(ສພຊ) – ຕອນບ່າຍວັນທີ 19 ມິຖຸນາ 2024 ທ່ານ ສົມມາດ ພົລເສນາ ຮອງປະທານສະພາແຫ່ງຊາດ ໄດ້ຖະແຫຼງຂ່າວກ່ຽວກັບຜົນການພິຈາລະນາວຽກງານຂອງລັດຖະບານໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ ທີ່ຕິດພັນກັບການຈັດຕັ້ງປະຕິບັດສອງວາລະແຫ່ງຊາດ ໄລຍະ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2024 ແລະ ຜົນການພິຈາລະນາບົດລາຍງານຂອງອົງການກວດສອບແຫ່ງລັດ ກ່ຽວກັບການແກ້ໄຂຜົນການກວດສອບປະຈໍາປີ 2023 ຕາມມະຕິຂອງສະພາແຫ່ງຊາດ ສະບັບເລກທີ 114/ສພຊ, ລົງວັນທີ 21 ພະຈິກ 2023 ໃຫ້ຮັບຊາບຢ່າງທົ່ວເຖິງກັນ ເຊິ່ງທ່ານກ່າວວ່າ: ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ IX ໃນວາລະພິ ຈາ ລະນາວຽກງານຂອງລັດຖະບານ ກອງປະຊຸມໄດ້ຮັບຟັງການລາຍງານໂດຍສັງເຂບຂອງທ່ານນາຍົກລັດຖະມົນຕີ ກ່ຽວກັບການ ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ ແລະ ແຜນເງິນຕາ ຕິດພັນກັບການຈັດຕັ້ງປະຕິບັດ 2 ວາ ລະແຫ່ງຊາດ ໄລຍະ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024 ແລະ ຂ້າພະເຈົ້າໄດ້ຕາງໜ້າຄະນະປະຈໍາສະພາແຫ່ງຊາດ ປະກອບຄໍາເຫັນຕໍ່ບົດລາຍງານດັ່ງກ່າວ; ຫຼັງຈາກນັ້ນ, ລັດຖະມົນຕີກະຊວງແຜນການ ແລະ ການລງທຶນ, ລັດ ຖະມົນຕີກະຊວງການເງິນ ແລະ ຜູ້ວ່າການທະນາຄານແຫ່ງ ສປປລາວ ກໍໄດ້ລາຍງານເພີ່ມຕື່ມຕໍ່ກອງປະຊຸມ.
ພາຍຫຼັງທີ່ໄດ້ຮັບຟັງການລາຍງານຂອງລັດຖະບານແລ້ວ, ບັນດາທ່ານສະມາຊິກສະພາແຫ່ງຊາດ ໃນຖານະທີ່ເປັນຕົວແທນແຫ່ງສິດ ແລະ ຜົນປະ ໂຫຍດຂອງປະຊາຊົນບັນດາເຜົ່າ ກໍໄດ້ສຸມໃສ່ຄົ້ນຄວ້າ ແລະ ປະກອບຄວາມເຫັນຢ່າງກວ້າງຂວາງ, ເລິກເຊິ່ງ ໄດ້ມີການຊັກຖາມ ຕໍ່ລັດຖະບານ ເຊິ່ງສະມາຊິກລັດຖະບານກໍໄດ້ຊີ້ແຈງໃຫ້ຄວາມກະຈ່າງແຈ້ງຕໍ່ຄໍາຊັກຖາມ ແລະ ຕໍ່ບັນຫາຕ່າງໆທີ່ສະມາຊິກສະ ພາແຫ່ງຊາດໄດ້ຍົກຂຶ້ນ ຢ່າງກົງໄປກົງມາ; ພິເສດ, ກອງປະຊຸມຍັງໄດ້ຮັບຟັງການອະທິບາຍຊີ້ແຈງຂອງທ່ານນາຍົກລັດຖະມົນຕີ ແລະ ທ່ານປະທານສະພາແຫ່ງຊາດ ກໍໄດ້ມີຄໍາເຫັນສະຫຼຸບສັງລວມ ດັ່ງນີ້:
ຕໍ່ການປະຕິບັດແຜນການ 6 ເດືອນຕົ້ນປີ 2024
1. ການເຕີບໂຕເສດຖະກິດໃນໄລຍະ 6 ເດືອນຕົ້ນປີ ສາມາດບັນລຸໄດ້ໃນລະດັບ 4.7%, GDP ຄາດຄະເນ 6 ເດືອນຕົ້ນປີ ຈະບັນລຸ 148,043 ຕື້ກີບ ຫຼືເທົ່າກັບ 50.4% ຂອງແຜນການ.
