ໃນລະຫວ່າງ​ວັນທີ 21 – 23 ກັນຍາ 2022 ທີ່ຜ່ານມານີ້ ທ່ານ ນາງ ສິດທິວອນ ຫົງສາຄອນ ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງງາ, ຮອງປະທານຄະນະກໍາມະການວັດທະນະທໍາສັງຄົມ ແລະ ບັນດາເຜົ່າ​ ແລະ ທ່ານ ສົມສັກ ຈັນຄໍາທະວົງສາ, ຮອງຫົວໜ້າຫ້ອງການ-ການເງິນເມືອງງາ ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງງາ ພ້ອມດ້ວຍທີມງານຂອງແຂວງ ແລະ ເມືອງ ໄດ້ລົງເຄື່ອນໄຫວພົບປະໂອ້ລົມຜູ້ມີສິດເລືອກຕັ້ງ ແລະ ເຜີຍແຜ່ຜົນສຳເລັດຂອງກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ຢູ່ເມືອງງາ​ ປະກອບມີ​ 6​ ຈຸດຄື: ບ້ານຖິ່ນ, ບ້ານດອນຄໍາ, ບ້ານເມືອງງາ, ບ້ານດອນແອ່ນ, ບ້ານຫ້ວຍເຊີຍ ແລະ ບ້ານດອນງິ້ວ ເຊິ່ງມີຜູ້ເຂົ້າຮ່ວມຮັບຟັງທັງໝົດ 737​ ທ່ານ, ຍິງ 407 ທ່ານ​.

ການລົງເຄື່ອນໄຫວພົບປະໂອ້ລົມຜູ້ມີສິດເລືອກຕັ້ງ ໃນຄັ້ງນີ້ ແມ່ນເພື່ອຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຊຸດທີ II ໃຫ້ຖັນແຖວພະນັກງານ-ລັດຖະກອນ, ທະຫານ, ຕຳຫຼວດ ແລະ ປະຊາຊົນລາວບັນດາເຜົ່າ ຮັບຮູ້ຢ່າງກວ້າງຂວາງ, ທົ່ວເຖິງ ແລະ ຖືກຕ້ອງຕາມເປົ້າໝາຍ ຕາມເງື່ອນໄຂແບບໃໝ່; ເພື່ອຈັດຕັ້ງປະຕິບັດສິດ ແລະ ໜ້າທີ່ ຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ຕາມທີ່ໄດ້ກໍານົດໄວ້ໃນກົດໝາຍ; ເພື່ອລາຍງານການເຄື່ອນໄຫວວຽກງານຂອງຕົນໃຫ້ປະຊາຊົນຜູ້ມີສິດເລືອກຕັ້ງໄດ້ຮັບຊາບ, ເປັນການຫັນລົງຮາກຖານ, ພ້ອມທັງລົງເກັບກຳສະພາບການ, ຄໍາຄິດ,​ ຄຳເຫັນຂອງປະຊາຊົນຕໍ່ວຽກງານຄຸ້ມຄອງການບໍລິຫານລັດ;

ໃນໄລຍະລົງເຜີຍແຜ່ຜົນສໍາເລັດຄັ້ງນີ້ໄດ້ມີໂອກາດລົງມອບສັງກະສີໃຫ້ຄອບຄົວທຸກຍາກ ຢູ່ບ້ານດອນຄໍາ 01 ຄອບຄົວ, ຈໍານວນ 25 ແຜ່ນ ເປັນເງິນ 1,000,000 ກີບຖ້ວນ; ໂມທະນາທານສ້າງວັດດອນແອ່ນ ຈໍານວນ 1,000,000 ກີບ ຕ່າງໜ້າມອບໂດຍ ທ່ານ ນ.ສິດທິວອນ ຫົງສາຄອນ, ພ້ອມດຽວກັນນີ້ຍັງ ມອບທຶນສ່ວນຕົວສົມທົບເຂົ້າ 02 ບ້ານ ຈໍານວນ 350,000 ກີບ ແລະ ມອບເຄື່ອງ ໃຫ້ອົງການປົກຄອງເມືອງງາ ລວມມູນຄ່າທັງໝົດ 3,300,000 ກີບ.

ຂ່າວ​: ຂັນທອງ​ ໂພທິສັກ