ເພື່ອສືບຕໍ່ຊ່ວຍເຫລືອໄພນໍ້າຖ້ວມແຂວງຫລວງນໍ້າທາ ໃນຊ່ວງກາງເດືອນກັນຍາ ຜ່ານມາເຮັດໃຫ້ປະຊາຊົນຈໍານວນຫລາຍບ້ານໄດ້ຮັບຜົນກະທົບທັງຊັບສິນມີຄ່າ, ຜົນຜະລິດ, ສັດລ້ຽງ, ລົດລາງພາຫະນະຕ່າງໆ ມາໃນວັນທີ 22 ຕຸລາ 2024, ສະມາຄົມນັກທຸລະກິດໜຸ່ມ ເມືອງຈັນທະບູລີ ໄດ້ມອບເຄື່ອງຊ່ວຍເຫລືອໃຫ້ສະພາປະຊາສຊົນແຂວງຫລວງນ້ຳທາ  ລົງມອບໃຫ້ພໍ່ແມ່ປະຊາຊົນຜູ້ທີ່ປະສົບໄພນ້ຳຖ້ວມຢູ່ ແຂວງຫລວງນ້ຳທາ ປະກອບມີ ເຂົ້າສານ, ອາຫານແຫ້ງ, ເຄື່ອງນຸ່ງຫົ່ມ ແລະ  ເຄື່ອງໃຊ້ສອຍຕ່າງໆ ລວມມູນຄ່າ 100,000,000 (ຮ້ອຍລ້ານກີບ) ໂດຍຕາງໜ້າການນໍາຂອງສະພາປະຊາຊົນແຂວງ ຮັບເຄື່ອງຊ່ວຍເຫລືອຄັ້ງນີ້ໂດຍ  ທ່ານ ກົງເພັດ ແກ້ວບົວພາ ກຳມະການພັກແຂວງ ຮອງປະທານສະພາປະຊາຊົນແຂວງຫຼວງນໍ້າທາ.

ໂອກາດນີ້ ທ່ານ ກົງເພັດ ແກ້ວບົວພາ ຍັງສະແດງຄວາມຂອບໃຈ ແລະ ຊົມເຊີຍ ມາຍັງ ສະມາຄົມນັກທຸລະກິດໜຸ່ມ ເມືອງຈັນທະບູລີ ທີ່ໄດ້ເປັນຫ່ວງເປັນໄຍພໍ່ແມ່ປະຊາຊົນພາຍໃນແຂວງຫລວງນ້ຳທາ ທີ່ໄດ້ຖຶກຜົນກະທົບຈາກໄພນ້ຳຖ້ວມໃນຄັ້ງນີ້, ພ້ອມທັງຈະນຳເອົາເຄື່ອງຈຳນວນດັ່ງກ່າວແບ່ງປັນ ແລະ ລົງມອບໃຫ້ພໍ່ແມ່ປະຊາຊົນທີ່ຖຶກຜົນກະທົບຈາກໄພພິບັດ ໃຫ້ໄດ້ຮັບຜົນປະໂຫຍດສູງສຸດ; ພ້ອມດຽວກັນ ສະພາປະຊາຊົນແຂວງ ຍັງໄດ້ມອບໃບສົມມະນາຄຸນ ໃຫ້ແກ່ສະມາຄົມນັກທຸລະກິດໜຸ່ມ ເມືອງຈັນທະບູລີ ນະຄອນຫລວງວຽງຈັນ.     

ຂ່າວ: ວັນນີ ແຝງບົວວັນ