ໃນຕອນເຊົ້າຂອງວັນທີ27 ກໍລະກົດ 2023 ທີ່ຫ້ອງປະຊຸມສະພາປະຊາຊົນແຂວງໄດ້ເປີດກອງປະຊຸມພົບປະແລກປ່ຽນບົດຮຽນ ລະຫວ່າງສະພາປະຊາຊົນແຂວງສາລະວັນ ກັບສະພາປະຊາຊົນແຂວງເທື່ອທຽນເຫວ້ ສສ ຫວຽດນາມ ຊຶ່ງຄະນະຜູ້ແທນສະພາປະຊາຊົນແຂວງສາລະວັນ ນໍາໂດຍ ສະຫາຍ ສີເຮັງ ຫອມສົມບັດ ຮອງເລຂາພັກແຂວງ ປະທານສະພາປະຊາຊົນແຂວງ, ພ້ອມດ້ວຍບັນດາທ່ານຄະນະປະຈໍາ, ຄະນະກໍາມະການ, ຄະນະເລຂາທິການ, ສະມາຊິກສະພາປະຊາຊົນແຂວງ; ສ່ວນຄະນະຜູ້ແທນສະພາປະຊາຊົນແຂວງເທື່ອທຽນເຫວ້ ສສ ຫວຽດນາມ ນຳໂດຍ ສະຫາຍ ນາງ ຫງວຽນທິອ໊າຍເວິນ ກຳມະການພັກແຂວງ,ຮອງປະທານສະພາປະຊາຊົນແຂວງເທື່ອທຽນເຫວ້ ສສຫວຽດນາມ ພ້ອມດ້ວຍຄະນະ, ມີພະແນກການຂອງແຂວງສາລະວັນ, ພະນັກງານ-ລັດຖະກອນ ສະພາປະຊາຊົນແຂວງເຂົ້າຮ່ວມ.

ສະຫາຍ ສີເຮັງ ຫອມສົມບັດ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດ ເຂດ 14 ປະທານສະພາປະຊາຊົນແຂວງ ໄດ້ສະແດງ ຄວາມຕ້ອນຢ່າງອົບອຸ່ນ ແລະ ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຂອງຄະນະຜູ້ແທນສະພາປະຊາຊົນແຂວງເທື່ອທຽນເຫວ້ໃນຄັ້ງນີ້ ຊຶ່ງມີຄວາມໝາຍສໍາຄັນ ແລະເລິກເຊິ່ງ, ສະແດງເຖິງການຮັດແໜ້ນຄວາມສາມັກຄີ, ການພົບປະລະຫວ່າງສະພາປະຊາຊົນແຂວງສາລະວັນ ກັບ ສະພາປະຊາຊົນແຂວງເທື່ອທຽນເຫວ້ ສສ ຫວຽດນາມ ຄັ້ງນີ້ແມ່ນເປັນປີທຳອິດທີ່ໄດ້ມີການແລກປ່ຽນບົດຮຽນຮ່ວມກັນ.

ພ້ອມນັ້ນ ສະຫາຍ ນາງ ສູນໄຖ ໄຊຍະແສງ ກຳມະການພັກແຂວງ, ຮອງປະທານສະພາປະຊາຊົນແຂວງສາລະວັນ ໄດ້ລາຍງານສະພາບ ລວມຂອງແຂວງສາລະວັນໂດຍຫຍໍ້ ແລະ ລາຍງານວຽກງານໃນແຕ່ລະດ້ານຂອງສະພາປະຊາຊົນ ແຂວງ ໃຫ້ສະພາປະຊາຊົນ ແຂວງເທື່ອທຽນເຫວ້ຮັບຊາບ; ຈາກນັ້ນສະຫາຍ ນາງ ຫງວຽນທິອ໊າຍເວິນ ກຳມະການພັກແຂວງ,ຮອງປະທານສະພາປະຊາຊົນແຂວງເທື່ອທຽນເຫວ້ ສສຫວຽດນາມ ໄດ້ສະແດງຄວາມຂອບໃຈຕໍ່ການ ຕ້ອນຮັບອັນອົບອຸ່ນ ແລະ ອໍານວຍຄວາມສະດວກດ້ານຕ່າງໆ ຕໍ່ການມາຢ້ຽມຢາມ ແລະ ແລກປ່ຽນບົດ ຮຽນຊຶ່ງກັນ ແລະ ກັນ ໃນຂົງເຂດສະພາປະຊາຊົນແຂວງ ໄດ້ລາຍງານສະພາບລວມຂອງແຂວງເທື່ອທຽນເຫວ້ໂດຍຫຍໍ້ ແລະ ລາຍງານການເຄື່ອນໄຫວວຽກງານຂອງສະພາປະຊາຊົນແຂວງເທື່ອທຽນເຫວ້ ໃຫ້ສະພາປະຊາຊົນແຂວງສາລະວັນຮັບຊາບ.