(ສພຊ) ໃນຕອນເຊົ້າວັນທີ 31 ສິງຫາ 2023 ທ່ານ ຮສ. ປອ. ລິນຄໍາ ດວງສະຫວັນ ກໍາມະການສໍາຮອງສູນກາງພັກ, ກຳມະການຄະນະປະຈໍາສະພາແຫ່ງຊາດ, ປະທານກໍາມາທິການເສດຖະກິດ ເຕັກໂນໂລຊີ ແລະ ສິ່ງແວດລ້ອມ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມກວດກາ ແລະ ຊຸກຍູ້ວຽກງານການຈັດຕັ້ງປະຕິບັດໂຄງການກໍ່ສ້າງ ແລະ ບູລະນະສ້ອມແປງແນວປ້ອງກັນຕາຝັ່ງເຈື່ອນຕາມແລວແມ່ນໍ້າຂອງ ຢູ່ເຂດເມືອງສີສັດຕະນາກ ແລະ ເມືອງຫາດຊາຍຟອງ ນະຄອນຫຼວງວຽງຈັນ ຮ່ວມກັບ ສະພາປະຊາຊົນນະຄອນຫຼວງວຽງຈັນ ແລະ ຂະແໜງການທີ່ກ່ຽວຂ້ອງຂອງ ນະຄອນຫຼວງວຽງຈັນ ເຊິ່ງຄະນະໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດວຽກງານການກໍ່ສ້າງ ແລະ ບູລະນະສ້ອມແປງແນວປ້ອງກັນຕາຝັ່ງເຈື່ອນຕາມແລວແມ່ນໍ້າຂອງ ລາຍງານໂດຍ ຫົວໜ້າພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ. ຫຼັງຈາກນັ້ນ, ຄະນະນຳ ແລະ ພາກສ່ວນທີ່ກ່ຽວຂ້ອງຂອງ ນະຄອນຫຼວງວຽງຈັນ ໄດ້ລົງໄປເບິ່ງເຂດທີ່ກຳລັງມີການກໍ່ສ້າງຕາຝັ່ງເຈື່ອນຢູ່ 2 ຈຸດຄື: ໂຄງການກໍ່ສ້າງຕາຝັ່ງເຈື່ອນເຂດຫຼັກ 3 ບ້ານວັດນາກ ເມືອງສີສັດຕະນາກ ຫາ ບ້ານຫາດດອກແກ້ວ ເມືອງຫາດຊາຍຟອງ ແລະ ຈຸດທີ 2 ແມ່ນຢູ່ເຂດ ບ້ານຫ້ອມ ເມືອງຫາດຟາຍຟອງ.

ຜົນຂອງການລົງຊຸກຍູ້ ແລະ ຕິດຕາມກວດກາ ຄັ້ງນີ້ ກຳໄດ້ ສະພາບການກໍ່ສ້າງ, ຜົນສຳເລັດ, ບັນຫາສິ່ງທ້າທາຍ, ຂໍ້ຄົງຄ້າງຈຳນວນໜຶ່ງ ແລະ ຄຳຄິດຄຳເຫັນໃນການແກ້ໄຂໃນຕໍ່ໜ້າ ເພື່ອສັງລວມ ແລະ ລາຍງານຕໍ່ ຄະນະປະຈຳສະພາແຫ່ງຊາດ.