍາເອົາເນື້ອ

ໃນຜົນສໍາເລັດກອງປະຊຸມສະໄໝສາມັນ ເທື່ອທີ 4 ຂອງ ສະພາປະຊາຊົນແຂວງ ຊຸດທີ II ມາເຜີຍແຜ່ໃຫ້ພະນັກງານ-ລັດຖະກອນ, ທະຫານ, ຕຳຫຼວດ ຕະຫຼອດຮອດພໍ່ແມ່ປະຊາຊົນບັນດາເຜົ່າ ພາຍໃນເມືອງໄດ້ຮັບຮູ້ ແລະ ເຂົ້າໃຈຕໍ່ບັນຫາສຳຄັນຕ່າງໆ ທີ່ໄດ້ພິຈາລະນາ ແລະ ຮັບຮອງເອົາຢູ່ໃນກອງປະຊຸມ ຂອງສະພາປະຊາຊົນແຂວງ ຊຸດທີ II, ພ້ອມທັງໄດ້ຮັບຟັງຄຳຄິດຄຳເຫັນ, ຄຳສະເໜີຂອງຜູ້ມີສິດເລືອກຕັ້ງ ເຊິ່ງເຫັນໄດ້ຫຼາຍບັນຫາທີ່ຕິດພັນກັບວຽກງານ ແຜນພັດທະນາເສດຖະກິດ-ສັງຄົມ ແລະ ວຽກງານອື່ນໆ ຈຳນວນໜຶ່ງ. ທ້າຍນີ້ ທ່ານ ນາງ ແກ້ວລາ ມະນີຈິດ ສະມາຊິກສະພາປຊາຊົນແຂວງ ປະຈໍາເຂດເລືອກຕັ້ງເມືອງນານ, ເລຂາທິການສະພາປະຊາຊົນແຂວງ ກໍ່ໄດ້ອະທິບາຍຊີ້ແຈງຕໍ່ກັບ ຄໍາສະເໜີຕ່າງໆ ໃຫ້ຜູ້ມີສິດເລືອກຕັ້ງເຂົ້າໃຈກັບທີ່ ແລະ ຮັບເອົາບາງ ຄໍາສະເໜີ ເພື່ອນໍາໄປຊຸກຍູ້ໃຫ້ພາກສ່ວນທີ່ກ່ຽວຂ້ອງຄົ້ນຄວ້າພິຈາລະນາ ແລະ ແກ້ໄຂໃຫ້ຖືກຕ້ອງຕາມລະບຽບກົດໝາຍ, ພ້ອມດຽວກັນນີ້ ທ່ານ ຍັງໄດ້ຮຽກຮ້ອງໃຫ້ອົງການປົກຄອງເມືອງ, ອົງການປົກຄອງບ້ານ, ແຕ່ລະບ້ານ, ເອົາໃຈໃສ່ຍົກສູງ, ຄວາມສາມັກຄີພາຍໃນບ້ານໃຫ້ໜັກແໜ້ນ, ເປັນເຈົ້າການໃນການຈັດຕັ້ງປະຕິບັດລະບຽບກົດໝາຍ, ເພື່ອໃຫ້ພໍ່ແມ່ປະຊາຊົນໄດ້ຮັບຮູ້ເຂົ້າໃຈຢ່າງທົ່ວເຖິງ ແລະ ບັນຫາອື່ນໆ.

ຂ່າວ: ນາງ ຄໍາຫຼ້າ ພອນພິລາ; ພາບ ນາງ ວຽນ ດວງເງິນ