(ສພຊ) ເພື່ອເຮັດໃຫ້ສະມາຊິກພັກ, ພະນັກງານ-ລັດຖະກອນ ພາຍໃນສະພາແຫ່ງຊາດ ມີຄວາມຮັບຮູ້,ເຂົ້າໃຈ, ກໍາແໜ້ນ ຢ່າງເລິກເຊິ່ງຕໍ່ ແນວທາງນະໂຍບາຍຂອງພັກ ທີ່ວາງອອກໃນແຕລະໄລຍະ ເພື່ອເປັນບ່ອນອີງໃນການຜັນຂະຫຍາຍເຂົ້າໃນ ການເຄື່ອນໄຫວວຽກງານຂອງສະພາແຫ່ງຊາດ ແລະ ສູ້ຊົນຈັດຕັ້ງປະຕິບັດໃຫ້ໄດ້ຮັບຜົນສໍາເລັດ. ໃນວັນທີ 20 ຕຸລາ 2023 ຄະນະບໍລິຫານງານພັກສະພາແຫ່ງຊາດ ໄດ້ຈັດກອງປະຊຸມເຜີຍແຜ່, ເຊື່ອມຊຶມ ຜົນສຳເລັດຂອງກອງປະຊຸມຄົບຄະນະກາງສະໄໝ ຂອງຄະນະບໍລິຫານງານສູນກາງພັກ ສະໄໝທີ XI, ຄຳສັ່ງຂອງຄະນະເລຂາທິການສູນກາງພັກ, ຄຳແນະນຳຂອງຄະນະຈັດຕັ້ງສູນກາງພັກ ວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ ໂດຍການເປັນປະທານຂອງສະຫາຍ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງເລຂາຄະນະບໍລິຫານງານພັກສະພາແຫ່ງຊາດ, ຮອງປະທານຄະນະປະຈໍາສະພາແຫ່ງຊາດ. ເຂົ້າຮ່ວມກອງປະຊຸມດັ່ງກ່າວມີບັນດາສະຫາຍ ຄະນະບໍລິຫານງານພັກສະພາແຫ່ງຊາດ, ຄະນະປະຈຳສະພາແຫ່ງຊາດ, ບັນດາທ່ານປະທານກໍາມາທິການ, ເລຂາທິການສະພາແຫ່ງຊາດ, ຮອງປະທານກຳມາທິການ, ຮອງເລຂາທິການສະພາແຫ່ງຊາດ, ຮອງຫົວໜ້າສະຖາບັນຄົ້ນຄວ້ານິຕິກຳສະພາແຫ່ງຊາດ, ຄະນະກົມ, ຄະນະພະແນກ, ສະມາຊິກພັກ, ພະນັກງານ-ລັດຖະກອນເຂົ້າຮ່ວມຢ່າງພ້ອມພຽງ.
ກອງປະຊຸມ, ໄດ້ຮັບຟັງການເຜີຍແຜ່, ເຊື່ອມຊືມ ບັນດາເອກະສານສໍາຄັນຂອງພັກ ເປັນຕົ້ນ ຄຳສັ່ງແນະນຳວ່າດ້ວຍການຜັນຂະຫຍາຍຜົນສຳເລັດຂອງກອງປະຊຸມຄົບຄະນະກາງສະໄໝ ຂອງຄະນະບໍລິຫານງານສູນກາງພັກ ສະໄໝທີ XI ຂອງພັກ ສະບັບເລກທີ 434/ຄລສພ, ລົງວັນທີ 18 ກັນຍາ 2023; ຮັບຟັງການເຜີຍແຜ່ຄຳແນະນຳ ຂອງຄະນະໂຄສະນາອົບຮົມສູນກາງພັກ ສະບັບເລກທີ 232/ຄອສພ, ລົງວັນທີ 28 ກັນຍາ 2023; ເຜີຍແຜ່ມະຕິກອງປະຊຸມຄົບຄະນະກາງສະໄໝຂອງຄະນະບໍລິຫານງານສູນກາງພັກ ສະໄໝທີ XI; ເຜີຍແຜ່ເອກະສານຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XI, ເຜີຍແຜ່ເອກະສານຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ໃນໄລຍະກາງສະໄໝ; ເຜີຍແຜ່ບົດລາຍງານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX (2021-2025) ກາງສະ ໄໝ ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ແລະ ທິດທາງແຜນການທ້າຍສະໄໝຮອດປີ 2025; ເຜີຍແຜ່ບົດສໍາຫຼວດການນຳພາລວມ ໃນໄລຍະກາງສະໄໝ ຂອງຄະນະບໍລິຫານງານສູນກາງພັກ ສະໄໝທີ XI; ເຜີຍແຜ່ຄວາມເຫັນສະຫຼຸບວາລະເປີດກວ້າງ ແລະ ວາລະພາຍໃນ ຂອງສະຫາຍເລຂາທິການໃຫຍ່; ເຜີຍແຜ່ມະຕິຂອງຄະນະບໍລິຫານງານສູນກາງພັກ ວ່າດ້ວຍສືບຕໍ່ຍູ້ແຮງການຜັນຂະຫຍາຍແນວທາງປ່ຽນແປງໃໝ່ສູ່ລວງເລິກສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ ໃນການນຳພາຂອງພັກ (ສະບັບເລກທີ 05/ຄບສພ, ລົງວັນທີ 5 ກັນຍາ 2023); ເຜີຍແຜ່ແຜນດຳເນີນງານ ເພື່ອຜັນຂະຫຍາຍມະຕິ ວ່າດ້ວຍສືບຕໍ່ຍູ້ແຮງການຜັນຂະຫຍາຍແນວທາງປ່ຽນແປງໃໝ່ ສູ່ລວງເລິກ, ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ ໃນການນຳພາຂອງພັກ ສະບັບເລກທີ 432/ຄລສພ, ລົງວັນທີ 8 ກັນຍາ 2023; ຄຳສັ່ງ ຂອງຄະນະເລຂາທິການສູນກາງພັກ ວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ ສະບັບເລກທີ 411/ຄລສພ, ລົງວັນທີ 8 ສິງຫາ 2023; ຄຳແນະນຳຂອງຄະນະຈັດຕັ້ງສູນກາງພັກ ກ່ຽວກັບການຈັດຕັ້ງປະຕິບັດຄຳສັ່ງ ຂອງຄະນະເລຂາທິການສູນກາງພັກ ວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນ ສະບັບເລກທີ 211/ຄຈສພ, ລົງວັນທີ 16 ສິງຫາ 2023; ຄຳແນະນຳຂອງຄະນະກວດກາສູນກາງພັກ ກ່ຽວກັບການກະກຽມ ແລະ ດຳເນີນຊີວິດການເມືອງທ້າຍສະໄໝກອງປະຊຸມໃຫຍ່ 3 ຂັ້ນຂອງພັກ ສະບັບເລກທີ 285/ຄກສພ, ລົງວັນທີ 15 ກັນຍາ 2023; ພ້ອມນັ້ນ ກອງປະຊຸມ ຍັງໄດ້ຜ່ານມະຕິຂອງຄະນະປະຈຳສະພາແຫ່ງຊາດ ວ່າດ້ວຍການອະນຸມັດໃຫ້ພະນັກງານຮັບອຸດໜູນບຳນານ, ສັບຊ້ອນຍົກຍ້າຍບຸກຄະລາກອນ ແລະ ເລື່ອນຕໍາແໜ່ງບໍລິຫານ ໃຫ້ພະນັກງານຈໍານວນໜຶ່ງ ຕາມຄວາມສາມາດ ແລະ ຄວາມຮຽກຮ້ອງຕ້ອງການຂອງໜ້າທີ່ວຽກງານຢູ່ ພາຍໃນສະພາແຫ່ງຊາດ ຕາມກົດໝາຍວ່າດ້ວຍພະນັກງານ-ລັດຖະກອນ.