2. ການຈັດເກັບລາຍຮັບທຽບໃສ່ໄລຍະດຽວກັນຂອງປີກາຍ ເພີ່ມຂຶ້ນ 64%, ອັນພົ້ນເດັ່ນແມ່ນລັດຖະບານໄດ້ມອບຫົວໜ່ວຍວິສາຫະກິດທີ່ສູນກາງຄຸ້ມຄອງ ໃຫ້ທ້ອງຖິ່ນເປັນຜູ້ຄຸ້ມຄອງ ເຮັດໃຫ້ມີ 1 ແຂວງ ສາມາດປະຕິບັດລາຍຮັບໄດ້ເກີນ 100% ແລະ ມີ 5 ແຂວງ ສາມາດປະຕິບັດໄດ້ຫຼາຍກວ່າ 70% ຂຶ້ນໄປ, ແຕ່ເມື່ອທຽບໃສ່ກັບອັດຕາເງິນເຟີ້ແລ້ວ ລາຍຮັບຂອງເຮົາແມ່ນຍັງຫຼຸດລົງ.
3. ລັດຖະບານໄດ້ມີຄວາມພະຍາຍາມການແກ້ໄຂອັດຕາເງິນເຟີ້, ແກ້ໄຂການແລກປ່ຽນນອກລະບົບ, ຄຸ້ມຄອງເງິນຕາຕ່າງ ປະເທດ ໂດຍມີການຈັດຕັ້ງປະຕິບັດນະໂຍບາຍເງິນຕາທີ່ຮັດກຸມ, ຄຸ້ມຄອງອັດຕາແລກປ່ຽນບໍ່ໃຫ້ຜັນຜວນແຮງ, ລະດົມເງິນຕາຕ່າງປະເທດເຂົ້າສູ່ລະບົບທະນາຄານ ແລະ ປັບປຸງນິຕິກຳທີ່ກ່ຽວຂ້ອງ ແລະ ຊຸກຍູ້ສົ່ງເສີມນະໂຍບາຍສິນເຊື່ອຫຼາຍຂຶ້ນ; ຄຸ້ມຄອງການນໍາເຂົ້າ-ສົ່ງອອກຜ່ານລະບົບທະນາຄານ, ຄັງສໍາຮອງເງິນຕາຕ່າງປະເທດ ສາມາດກຸ້ມການນຳເຂົ້າໄດ້ຢູ່ 4.2 ເດືອນ.
4. ໄດ້ເອົາໃຈໃສ່ປັບປຸງການຮຽນການສອນທຸກຊັ້ນຮຽນ ຕິດພັນກັບການແກ້ໄຂບັນຫາຄູອາສາສະໝັກ, ການຂາດແຄນຄູສອນ ແລະ ການຂາດຮຽນຂອງນັກຮຽນໃນເຂດຊົນນະບົດ ຕາມ 5 ນະໂຍບາຍ, ປັດຈຸບັນ ໄດ້ປະຕິບັດເງິນນະໂຍບາຍສຳລັບຄູອາສາສະໝັກຄືກັບຄູທີ່ເປັນລັດຖະກອນແລ້ວ; ສືບຕໍ່ດຳເນີນການຫັນໂຮງໝໍກຸ້ມຕົນເອງຂອງ 3 ໂຮງໝໍສູນກາງ ແລະ ສືບຕໍ່ພັດ ທະນາຕາໜ່າງການບໍລິການສາທາລະນະສຸກໃນທົ່ວປະເທດ.
