ກອງປະຊຸມ ພົບປະແລກປ່ຽນບົດຮຽນ ວຽກງານຮອບດ້ານຂອງຄະນະເລຂາທິການສະພາປະຊາຊົນແຂວງລະຫວ່າງ ສະພາປະຊາຊົນ 6 ແຂວງພາກເໜືອ ຫລວງນ້ໍາທາ, ບໍ່ແກ້ວ, ອຸດົມໄຊ,ຫົວພັນ, ຊຽງຂວາງ, ຜົ້ງສາລີ ໄດ້ຈັດຂຶ້ນໃນລະຫວ່າງວັນທີ  22-24 ພຶດສະພາ 2024, ທີ່ເມືອງຜົ້ງສາລີ ແຂວງຜົ້ງສາລີ ໂດຍການເປັນປະທານຮ່ວມ ຂອງ ທ່ານ ທອງສີ ເສົາສຸລິພົມ ຮອງເລຂາພັກແຂວງ ປະທານສະພາປະຊາຊົນແຂວງຜົ້ງສາລີ, ພ້ອມດ້ວຍປະທານ, ຮອງປະທານສະພາປະຊາຊົນ 6 ແຂວງ, ມີເລຂາທິການ, ຮອງເລຂາທິການ, ຫົວໜ້າຂະແໜງ, ຮອງຂະແໜງ, ພະນັກງານ-ລັດຖະກອນ ທີ່ຂຶ້ນກັບຄະນະເລຂາທິການສະພາປະຊາຊົນ 6 ແຂວງພາກເໜືອເຂົ້າຮ່ວມທັງໝົດ 70 ກວ່າທ່ານ

ໃນກອງປະຊຸມ ທ່ານ ນາງ ພອນສະຫວັນ ສັກຕິຄຸນ  ເລຂາທິການສະພາປະຊາຊົນແຂວງຜົ້ງສາລີ ໄດ້ຂຶ້ນສະເໜີບົດຮຽນກ່ຽວກັບການເປັນເສນາທິການວຽກງານຮອບດ້ານໃຫ້ແກ່ຄະນະປະຈຳສະພາປະຊາຊົນແຂວງ ເປັນຕົ້ນວຽກງານຄົ້ນຄວ້າ-ສັງລວມເນື້ອໃນ, ການຄຸ້ມຄອງວຽກງານບໍລິຫານ, ແຜນການ ແລະ ການເງິນ, ການຄຸ້ມຄອງວຽກງານຈັດຕັ້ງ-ພະນັກງານ ແລະ ການພົວພັນປະສານງານ; ທ່ານ ມີໄຊ ມີວິໄລ ເລຂາທິການສະພາປະຊາຊົນແຂວງຫຼວງນໍ້າທາ ໄດ້ຂຶ້ນສະເໜີ ບົດຮຽນກ່ຽວກັບການກະກຽມຮ່າງບົດສະຫຼຸບການຈັດຕັ້ງປະຕິບັດແຜນການເຄື່ອນໄຫວວຽກງານຂອງຄະນະປະຈຳສະພາປະຊາຊົນແຂວງ, ທ່ານ ນາງ ວັນສີ ພວງມາໄລ ເລຂາທິການສະພາປະຊາຊົນແຂວງອຸດົມໄຊ ໄດ້ຂຶ້ນສະເໜີບົດຮຽນກ່ຽວກັບການກະກຽມຮ່າງບົດສະຫຼຸບການຈັດຕັ້ງປະຕິບັດແຜນການເຄື່ອນໄຫວວຽກງານຂອງຄະນະເລຂາທິການສະພາປະຊາຊົນແຂວງ, ທ່ານ ບຸນພັດ ສີສົມບັດ ເລຂາທິການສະພາປະຊາຊົນແຂວງບໍ່ແກ້ວ ໄດ້ຂຶ້ນສະເໜີບົດຮຽນກ່ຽວກັບການກະກຽມສ້າງແຜນການ, ໜັງສືເຊີນ ແລະ ການສັງລວມບັນດາເນື້ອໃນໃຫ້ແກ່ກອງປະຊຸມປະທານ-ຮອງປະທານ ແລະ ກອງປະຊຸມຄະນະປະຈຳສະພາປະຊາຊົນແຂວງ, ທ່ານ  ສຸກມີໄຊ  ສິງບຸນເຮືອງ ຮອງເລຂາທິການສະພາປະຊາຊົນແຂວງຫົວພັນ ໄດ້ຂຶ້ນສະເໜີບົດຮຽກ່ຽວກັບການພົວພັນປະສານງານກັບບັນດາກົງຈັກການຈັດຕັ້ງພາຍໃນສະພາປະຊາຊົນແຂວງ, ອົງການປົກຄອງແຂວງ, ພາກສ່ວນທີ່ກ່ຽວຂ້ອງໃນການກະກຽມ ແລະ ສະໜອງຂໍ້ມູນໃຫ້ແກ່ການດຳເນີນກອງປະຊຸມຂອງສະພາປະຊາຊົນແຂວງ, ທ່ານ ຄຳຫຼ້າ ແສງຄຳຢອງ  ຮອງເລຂາທິການສະພາປະຊາຊົນແຂວງຊຽງຂວາງ ໄດ້ຂຶ້ນສະເໜີບົດຮຽນກ່ຽວກັບການກະກຽມຮ່າງບົດສະຫຼຸບການຈັດຕັ້ງປະຕິບັດແຜນການເຄື່ອນໄຫວວຽກງານຂອງສະພາປະຊາຊົນແຂວງ.

