ໃນວັນທີ 23 ກັນຍາ 2024 ນີ້ ຢູ່ທີ່ສະພາປະຊາຊົນແຂວງຈໍາປາສັກ ທ່ານ ແກ້ວລັດຕະນະ ສີຫາວົງຮອງປະທານຄະນະສະມາຊິກສະພາແຫ່ງຊາດ ປະເຂດເລືອກຕັ້ງທີ 15, ທັງເປັນຮອງປະທານສະພາປະຊາຊົນແຂວງຈໍາປາສັກ ໄດ້ຮັບເຄື່ອງຊ່ວຍເຫຼືອປະເພດຜະລິດຕະພັນກາເຟເມັດຂົ້ວ ຈາກສະມາຄົມສົ່ງອອກກາເຟລາວ ມູນຄ່າ 47,400,000 ກີບ(ສີ່ສີບເຈັດລ້ານສີ່ແສນກີບ) ລວມກັບ ຜະລິດຕະພັນກາເຟເມັດຂົ້ວທີ່ມອບກ່ອນໜ້ານີ້ ໃນຄັ້ງວັນທີ 13 ກັນຍາ 2024 ທີ່ຜ່ານມາ ມູນຄ່າ 11,000,000 ກີບ (ສີບເອັດລ້ານກີບ) ລວມເປັນມູນຄ່າທັງໝົດ 58,400,000 ກີບ (ຫ້າສີບເຈັດລ້ານສີ່ແສນກີບ) ມອບໃຫ້ແກ່ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15 ກໍຄືສະພາປະຊາຊົນແຂວງຈໍາປາສັກ ນຳໄປປະກອບສ່ວນເປັນຂອງຕ້ອນຮັບໃຊ້ກອງປະຊຸມໃຫຍ່ລັດຖະສະພາລະຫວ່າງຊາດອາຊ້ຽນ (AIPA) ທີ່ສະພາແຫ່ງຊາດ ແຫ່ງ ສປປ ລາວ ໄດ້ຮັບກຽດເປັນເຈົ້າພາບ ເຊິ່ງກອງປະຊຸມຈະຈັດຂື້ນໃນລະຫວ່າງວັນທີ 18-24 ຕຸລາ 2024 ຢູ່ທີ່ນະຄອນຫຼວງວຽງຈັນ ຕາງໜ້າມອບໂດຍ ທ່ານ ສີສຸກ ວົງພັກດີ ຮອງປະທານສະມາຄົມກາເຟລາວ ພ້ອມຄະນະ ໂດຍມີບັນດາທ່ານສະມາຊິກສະພາແຫ່ງຊາດ ປະຈໍາເຂດເລືອກຕັ້ງ, ສະມາຊິກສະພາປະຊາຊົນແຂວງ, ຄະນະປະຈໍາ, ຄະນະເລຂາທິການຂອງສະພາປະຊາຊົນແຂວງຈໍາປາສັກ ເຂົ້າຮ່ວມໃນພິທີ.

ໂອກາດດັ່ງກ່າວ ທ່ານ ແກ້ວລັດຕະນະ ສີຫາວົງ ຮອງປະທານຄະນະສະມາຊິກສະພາແຫ່ງ ປະຈໍາເຂດເລືອກທີ 15 ໄດ້ກ່າວສະແດງຄວາມຂອບໃຈ ແລະ ຍ້ອງຍໍຊົມເຊີຍຕໍ່ສະມາຄົມສົ່ງອອກກາເຟລາວ ທີ່ເຫັນໄດ້ຄວາມສຳຄັນ ແລະໃຫ້ການປະກອບສ່ວນໃຫ້ຊ່ວຍເຫຼືອໃນຄັ້ງນີ້. ຜະລິດຕະພັນກາເຟເມັດຂົ້ວທີ່ໄດ້ຮັບນີ້, ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15 ຈະໄດ້ນໍາໄປມອບຕໍ່ໃຫ້ສະພາແຫ່ງຊາດ ສົມທົບກັບຜະລິດຕະພັນອື່ນໆຂອງບັນດາແຂວງ ປະກອບເຂົ້າເປັນເຄື່ອງຕ້ອນຂອງຝາກ ໃຫ້ແກ່ຄະນະຜູ້ແທນລັດທະສະພາບັນດາປະເທດອາຊ້ຽນ ທີ່ເຂົ້າຮ່ວມກອງປະຊຸມໃຫຍ່ລັດຖະສະພາລະຫວ່າງຊາດອາຊ້ຽນ (AIPA) ທີ່ສະພາແຫ່ງຊາດ ແຫ່ງ ສປປ ລາວ ໄດ້ຮັບກຽດເປັນເຈົ້າພາບ ເຊິ່ງກອງປະຊຸມຈະຈັດຂື້ນໃນລະຫວ່າງວັນທີ 18-24 ຕຸລາ 2024 ຢູ່ທີ່ນະຄອນຫຼວງວຽງຈັນ ເຊິ່ງເປັນການໂຄສະນາຜະລິດຕະພັນທີ່ເປັນເອກະລັກຂອງລາວໄປໃນຕົວ ໂດຍສະເພາະຜະລິດຕະພັນກາເຟ ທີ່ເປັນເອກະລັກຂອງແຂວງຈໍາປາສັກ ກໍຈະໄດ້ເປັນສ່ວນໜຶ່ງໃນການຮັບໃຊ້ໃຫ້ແກ່ກອງປະຊຸມອັງຊົງກຽດຄັ້ງດັ່ງກ່າວ.

(ພາບ-ຂ່າວ: ສພຂ.ຈສ)