5. ໄດ້ໂຈະໂຄງການທົດລອງ ແລະ ຫັນໄປສູ່ຮູບການປົກກະຕິ, ໂຈະການພິຈາລະນາອະນຸມັດໂຄງການໃໝ່ກ່ຽວກັບໂຄງ ການຂຸດຄົ້ນແຮ່ທາດ ເພື່ອດໍາເນີນການປະເມີນຄືນ ເຊິ່ງໂຄງການໃດທີ່ຈັດຢູ່ໃນປະເພດ C+ ແລະ C ຈະໄດ້ມີການດໍາເນີນຕາມຂັ້ນຕອນທີ່ກໍານົດໄວ້ໃນກົດໝາຍ.
6. ລັດຖະບານໄດ້ສະເໜີໃຫ້ຄະນະປະຈໍາສະພາແຫ່ງຊາດ ອອກມະຕິຮັບຮອງການຮັບຮູ້ສິດນໍາໃຊ້ທີ່ດິນໃນເຂດທີ່ດິນປ່າ ໄມ້ຂອງປະຊາຊົນ ເພື່ອຂຶ້ນທະບຽນອອກໃບຕາດິນໃຫ້ປະຊາຊົນທີ່ອາໄສ ແລະ ທໍາການຜະລິດ ຢູ່ໃນ 3 ປະເພດປ່າ ເພື່ອຮັບປະ ກັນການອອກໃບຕາດິນຢ່າງແຂງແຮງ.
ຕໍ່ກັບທິດທາງແຜນການ 6 ເດືອນທ້າຍປີ 2024
1. ສະພາແຫ່ງຊາດ ໄດ້ມອບໃຫ້ລັດຖະບານ ເພີ່ມຄວາມເອົາໃຈໃສ່ໃນການຜັນຂະຫຍາຍມະຕິຂອງກົມການເມືອງສູນກາງພັກ ສະບັບເລກທີ 04/ກມສພ, ລົງວັນທີ 11 ເມສາ 2024 ວ່າດ້ວຍການສ້າງເສດຖະກິດເອກະລາດເປັນເຈົ້າຕົນເອງໃນໄລ ຍະໃໝ່ ເຂົ້າໃນການຈັດຕັ້ງຜະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ ແລະ ສືບຕໍ່ປະຕິບັດທິດທາງ, ເປົ້າໝາຍລວມ ແລະ ແຜນວຽກຈຸດສູມຂອງລັດຖະບານ ຕາມທີ່ໄດ້ກໍານົດໄວ້ໃນມະຕິກອງປະ ຊຸມສະພາແຫ່ງຊາດ ໃຫ້ບັນລຸຕາມແຜນການ.
2. ສືບຕໍ່ສຸມໃສ່ການແກ້ໄຂບັນຫາເຄັ່ງຮ້ອນດ້ານເສດຖະກິດ-ການເງິນ ໂດຍສະເພາະແກ້ໄຂບັນຫາການເໜັງຕີງຂອງອັດ ຕາແລກປ່ຽນ, ການເໜັງຕີງຂອງລາຄາສິນຄ້າ, ຢັບຢັ້ງສະພາບເງິນເຟີ້ບໍ່ໃຫ້ເພີ່ມຂຶ້ນສູງ ແລະ ບັນຫາໜີ້ສິນຕ່າງປະເທດ ດ້ວຍການບັງຄັບໃຊ້ບັນດາມາດຕະການທີ່ໄດ້ວາງອອກຢ່າງເຂັ້ມງວດ.
3. ຄົ້ນຄວ້າເພີ່ມເງິນນະໂຍບາຍ, ເງິນອຸດໜູນຄ່າຄອງຊີບ ໃຫ້ແກ່ພະນັກງານ-ລັດຖະກອນ, ທະຫານ, ຕໍາຫຼວດ ແລະ ພະນັກ ງານບໍານານ ໄປພ້ອມກັບການປັບຄ່າແຮງງານຕໍ່າສຸດໃຫ້ໄປຕາມສະພາບເສດຖະກິດ ແລະ ຄ່າຄອງຊີບໃນປັດຈຸບັນ.