ຕອນທ້າຍຂອງກອງປະຊຸມ ສະຫາຍ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງເລຂາຄະນະບໍລິຫານງານພັກສະພາແຫ່ງຊາດ, ຮອງປະທານຄະນະປະຈໍາສະພາແຫ່ງຊາດ, ປະທານກອງປະຊຸມ ໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນໍາ ຕໍ່ກອງປະຊຸມ ຊຶ່ງສາມາດສັງລວມເນື້ອໃນສໍາຄັນໄດ້ ວ່າ: ບັນດາເອກະສານ ກ່ຽວກັບຜົນສໍາເລັດການດໍາເນີນກອງປະຊຸມກາງສະໄໝ ຂອງຄະນະບໍລິຫານງານສູນກາງພັກ ສະໄໝທີ XI ເປັນເອກະສານທີ່ມີຄວາມສໍາຄັນຫຼາຍ ໃນການຈັດຕັ້ງຜັນຂະຫຍາຍ ເຂົ້າໃນການເຄື່ອນໄຫວວຽກງານ ຂອງບັນດາກົງຈັກການຈັດຕັ້ງພາຍໃນສະພາແຫ່ງຊາດ ໂດຍສະເພາະ ບັນດາກໍາມາທິການ, ຄະນະເລຂາທິການສະພາແຫ່ງຊາດ, ສະຖາບັນຄົ້ນຄວ້ານິຕິກໍາສະພາແຫ່ງຊາດ ລວມທັງບັນດາສະຫາຍ ສະມາຊິກພັກ, ພະນັກງານ-ລັດຖະກອນ ທົ່ວສະພາແຫ່ງຊາດ ໃຫ້ນໍາເອົາເນື້ອໃນຈິດໃຈຂອງເອກະສານດັ່ງກ່າວ ສືບຕໍ່ຄົ້ນຄວ້າຮໍ່າຮຽນໃຫ້ເລິກເຊິ່ງ ແລະ ຈັດຕັ້ງຜັນຂະຫຍາຍເຂົ້າໃນວຽກງານຂອງຕົນ ໃຫ້ມີການຫັນປ່ຽນໃໝ່ທີ່ຕັ້ງໜ້າຂຶ້ນຕື່ມ.
ໂອກາດດັ່ງກ່າວ ສະຫາຍ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງເລຂາຄະນະບໍລິ ຫານງານພັກສະພາແຫ່ງຊາດ, ຮອງປະທານຄະນະປະຈໍາສະພາແຫ່ງຊາດ, ປະທານກອງປະຊຸມ ຍັງໄດ້ມີຄໍາເຫັນເນັ້ນຕໍ່ກອງປະຊຸມ 6 ຂໍ້ດັ່ງນີ້:
1. ສະເໜີໃຫ້ບັນດາສະຫາຍ ເລຂາໜ່ວຍພັກຮາກຖານ, ຄະນະພັກຮາກຖານ, ສະມາຊິກພັກ ທົ່ວສະພາແຫ່ງຊາດ ຈົ່ງໄດ້ເພີ່ມທະວີການສຶກສາອົບຮົມການເມືອງ-ແນວຄິດ ໃຫ້ແກ່ພະນັກງານ-ລັດຖະກອນ ທີ່ຢູ່ໃນກົງຈັກການຈັດຕັ້ງຂອງຕົນ ໃຫ້ມີຄວາມອົດທົນ, ຕັ້ງໜ້າປະຕິບັດໜ້າທີ່ວຽກງານ, ພ້ອມກັນສູ້ຊົນຜ່ານຜ່າອຸປະສັກ, ຄວາມຫຍຸ້ງຍາກ ໃຫ້ສາມາດຫຼຸດພົ້ນໄປໄດ້ ເພື່ອເຮັດໃຫ້ຊີວິດການເປັນຢູ່ໄດ້ຮັບການປັບປຸງດີຂຶ້ນ, ມີສະຕິຕໍ່ການບໍລິໂພກຂ່າວໃນສື່ສັງຄົມອອນລາຍ ທີ່ມີການໂຄສະນາໂຈມຕີ, ໃສ່ຮ້າຍປ້າຍສີພັກ-ລັດ ແລະ ລະບອບໃໝ່ຂອງພວກເຮົາ.
2. ສະເໜີມາຍັງບັນດາກໍາມາທິການ ເພີ່ມທະວີຄວາມເອົາໃຈໃສ່ ຄົ້ນຄວ້າເນື້ອໃນຂອງບົດລາຍງານຢ່າງເລິກເຊິ່ງ, ຊອກໃຫ້ເຫັນຄາດໝາຍໃດທີ່ສາມາດບັນລຸຕາມແຜນການ, ຄາດໝາຍໃດບໍ່ສາມາດບັນລຸ, ຈະມີມາດຕະການແກ້ໄຂແນວໃດ ແລະ ອື່ນໆ; ກະກຽມບົດປະກອບຄໍາເຫັນ, ຄໍາຖາມເຈາະຈີ້ມ, ຄໍາຊັກຖາມ, ຮ່າງມະຕິກອງປະຊຸມ ໃຫ້ມີເນື້ອໃນໜັກແໜ້ນ, ຮັດກຸມ ເພື່ອເຮັດໃຫ້ການຕົກລົງຂອງ ກອງປະຊຸມສະພາແຫ່ງຊາດ ກາຍເປັນນິຕິກໍາທີ່ສັກສິດ ແລະ ສາມາດຈັດຕັ້ງ ປະຕິບັດໄດ້ຮັບຜົນດີ.
