ສະພາປະຊາຊົນ ແຂວງຫລວງພະບາງ ເປີດກອງປະຊຸມສະໄໝວິສາມັນ ເທື່ອທີ 1 ຂອງສະພາປະຊາຊົນແຂວງ ຊຸດທີ II ຂຶ້ນໃນວັນທີ 23 ພຶດສະພາ 2024 ທີ່ສະພາປະຊາຊົນແຂວງ ເພື່ອພິຈາລະນາຮັບຮອງເອົາ 2 ຮ່າງຂໍ້ຕົກລົງຂອງເຈົ້າແຂວງ ກ່ຽວກັບໂຄງການພັດທະນາ ເຂດເສດຖະກິດໃໝ່ ໂດຍການເປັນປະທານຂອງ ທ່ານ ວົງສະຫວັນ ເທບພະຈັນ ປະທານ ສະພາປະຊາຊົນແຂວງ, ມີຄະນະປະຈໍາສະພາແຂວງ, ຮອງເຈົ້າແຂວງ, ບັນດາສະມາຊິກສະພາປະຊາຊົນແຂວງ ແລະ ຕາງໜ້າອົງການປົກຄອງບ້ານຂອງສອງເມືອງເປົ້າໝາຍເຂົ້າຮ່ວມ.
ກອງປະຊຸມຄັ້ງນີ້ ໄດ້ຮັບຟັງການສະເໜີຮ່າງຂໍ້ຕົກລົງ ຂອງເຈົ້າແຂວງຫລວງພະບາງ ວ່າດ້ວຍການກໍານົດສິດ ແລະ ນະໂຍບາຍ ຕໍ່ຜູ້ທີ່ໄດ້ຮັບຜົນກະທົບ ຈາກໂຄງການພັດທະນາ ເຂດເສດຖະກິດໃໝ່ ນິເວດວິທະ ຍາ, ກະສິກໍາ ແລະ ການທ່ອງທ່ຽວ ແບບຍືນຍົງ ຄົບວົງຈອນຢູ່ ນະຄອນ-ຫລວງພະບາງ ແລະ ເມືອງ ຊຽງເງິນ ແລະ ຂໍ້ຕົກລົງ ວ່າດ້ວຍການກໍານົດລາຄາຫົວໜ່ວຍຊົດເຊີຍ ຜົນກະທົບຈາກໂຄງການພັດທະນາ ເຂດເສດຖະກິດໃໝ່ ນິເວດວິທະຍາ, ກະສິກໍາ ແລະ ການທ່ອງທ່ຽວ ແບບຍືນຍົງ ຄົບວົງຈອນຢູ່ ນະຄອນ-ຫລວງພະບາງ ແລະ ເມືອງ ຊຽງເງິນ. ພ້ອມນີ້, ບັນດາຜູ້ເຂົ້າຮ່ວມ ກໍໄດ້ສຸມໃສ່ ປະກອບຄຳຄິດເຫັນຢ່າງກົງໄປກົງມາ ແລະ ການຊີ້ແຈງຢ່າງມີຫລັກການ ຕາມພາລະບົດບາດ, ສິດ ແລະ ໜ້າທີ່ ຂອງແຕ່ລະພາກສ່ວນ ຕໍ່ທັງສອງຮ່າງຂໍ້ຕົກລົງດັ່ງກ່າວ ດ້ວຍຄວາມເປັນເອກະພາບສູງ. ພ້ອມດຽວກັນນີ້, ຍັງໄດ້ຮັບຟັງການຊີ້ແຈງຂໍ້ຂ້ອງໃຈຕ່າງໆເພີ່ມຕື່ມ ບາງຈຸດທີ່ຍັງເຫັນວ່າບໍ່ທັນຈະແຈ້ງ ຈາກພະແນກຊັບພະຍາກອນທໍາມະຊາດ ແລະສິ່ງແວດລ້ອມແຂວງ ເພື່ອໃຫ້ເຂົ້າໃຈແຈ້ງ ຕໍ່ບັນຫາດັ່ງກ່າວ ທີ່ຈະພ້ອມກັນພິຈາລະນາ ແລະ ຮັບຮອງເອົາ 2 ຮ່າງຂໍ້ຕົກລົງດັ່ງກ່າວ, ເຊິ່ງ 2 ຮ່າງຂໍ້ຕົກລົງ ຂອງເຈົ້າແຂວງ ຕໍ່ກັບໂຄງການດັ່ງກ່າວນີ້ ໄດ້ຜ່ານການຄົ້ນຄວ້າ, ພິຈາລະນາ ຈາກສະພາປະຊາຊົນ ແຂວງຫລວງພະບາງ ໂດຍຜ່ານຂັ້ນຕອນການກະກຽມ ຖືກຕ້ອງຕາມກົດໝາຍ ວ່າດ້ວຍ ການສ້າງນິຕິກໍາ ແລະ ກົດໝາຍ ວ່າດ້ວຍການຈັດສັນ ພູມລໍາເນົາ. ຜ່ານການຄົ້ນຄວ້າ ພິຈາລະນາ ຂອງສະມາຊິກສະພາປະຊາຊົນ ແຂວງ ເຫັນວ່າຄະແນນສຽງສ່ວນຫລາຍ ແມ່ນເຫັນດີຮັບຮອງເອົາ.