4. ປັບປຸງສະພາບແວດລ້ອມຂອງການລົງທຶນ ແລະ ການດຳເນີນທຸລະກິດຢູ່ລາວ ໃຫ້ໂລ່ງລ່ຽນຂຶ້ນ, ຕັດຂັ້ນຂອດທີ່ອຸດຕັນອອກໃຫ້ໄດ້, ສຸມໃສ່ແກ້ໄຂບັນຫາການສະໜອງພະລັງງານໄຟຟ້າບໍ່ພຽງພໍກັບຄວາມຕ້ອງການ, ພັດທະນາພະລັງງານລົມ, ພະ ລັງງານແສງອາທິດ ທີ່ສາມາດກໍ່ສ້າງໄວ ໂດຍສະເພາະພະລັງງານແສງອາທິດໃນເຂດອ່າງນໍ້າໜ້າເຂື່ອນໄຟຟ້າ, ເຂດທີ່ດິນປອກໂລ້ນ, ດິນຫີນແຮ່ທີ່ບໍ່ເໝາະສົມແກ່ການພັດທະນາກະສິກໍາ.
5. ສືບຕໍ່ສູ້ຊົນສຸມໃສ່ການເກັບລາຍຮັບງົບປະມານປີ 2024 ໃຫ້ໄດ້ຕາມແຜນ ຫຼື ເກີນແຜນ, ສຸມໃສ່ຂະຫຍາຍຖານລາຍຮັບໃໝ່ໃຫ້ເພີ່ມຂຶ້ນ, ເກັບລາຍຮັບຈາກຖານທີ່ມີຢູ່ແລ້ວໃຫ້ຄົບຖ້ວນ, ເລັ່ງການຫັນການເກັບລາຍຮັບໃຫ້ເປັນທັນສະໄໝໃຫ້ກວ້າງ ແລະ ກວມເອົາຫຼາຍຂົງເຂດ ໂດຍສະເພາະການເກັບລາຍຮັບຢູ່ດ່ານ, ການເກັບລາຍຮັບຈາກຄ່າທຳນຽມ, ຄ່າບໍລິການ ແລະ ອື່ນໆ.
6. ສືບຕໍ່ພັດທະນາພື້ນຖານໂຄງລ່າງການກໍ່ສ້າງປັບປຸງເສັ້ນທາງໃຫ້ໄດ້ຄຸນນະພາບ, ຖືກຕ້ອງຕາມມາດຕະຖານເຕັກນິກ ແລະ ໃຫ້ສໍາເລັດຕາມແຜນທີ່ກໍານົດໄວ້ ພ້ອມທັງປັບປຸງລະບົບຂົນສົ່ງຕ່າງໆໃຫ້ມີຄວາມວ່ອງໄວ, ທັນສະໄໝ ສາມາດແຂ່ງຂັນກັບພາກພື້ນ ແລະ ສາກົນ; ສືບຕໍ່ໂຄງການປ້ອງກັນຕາຝັ່ງຕາມແມ່ນໍ້າຊາຍແດນ ແລະ ຈັດສັນທຶນຮອນທີ່ເໝາະສົມໃຫ້ວຽກງານດັ່ງກ່າວ.
7. ເອົາໃຈໃສ່ຊຸກຍູ້ສົ່ງເສີມການຜະລິດໃຫ້ແຂງແຮງຂຶ້ນກວ່າເກົ່າ ພ້ອມທັງຄົ້ນຄວ້າປະເມີນຄືນບັນດາລາຍການສິນຄ້າທີ່ສາ ມາດຜະລິດໄດ້ ເປັນຕົ້ນຝຸ່ນ, ອາຫານສັດ ຮັບປະກັນການສະໜອງ ແລະ ຊົມໃຊ້ຢູ່ພາຍໃນໃຫ້ພຽງພໍກັບຄວາມຕ້ອງການ ພ້ອມທັງມີກົນໄກປະສານສົມທົບລະຫວ່າງຂະແໜງກະສິກໍາ ແລະ ປ່າໄມ້ ກັບຂະແໜງອຸດສາຫະກໍາ ແລະ ການຄ້າ ຄົ້ນຄວ້າກໍານົດມາດຕະການຈໍາກັດການນໍາເຂົ້າສິນຄ້າທີ່ສາມາດຜະລິດໄດ້ຢູ່ພາຍໃນ ແລະ ຫຼຸດຜ່ອນການສົ່ງອອກວັດຖຸດິບບາງລາຍການທີ່ຍັງມີຄວາມຕ້ອງການຊົມໃຊ້ພາຍໃນ ເປັນຕົ້ນຂີ້ເບຍ ແລະ ອື່ນໆ ເພື່ອຮັບປະກັນການຊົມໃຊ້ພາຍໃນໃຫ້ພຽງພໍ.