ພ້ອມນັ້ນບັນດາທ່ານຜູ້ແທນທີ່ເຂົ້າຮ່ວມກອງປະຊຸມ ໄດ້ພ້ອມກັນເຊີດຊູຄວາມຮັບຜິດຊອບ, ສຸມສະຕິປັນຍາເຂົ້າໃນການຄົ້ນຄວ້າ, ປະກອບຄວາມເຫັນ ແລະ ຕົກລົງບັນດາບັນຫາຕ່າງໆ ໃຫ້ຖຶກຕ້ອງ ແລະສອດຄ່ອງກັບສະພາບຄວາມເປັນຈິງ, ພ້ອມທັງແລກປ່ຽນບົດຮຽນກ່ຽວກັບການເປັນເສນາທິການວຽກງານຮອບດ້ານຂອງຄະນະເລຂາທິການ, ຄະນະປະຈຳສະພາປະຊາຊົນແຂວງ; ເປັນຕົ້ນ:ວຽກງານຄົ້ນຄວ້າ-ສັງລວມເນື້ອໃນ, ການຄຸ້ມຄອງວຽກງານບໍລິຫານ, ແຜນການ ແລະ ການເງິນ, ການຄຸ້ມຄອງວຽກງານຈັດຕັ້ງ-ພະນັກງານ ແລະ ການພົວພັນປະສານງານ ໃນໄລຍະຜ່ານມາ, ດ້ານດີ, ຜົນງານທີ່ພົ້ນເດັ່ນ, ດ້ານອ່ອນຂໍ້ຄົງຄ້າງ ແລະ ສາຍເຫດພາໃຫ້ມີ ດ້ານດີ, ດ້ານອ່ອນ ແລະ ບົດຮຽນໃນການຈັດຕັ້ງວຽກງານ ຂອງຄະນະເລຂາທິການສະພາປະຊາຊົນແຂວງໃນຕໍ່ໜ້າ  ທັງນີ້ກໍເພື່ອເຮັດໃຫ້ວຽກງານເສນາທິການໃຫ້ແກ່ຄະນະປະຈໍາສະພາປະຊາຊົນແຂວງນັບມື້ມີຄຸນນະພາບຂຶ້ນເລື້ອຍໆ.

ກອງປະຊຸມຍັງໄດ້ປຶກສາຫາລື ແລະ ເອກະພາບກັນໂດຍພື້ນ ຖານກ່ຽວກັບທັດສະນະຊີ້ນໍາ, ທິດທາງ, ຄາດໝາຍສູ້ຊົນ, ໜ້າທີ່ ແລະ ວຽກງານຈຸດສຸມຈໍານວນ ໜື່ງ ເພື່ອສືບຕໍ່ຈັດຕັ້ງປະຕິບັດວຽກງານການເປັນເສນາທິການຮອດດ້ານ ໃນປີຕໍ່ໜ້ານີ້ ໃຫ້ກາຍເປັນຂະບວນການທີ່ເຂັ້ມແຂງ, ກ້ວາງຂວາງ, ເລີກເຊີ່ງ ແລະ ມີປະສິດທິຜົນສູງ ກວ່າເກົ່າ.

ໃນໂອກາດພົບປະແລກປ່ຽນບົດຮຽນຄະນະເລຂາທິການສະພາປະຊາຊົນ 6 ແຂວງພາກເໜືອໃນຄັ້ງນີ້ບັນດາທ່ານຜູ້ແທນກອງປະຊຸມໄດ້ພ້ອມກັນສ້າງກິດຈະກຳກິລາບານເຕະມິດຕະພາບ ເພື່ອສ້າງຄວາມສາມັກຄີຮັກແພງເຊິ່ງກັນ ແລະ ກັນ ລະຫວ່າງສະພາປະຊາຊົນທັງ 6 ແຂວງ, ພ້ອມນັ້ນຍັງໄດ້ໄປທ່ຽວຊົມ ແລະ ກາບໄຫວ້ພະທາດມິ່ງຂວັນພູຟ້າ ອັນເປັນສິ່ງສັກກະລະບູຊາ ແລະ   ເປັນພະທາດຄູ່ບ້ານຄູ່ເມືອງຂອງຊາວຜົ້ງສາລີ.

ໂດຍ ນາງ ອໍາພອນ ສີປະເສີດ