ສໍາລັບໂຄງການພັດທະນາ ເຂດເສດຖະກິດໃໝ່ ນິເວດວິທະຍາ, ກະສິກໍາ ແລະ ການທ່ອງທ່ຽວ ແບບຍືນຍົງ ຄົບວົງຈອນ ມີເນື້ອທີ່ 7.693 ເຮັກຕາ ກວມເອົາພື້ນທີ່ ຂອງບ້ານກອກຫວານ, ນາດອນຄູນ, ນາຕານ, ພິກໃຫຍ່, ແດນສະຫວ່າງ, ໂພນສະອາດ ແລະ ບ້ານຊຽງລ້ອມ ນະຄອນ-ຫລວງພະບາງ ແລະ ບ້ານແອນສະຫວັນ, ສວນດາລາ ແລະ ບ້ານຫ້ວຍຝາຍ ເມືອງ ຊຽງເງິນ. ໂຄງການດັ່ງກ່າວ ຈະໄດ້ພັດທະນາ ແຫລ່ງທ່ອງທ່ຽວທີ່ມີມາດຕະຖານດີຂຶ້ນ ແລະ ຈະເປັນຈຸດໜຶ່ງທີ່ດຶງດູດນັກທ່ອງທ່ຽວ ແລະ ນັກລົງທຶນທັງພາຍໃນ ແລະ ຕ່າງປະເທດເຂົ້າມາແຂວງຫລວງພະບາງ ຫລາຍຂຶ້ນ. ນອກນີ້, ຍັງຈະເປັນການຊຸກຍູ້ ດ້ານກະສິກໍາ ແລະ ການຜະລິດເປັນສິນຄ້າ ລວມທັງການບໍລິການຕ່າງໆ ໃຫ້ເປັນລະບົບທີ່ດີຂຶ້ນ.
ໂອກາດນີ້, ທ່ານ ວົງສະຫວັນ ເທບພະຈັນ ໄດ້ຮຽກຮ້ອງ ຕໍ່ອົງການປົກຄອງແຂວງ, ນະຄອນ, ເມືອງ, ບ້ານ ພ້ອມດ້ວຍປະຊາຊົນບັນດາເຜົ່າ ແລະບໍລິສັດທີ່ກ່ຽວຂ້ອງ ພ້ອມກັນຈັດຕັ້ງປະຕິບັດໃຫ້ປະກົດຜົນເປັນຈິງຕາມພາລະບົດບາດ, ສິດ, ໜ້າທີ່ ແລະ ຄວາມຮັບຜິດຊອບຂອງຕົນ ເພື່ອນຳເອົາຜົນປະໂຫຍດມາສູ່ປະຊາຊົນ, ເອົາໃຈໃສ່ ພັດທະນາຂອບເຂດສໍາປະທານ ແລະ ເຂດອື່ນໆ ທີ່ກ່ຽວຂ້ອງ ໃຫ້ນັບມື້ນັບມີຄວາມຈະເລີນເຂັ້ມແຂງ ເພື່ອພ້ອມກັນເຮັດໃຫ້ຊີວິດການເປັນຢູ່ ຂອງປະຊາຊົນນັບມື້ນັບດີຂຶ້ນເປັນກ້າວໆ, ພ້ອມທັງເນັ້ນຕໍ່ບັນດາສະມາຊິກສະພາແຫ່ງຊາດ ປະຈຳເຂດເລືອກຕັ້ງ ທີ 6 ແລະສະມາຊິກສະພາປະຊາຊົນແຂວງ ໃນການຕິດຕາມກວດກາ ການຈັດຕັ້ງປະຕິບັດມະຕິດັ່ງກ່າວ ຖ້າຫາກເຫັນວ່າ ມີການລະເມີດຂໍ້ກໍານົດ ຫລື ກົດໝາຍໃດໜຶ່ງທີ່ກ່ຽວຂ້ອງ ກໍໃຫ້ກວດກາຄືນຢ່າງລະອຽດ ເພື່ອພ້ອມກັນແກ້ໄຂໃຫ້ທ່ວງທັນກັບສະພາບການ, ຖືກຕ້ອງຕາມກົດໝາຍ ແລະ ສອດຄ່ອງກັບສະພາບຂອງເສດຖະກິດ-ສັງຄົມໃນປັດຈຸບັນ.
ຂ່າວ: ວິລິຍະ ວັນນະສີ