8. ມອບໃຫ້ລັດຖະບານສຸມໃສ່ປັບປຸງສະພາບການສຶກສາ ແລະ ກໍ່ສ້າງຊັບພະຍາກອນມະນຸດ, ສືບຕໍ່ປະຕິບັດນະໂຍບາຍ ແລະ ມາດຕະການໃນການແກ້ໄຂການປະລະການຮຽນ, ບັນຫາການຂາດແຄນຄູ, ການປະຕິບັດນະໂຍບາຍອຸດໜູນຄູອາສາສະໝັກ ແລະ ແພດອາສາສະໝັກ ຕາມມະຕິເລກທີ 09/ລບ ໃຫ້ເປັນຮູບປະທຳຫຼາຍຂຶ້ນ ເຖິງວ່າຍັງມີຄວາມຫຍຸ້ງຍາກທາງດ້ານເສດຖະກິດ-ການເງິນ ກໍໃຫ້ເອົາໃຈໃສ່ໃນການລົງທຶນເຂົ້າໃນຂະແໜງສຶກສາທິການ ແລະ ສາທາລະນະສຸກ; ຊຸກຍູ້ສົ່ງເສີມການ ທ່ອງທ່ຽວໃນປີທ່ອງທ່ຽວລາວ ຕິດພັນກັບການເປັນປະທານອາຊຽນ ແລະ ປະທານໄອປາ.
ອີງຕາມວາລະກອງປະຊຸມໃນວັນທີ 02 ກໍລະກົດທີ່ຈະມາເຖິງ, ຜູ້ແທນກອງປະຊຸມຈະໄດ້ລົງຄະແນນຮັບຮອງມະຕິກອງປະຊຸມສະພາແຫ່ງຊາດ ກ່ຽວກັບແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນ ຕາ ໄລຍະ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2024.
ຕໍ່ກັບວຽກງານຂອງອົງການກວດສອບແຫ່ງລັດ
ໃນວັນທີ 14 ມິຖຸນາທີ່ຜ່ານມາ, ກອງປະຊຸມໄດ້ພິຈາລະນາບົດລາຍງານຂອງອົງການກວດສອບແຫ່ງລັດ ກ່ຽວກັບການແກ້ໄຂຜົນການກວດສອບປະຈໍາປີ 2023 ສັງລວມໂດຍຫຍໍ້ຕໍ່ບັນດາທ່ານດັ່ງນີ້:
1. ກອງປະຊຸມໄດ້ຍ້ອງຍໍຊົມເຊີຍຕໍ່ອົງການກວດສອບແຫ່ງລັດ ທີ່ໄດ້ປະຕິບັດໜ້າທີ່ວຽກງານດ້ວຍຄວາມຫ້າວຫັນ; ເຖິງວ່າໄດ້ດຳເນີນການກວດສອບພຽງແຕ່ 2 ເດືອນເທົ່ານັ້ນ, ແຕ່ຍັງສາມາດລາຍງານຕໍ່ກອງປະຊຸມສະພາແຫ່ງຊາດໄດ້ທັນຕາມກໍານົດເວລາ.
2. ໄລຍະຜ່ານມາ ໄດ້ກວດສອບເຫັນລາຍຮັບ-ລາຍຈ່າຍເພີ່ມ, ໜີ້ຕ້ອງຮັບ ແລະ ບັນຫາອື່ນ ເປັນຈໍານວນຫຼາຍ ແຕ່ແກ້ໄຂໄດ້ໜ້ອຍ, ຊັກຊ້າ, ແກ່ຍາວ ສາເຫດຍ້ອນການຈັດຕັ້ງປະຕິບັດກົດໝາຍບໍ່ທັນເຂັ້ມງວດ, ບໍ່ເດັດຂາດ, ອົງການຄຸ້ມຄອງ ແລະ ເປົ້າໝາຍຖືກກວດສອບ ຍັງຖືເບົາ, ການປະສານສົມທົບລະຫວ່າງສູນກາງ ກັບ ທ້ອງຖິ່ນ ບໍ່ທັນກົມກຽວ, ການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຍັງບໍ່ທັນໄດ້ດີເທົ່າທີ່ຄວນ.
