ເພື່ອເປັນການລະດົມຄໍາຄິດເຫັນທີ່ເປັນປະໂຫຍດ ຂອງສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 8 ແຂວງຫົວພັນ (ສສຊ) ແລະ ສະມາຊິກສະພາປະຊາຊົນຂັ້ນແຂວງ (ສສຂ) ແລະ ພາກສ່ວນກ່ຽວຂ້ອງ ໃນການທາບທາມຄຳເຫັນໃສ່ຮ່າງກົດໝາຍ 5 ສະບັບ ໃຫ້ມີເນື້ອໃນຄົບຖ້ວນ, ຮັດກຸມ ແລະ ແທດເໝາະກັບສະພາບຄວາມເປັນຈິງໃນສັງຄົມ ກ່ອນທີ່ຈະນໍາໄປພິຈາລະນາ, ຮັບຮອງເອົາຢູ່ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ (ສພຊ) ຊຸດທີ IX; ທີ່ຈະໄຂຂື້ນໃນມໍ່ໆນີ້.

                ໃນວັນທີ 2 ພຶດສະພາ 2024 ນີ້, ທີ່ຫ້ອງປະຊຸມ ສະພາປະຊາຊົນແຂວງ (ສພຂ) ຫົວພັນ ໄດ້ຈັດກອງປະຊຸມທາບທາມຮ່າງກົດໝາຍ 5 ສະບັບ ທີ່ຕິດພັນກັບ 4 ພາກສ່ວນຄື: ພະແນກສາທາລະນະສຸກແຂວງ, ພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ, ພະແນກກະສິກຳ ແລະ ປ່າໄມ້ແຂວງ ແລະ ອົງການກວດກາແຫ່ງລັດແຂວງ ໂດຍການເປັນປະທານ ຂອງທ່ານ ຄອນປະພັນ ເລືອງສີຈັນທອງ ຮອງປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 8 , ຮອງປະທານສະພາປະຊາຊົນ ແຂວງຫົວພັນ; ເຂົ້າຮ່ວມມີບັນດາທ່ານ ສສຊ ປະຈໍາເຂດເລືອກຕັ້ງທີ 8, ສສຂ ແລະ ຫົວໜ້າ-ຮອງຫົວໜ້າພະແນກການ, ອົງການທຽບເທົ່າຂັ້ນແຂວງ, ອົງການຈັດຕັ້ງມະຫາຊົນ, ອົງການໄອຍະການ, ສານປະຊາຊົນ ແລະ ກອງບັນຊາການທະຫານ, ກອງບັນຊາການປ້ອງກັນຄວາມສະຫງົບ.

           ຈຸດປະສົງຂອງການທາບທາມຄັ້ງນີ້, ເພື່ອໃຫ້ສອດຄ່ອງກັບກົດໝາຍວ່າດ້ວຍການສ້າງນິຕິກຳ ແລະ ເປັນການຍາດແຍ່ງເອົາຄຳຄິດຄຳເຫັນ ຂອງເປົ້າໝາຍຕ່າງໆໃນສັງຄົມເພື່ອນຳໄປຄົ້ນຄວ້າປັບປຸງກົດໝາຍ ເຮັດໃຫ້ກາຍເປັນກົດໝາຍ ຂອງປະຊາຊົນ, ມາຈາກປະຊາຊົນ ແລະ ຮັບໃຊ້ປະຊາຊົນຢ່າງແທ້ຈິງ. ໃນກອງປະຊຸມໄດ້ຮັບຟັງການສະເໜີ ເຫດຜົນ ແລະ ຄວາມຈຳເປັນໃນການ ສ້າງ ແລະ ປັບປຸງ ຮ່າງກົດໝາຍວ່າດ້ວຍ ສະຫະກອນ (ສະບັບສ້າງໃໝ່); ກົດໝາຍວ່າດ້ວຍຊັບພະຍາກອນທີ່ເປັນຢາ (ສະບັບສ້າງໃໝ່); ກົດໝາຍວ່າດ້ວຍການຕ້ານສໍ້ລາດບັງຫລວງ( ສະບັບປັບປຸງ ); ກົດໝາຍວ່າດ້ວຍການປົກປັກຮັກສາສິ່ງແວດລ້ອມ ( ສະບັບປັບປຸງ ) ແລະ ກົດໝາຍວ່າດ້ວຍການກັນ ແລະ ຄວບຄຸມເຊື້ອເຮສໄອວີ/ພະຍາດເອດ ( ສະບັບປັບປຸງ ).ຈາກນັ້ນ, ບັນດາຜູ້ເຂົ້າຮ່ວມ ໄດ້ສຸມສະຕິປັນຍາ ເພື່ອຄົ້ນຄວ້າປະກອບຄຳເຫັນ ຢ່າງກົງໄປກົງມາ ຕໍ່ແຕ່ລະເນື້ອໃນ, ມາດຕາ ຂອງ 5 ກົດໝາຍ ດັ່ງກ່າວ ຢ່າງມີຈຸດສຸມ ເຊິ່ງຈະເປັນຂໍ້ມູນສຳຄັນໃຫ້ແກ່ຄະນະຮັບຜິດຊອບ ນຳໄປຄົ້ນຄວ້າ, ວິເຄາະວິໄຈ ປັບປຸງກົດໝາຍແຕ່ລະສະບັບ ເພື່ອເຮັດໃຫ້ກົດໝາຍມີເນື້ອໃນຄົບຖ້ວນ, ຮັດກຸມ ແລະ ສາມາດຈັດຕັ້ງປະຕິບັດໄດ້ດ້ວຍຄຸນນະພາບສູງ.

ກອງປະຊຸມຄັ້ງນີ້, ຈະໄດ້ດຳເນີນໄປຈົນເຖິງວັນທີ 3 ພຶດສະພາ ຈຶ່ງຈະສຳເລັດ.

ພາບ ແລະ ຂ່າວ : ນາງ ປຸ້ຍນິຕາ ເພັງມີໄຊ.