3. ການສ້າງ ແລະ ປັບປຸງກົດໝາຍ ເປັນບົດບາດສໍາຄັນອັນໜຶ່ງຂອງສະພາແຫ່ງຊາດ ເຊິ່ງຈະເປັນບ່ອນອີງໃນ ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ຈຶ່ງສະເໜີໃຫ້ບັນດາກໍາມາທິການທີ່ກ່ຽວຂ້ອງ ເພີ່ມທະວີຄວາມເອົາໃຈໃສ່ຕໍ່ວຽກງານດັ່ງກ່າວ ໂດຍສະເພາະແມ່ນບັນດາກົດໝາຍທີ່ຈະນໍາເຂົ້າພິຈາລະນາ ແລະ ຮັບຮອງເອົາໃນກອງປະຊຸມສະໄໝ ສາມັນ ເທື່ອທີ 6 ຂອງສະພາແຫ່ງຊາດໜ້ານີ້.
4. ສະເໜີໃຫ້ ຄະນະເລຂາທິການສະພາແຫ່ງຊາດ ເປັນໃຈກາງ ໃນການສ້າງສິ່ງເອື້ອອໍານວຍຄວາມສະດວກ ຮອບດ້ານ ໃຫ້ແກ່ການດໍາເນີນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX.
5. ໃນກອງປະຊຸມເຜີຍແຜ່, ເຊື່ອມຊຶມຄັ້ງນີ້, ນອກຈາກທີ່ໄດ້ເຜີຍແຜ່ເອກະສານສໍາຄັນຂອງພັກແລ້ວ, ຄະນະບໍລິຫານງານພັກສະພາແຫ່ງຊາດ ຍັງໄດ້ແຈ້ງກ່ຽວກັບການຕົກລົງປະຕິບັດນະໂຍບາຍຕໍ່ ບຸກຄະລາກອນຂອງສະພາແຫ່ງຊາດ ທີ່ຄົບເງື່ອນໄຂຮັບນະໂຍບາຍອຸດໜູນບໍານານຈໍານວນ 2 ສະຫາຍ ແລະ ການສັບຊ້ອນຍົກຍ້າຍ ແລະ ການເລື່ອນຕໍາແໜ່ງບໍລິຫານໃຫ້ພະນັກງານຈໍານວນໜຶ່ງ ຕາມກົດໝາຍວ່າດ້ວຍພະນັກງານ-ລັດຖະກອນ, ຕາມຄວາມສາມາດ ແລະ ຄວາມຮຽກຮ້ອງຕ້ອງການຂອງໜ້າທີ່ວຽກງານ ຢູ່ພາຍໃນສະພາແຫ່ງຊາດ.
6. ກອງປະຊຸມເຜີຍແຜ່, ເຊື່ອມຊຶມເທື່ອນີ້ ຄະນະບໍລິຫານງານພັກສະພາແຫ່ງຊາດ ໄດ້ປະກາດການສັບຊ້ອນບ່ອນປະຈໍາການ ແລະ ການແຕ່ງຕັ້ງຕໍາແໜ່ງບໍລິຫານຈໍານວນໜຶ່ງ ເພື່ອປັບປຸງວຽກງານໃຫ້ນັບມື້ມີປະສິດທິຜົນສູງຂຶ້ນ, ບັນດາ ສະຫາຍທີ່ມີຜົນສໍາເລັດ, ມີປະສົບປະການໃນວຽກງານໃດໜຶ່ງແລ້ວ ກໍໃຫ້ນໍາເອົາໄປປັບປຸງວຽກງານຢູ່ຂົງເຂດອື່ນໃຫ້ມີ ບາດກ້າວຫັນປ່ຽນທີ່ດີຂຶ້ນຕື່ມ. ສໍາລັບບັນດາສະຫາຍທີ່ໄດ້ຮັບການແຕ່ງຕັ້ງຕໍາແໜ່ງບໍລິຫານໃດໜຶ່ງ ກໍສະເໜີໃຫ້ຕັ້ງໜ້າປະຕິບັດວຽກງານ ໃຫ້ມີຜົນສໍາເລັດໃໝ່, ເປັນກໍາລັງແຮງໃຫ້ແກ່ກົງຈັກຂອງຕົນ ໃນການປະຕິບັດວຽກງານໃຫ້ດີຂຶ້ນ.
(ພາບ: ນາງ ກຸກກິກ ບຸດດາໄຊ; ຂ່າວ: ນາງ ໄຊໂສພາພອນ ມິ່ງມຸງຄຸນ)