3. ຜົນການກວດສອບ ເຫັນວ່າຍັງມີລັກສະນະຊໍ້າເຮື້ອ ໂດຍສະເພາະການລະເມີດກົດໝາຍ, ວິໄນແຜນການ-ການເງິນ ມີມູນຄ່າສູງ, ເຮັດໃຫ້ສັງຄົມຂາດຄວາມເຊື່ອໝັ້ນຕໍ່ການບໍລິຫານລັດ; ກອງປະຊຸມໄດ້ສະເໜີໃຫ້ອົງການຄຸ້ມຄອງເປົ້າໝາຍ ແລະ ເປົ້າໝາຍຖືກກວດສອບ ຮ່ວມກັນວິເຄາະ-ວິໄຈບັນຫາທີ່ສະສົມເປັນອັນລະອຽດ ອັນໃດສາມາດເກັບກູ້ຄືນໄດ້ ແລະ ບໍ່ສາມາດເກັບກູ້ຄືນໄດ້ ຫຼືມີຕົວຕົນ ແລະ ບໍ່ມີຕົວຕົນ ເພື່ອລາຍງານສະພາແຫ່ງຊາດພິຈາລະນາແກ້ໄຂ.
4. ກອງປະຊຸມເນັ້ນໜັກໃຫ້ຄະນະພັກ, ຄະນະນຳຂອງອົງການຄຸ້ມຄອງເປົ້າໝາຍ ແລະ ເປົ້າໝາຍທີ່ຖືກກວດສອບ ເປັນເຈົ້າການຊີ້ນຳ-ນຳພາແກ້ໄຂຜົນການກວດສອບຢ່າງເດັດຂາດ, ຖືເອົາການແກ້ໄຂການກວດສອບເປັນເງື່ອນໄຂໃນການປະເມີນການແຂ່ງຂັນຮັກຊາດ ແລະ ພັດທະນາ, ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ.
5. ກອງປະຊຸມຊົມເຊີຍກະຊວງການເງິນ ທີ່ໄດ້ເອົາໃຈໃສ່ແກ້ໄຂຜົນການກວດສອບໃນ 6 ເດືອນຕົ້ນປີຢ່າງຕັ້ງໜ້າ, ພ້ອມທັງສະເໜີໃຫ້ສືບຕໍ່ເສີມຂະຫຍາຍແກ້ໄຂຜົນການກວດສອບໃນ 6 ເດືອນທ້າຍປີ ໃຫ້ໄດ້ຫຼາຍຂຶ້ນກວ່າເກົ່າ ເພື່ອເປັນແບບຢ່າງທີ່ດີໃຫ້ຫົວໜ່ວຍງົບປະມານອື່ນ.
6. ກອງປະຊຸມສະເໜີໃຫ້ມີມາດຕະການຢ່າງເດັດຂາດ ແລະ ເຂັ້ມງວດ ຕໍ່ອົງການຄຸ້ມຄອງ ແລະ ເປົ້າໝາຍທີ່ຖືກກວດສອບ ທີ່ບໍ່ໃຫ້ການຮ່ວມມື, ບໍ່ສະໜອງຂໍ້ມູນ ແລະ ບໍ່ເຂົ້າຮ່ວມວຽກງານກວດສອບແຫ່ງລັດ.
ນອກຈາກການລາຍງານຂອງອົງການກວດສອບແຫ່ງລັດແລ້ວ, ກອງປະຊຸມຍັງໄດ້ຮັບຟັງການຊີ້ແຈງ ແລະ ໃຫ້ຄວາມກະຈ່າງແຈ້ງຈາກກະຊວງແຜນການ ແລະ ການລົງທຶນ, ກະຊວງການເງິນ ແລະ ທະນາຄານ ແຫ່ງ ສປປລາວ.