(ສພຊ) ວັນທີ 13 ມີນາຜ່ານມາ,  ທີ່ຫໍວັດທະນະທໍາແຫ່ງຊາດ ນະຄອນຫລວງວຽງຈັນ, ກໍາມາທິການກົດໝາຍ ​ແລະ ກໍາມາ​ທິການ​ວັດທະນະທໍາ-ສັງຄົມ ສະພາແຫ່ງຊາດ ຮ່ວມ​ກັບກະຊວງ​ຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໄດ້ຈັດກອງປະຊຸມກວດກາ​ເນື້ອ​ໃນ​ຮອບດ້ານຂອງ ຮ່າງ​ກົດໝາຍວ່າ​ດ້ວຍປ້າຍ ໂດຍການເປັນປະທານຂອງທ່ານ ສົມພັນ ແພງຄໍາມີ ຮອງປະທານ​ສະພາ​ແຫ່ງ​ຊາດ; ເຂົ້າຮ່ວມມີບັນດາປະທານ-ຮອງປະທານກໍາມາທິການ, ຮອງລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ຜູ້​ຕາງໜ້າຈາກຫ້ອງ​ວ່າການ​ປະທານ​ປະ​ເທດ, ຫ້ອງ​ວ່າການ​ສໍານັກງານ​ນາຍົກລັດຖະມົນຕີ, ​ກະຊວງ​ຍຸຕິ​ທໍາ,  ບັນດາ​ຫົວໜ້າ-ຮອງ​ຫົວໜ້າກົມ ​ແລະ ລັດຖະກອນ ຈໍານວນໜຶ່ງ ຂອງ​ສະພາ​ແຫ່ງ​ຊາດ ​ແລະ ກະຊວງ​ຖະແຫລງຂ່າວ, ວັດທະນະທໍາ ແລະ ທ່ອງທ່ຽວ.

ຮ່າງ​ກົດໝາຍສະບັບ​ນີ້ ​ເປັນ​ກົດໝາຍທີ່​ສ້າງ​ໃໝ່, ປະກອບມີ 11 ພາກ, 6 ໝວດ ​ແລະ 59 ມາດຕາ ​ເຊິ່ງ​ໄດ້​ຜ່ານ​ການທາ​ບທາມຕາມ​ຂັ້ນ​ຕອນ​ຂອງ​ການ​ສ້າງ ​ແລະ ປັບປຸງ​ກົດໝາຍ ​ເຊິ່ງ​ໄດ້​ຜ່ານ​ກອງ​ປະຊຸມ​ລັດຖະບານ​ມາ​ແລ້ວ. ສະ​ນັ້ນ​, ເພື່ອ​ເຮັດ​ໃຫ້​ເນື້ອ​ໃນຂອງ​ກົດໝາຍສະບັບນີ້  ມີ​ຄວາມ​ຈະ​ແຈ້ງ ​ແລະ ຄົບ​ຖ້ວນນັ້ນ, ຄະນະ​ປະ​ຈໍາ​ສະພາ​ແຫ່ງ​ຊາດ ຈຶ່ງ​ໄດ້​ມອບ​ໃຫ້​ກໍາມາ​ທິການ​ກົດໝາຍ ຮ່ວມ​ກັບກໍາມາ​ທິການ​ວັດທະນະທໍາ-ສັງຄົມ​ ສະພາແຫ່ງຊາດ ຄົ້ນຄວ້າ​ກວດກາຮອບດ້ານ ທາງ​ດ້ານ​ເຕັກນິກ, ຄວາມ​ສອດຄ່ອງ​ກັບ​ກົດໝາຍ, ລວມທັງ​ຄວາມ​ຈໍາ​ເປັນ ​ແລະ ຄວາມ​ສໍາຄັນ ຂ​ອງກົດໝາຍສະບັບ​ດັ່ງກ່າວ ​ເພື່ອ​ລາຍ​ງານ​ຄືນ​ໃຫ້​ຄະນະ​ປະ​ຈໍາ​ສະພາ​ແຫ່ງ​ຊາດ ພິຈາລະນາ​ ເອົາ​ເຂົ້າ​ໃນ​ວາລະກອງ​ປະຊຸມ​ສະ​ໄໝສາມັນ​ເທື່ອ​ທີ 5 ຂອງ​ສະພາ​ແຫ່ງ​ຊາດຊຸດ​ທີ VIII ເຊິ່ງ​ຈະ​ຈັດ​ໃນ​ມໍ່ໆນີ້.

(ກົມໂຄສະນາ ແລະ ຕີຄວາມໝາຍກົດໝາຍ)