ປະຕິບັດຕາມບົດບັນທຶກແລກປ່ຽນບົດຮຽນຂອງສະພາປະຊາຊົນ 02 ແຂວງ ໃນປີ 2023 ຜ່ານມາ ທີ່ສະພາປະຊົນແຂວງສາລະວັນ, ໃນຕອນເຊົ້າຂອງວັນທີ 01 ເມສາ 2024 ນີ້, ສະພາປະຊາຊົນແຂວງສາລະວັນໄດ້ເຄື່ອນໄຫວພົບປະແລກປ່ຽນບົດຮຽນ ກັບສະພາປະຊາຊົນແຂວງຫຼວງນໍ້າທາ , ເຊິ່ງການເເລກປ່ຽນຄັ້ງນີ້ໄດ້ຈັດຂຶ້ນທີ່ຫ້ອງປະຊຸມ ສະພາປະຊາຊົນແຂວງຫຼວງນ້ຳທາ ໄດ້ຈັດກອງປະຊຸມພົບປະແລກປ່ຽນບົດຮຽນ ລະຫວ່າງ ສະພາປະຊາຊົນແຂວງຫຼວງນໍ້າທາ ກັບ ສະພາປະຊາຊົນແຂວງສາລະວັນ; ຄະນະຜູ້ແທນສະພາປະຊາຊົນແຂວງຫຼວງນໍ້າທາ ນໍາໂດຍທ່ານ ຄໍາຟອງ ອິນມານີ ຮອງເລຂາຄະນະບໍລິຫານງານພັກແຂວງ, ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 03, ປະທານສະພາປະຊາຊົນແຂວງຫຼວງນໍ້າທາ ເປັນຫົວໜ້າຄະນະ; ຄະນະຜູ້ແທນສະພາປະຊາຊົນແຂວງສາລະວັນ ນໍາໂດຍທ່ານ ສີເຮັງ ຫອມສົມບັດ ຮອງເລຂາຄະນະບໍລິຫານງານພັກແຂວງ, ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 14, ປະທານສະພາປະຊາຊົນແຂວງສາລະວັນ ເປັນຫົວໜ້າຄະນະ, ມີບັນດາທ່ານ ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ຄະນະກໍາມະການ, ຄະນະເລຂາທິການ, ຕາງໜ້າຄະນະນໍາພະແນກການ, ດ່ານສາກົນຂອງແຂວງສາລະວັນ, ຫົວໜ້າ-ຮອງຫົວໜ້າຂະແໜງການ ໃນ 02 ສະພາປະຊາຊົນແຂວງ ເຂົ້າຮ່ວມກອງປະຊຸມ;

ໃນກອງປະຊຸມ ໄດ້ມີບັນຍາກາດທີ່ເຕັມໄປດ້ວຍໄມຕີຈິດມິດຕະພາບ ແລະ ຄວາມຮັກແພງສາມັກຄີ, ຄະນະຜູ້ແທນສະພາປະຊາຊົນສອງແຂວງ ມີການລາຍງານໃຫ້ຕ່າງຝ່າຍໄດ້ຮັບຊາບ ກ່ຽວກັບ ການເຄື່ອນໄຫວວຽກງານ ຂອງສະພາປະຊາຊົນແຂວງໃນໄລຍະຜ່ານມາ ເຊິ່ງເປັນບົດຮຽນອັນລໍ້າຄ່າໃນການປັບປຸງ ແລະ ຍົກສູງພາລະບົດບາດຂອງສະພາປະຊາຊົນແຂວງໃຫ້ສູງເດັ່ນຂຶ້ນໃນຕໍ່ໜ້າ, ວາລະດຽວກັນ ຄະນະຜູ້ແທນສອງແຂວງ ໄດ້ມີຄໍາເຫັນແລກປ່ຽນບົດຮຽນເຊິ່ງກັນ ແລະ ກັນ ໂດຍສະເພາະ ການຈັດຕັ້ງປະຕິບັດ 3 ພາລະບົດບາດ ຂອງສະພາປະຊາຊົນແຂວງ ຄື: ດ້ານນິຕິກໍາ, ດ້ານການຕົກລົງບັນຫາສໍາຄັນພື້ນຖານຂອງແຂວງ ຜ່ານກອງປະຊຸມສະພາປະຊາຊົນແຂວງ ແລະກອງປະຊຸມຄະນະປະຈໍາສະພາປະຊາຊົນແຂວງ ໂດຍສະເພາະການອອກມະຕິສະເພາະຂອງເມືອງ, ພະແນກ ການ ແລະ ດ້ານການຕິດຕາມກວດກາ; ວຽກງານປະສານສົມທົບ ກັບອົງການປົກຄອງແຂວງ ແລະ ພາກສ່ວນກ່ຽວຂ້ອງ; ການດໍາເນີນກອງປະຊຸມສະພາປະຊາຊົນແຂວງ; ການຄຸ້ມຄອງວຽກງານຈັດຕັ້ງ-ພະນັກງານ ເຊັ່ນ: ການກໍານົດຕໍາແໜ່ງງານ, ການປັບປຸງການຈັດຕັ້ງ ແລະ ສ້າງຕັ້ງກົງຈັກຊ່ວຍວຽກຄະນະປະຈໍາສະພາປະຊາຊົນແຂວງ ແລະ ຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງບັນດາເມືອງ; ແລກປ່ຽນບົດຮຽນໃນຫົວຂໍ້ອື່ນ ຕາມການເຈາະຈີ້ມ ແລະ ຂົງເຂດທີ່ມີຄວາມສົນໃຈ;

ພ້ອມດຽວກັນ, ສະພາທັງສອງແຂວງ ໄດ້ເປັນເອກະພາບກັນ ໃນບາງເນື້ອໃນສໍາຄັນ ເປັນຕົ້ນ: ສືບຕໍ່ເພີ່ມທະວີການພົວພັນຮ່ວມມື, ການແລກປ່ຽນຂໍ້ມູນຂ່າວສານ ແລະ ບົດຮຽນ ໃນການເຄື່ອນໄຫວວຽກງານຂອງສະພາປະຊາຊົນສອງແຂວງ ຫຼວງນໍ້າທາ-ສາລະວັນ ໃຫ້ນັບມື້ສະໜິດແໜ້ນ ແລະ ກ້າວຂຶ້ນສູ່ລະດັບສູງ; ສືບຕໍ່ພົບປະແລກປ່ຽນບົດຮຽນ ລະຫວ່າງ ຄະນະຜູ້ແທນຂອງສະພາປະຊາຊົນແຂວງຫຼວງນໍ້າທາ-ແຂວງສາລະວັນ ໂດຍການພັດປ່ຽນຢ້ຽມຢາມເຊິ່ງກັນ ແລະ ກັນ ຂອງສະພາປະຊາຊົນແຂວງ ແຕ່ລະຊຸດ ໃຫ້ໄດ້ 1 ຄັ້ງ;

ຕອນທ້າຍ ຕາງໜ້າຄະນະສະພາປະຊາຊົນ 2 ແຂວງ ຫຼວງນໍ້າທາ-ສາລະວັນ ໄດ້ລົງນາມເຊັນບົດບັນທຶກຊ່ວຍຈຳຮ່ວມກັນ ເພື່ອເປັນບ່ອນອີງໃນການຈັດຕັ້ງປະຕິບັດວຽກງານໃນຕໍ່ໜ້າໃຫ້ເກີດດອກອອກຜົນດີຂຶ້ນ;

ພາບ-ຂ່າວ: ດີລຳພົນ ພົມມະຈັນ