ໃນວັນທີ 02 ພຶດສະພາ 2023 ສະພາປະຊາຊົນແຂວງວຽງຈັນ ໄດ້ເປີດກອງປະຊຸມທາບທານຄໍາເຫັນ ໃສ່ຮ່າງກົດໝາຍ 11 ສະບັບ ທີ່ຈະນໍາເຂົ້າພິຈາລະນາຮັບຮອງໃນກອງປະຊຸມສະໄໜສາມັນເທື່ອທີ 5 ຂອງສະພາແຫ່ງຊາດ ຊຸດທີ IX, ໂດຍພາຍໃຕ້ການເປັນປະທານຂອງ ທ່ານ ບຸນສອນ ເພັດລາວັນ ຮອງເລຂາພັກແຂວງ, ປະທານສະພາປະຊາຊົນ ແຂວງວຽງຈັນ ເຂົ້າຮວ່ມມີ ຮອງປະທານສະພາປະຊາຊົນແຂວງ, ຄະນະກໍາມະການ, ສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ ແລະ ບັນດາພະແນກການຂອງແຂວງ, ຕະຫຼອດຮອດວິຊາການກ່ຽວຂ້ອງພາຍໃນສະພາປະຊາຊົນຮ່ວມຢ່າງພ້ອມພຽງ.

ວະລະດໍາເນີນກອງປະຊຸມ ປະທານໄດ້ມີຄໍາເຫັນກ່າວເປີດກອງປະຊຸມວ່າ: ໂດຍປະຕິບັດຕາມແຈ້ງການຂອງຄະນະເລຂາທິການ ສະພາແຫ່ງຊາດ ສະບັບເລກທີ 160 / ຄລສ.ກກໝ, ລົງວັນທີ 25 ເມສາ 2023 ວ່າດ້ວຍການທາບທາມຄໍາເຫັນໃສ່ຮ່າງກົດໝາຍ 11 ສະບັບ ທີ່ຈະນໍາເຂົ້າພິຈາລະນາຮັບຮອງໃນກອງປະຊຸມສະໄໜສາມັນເທື່ອທີ 5 ຂອງສະພາແຫ່ງຊາດ ຊຸດທີ IX; ດັ່ງນັ້ນ ສະພາປະຊາຊົນແຂວງວຽງຈັນ ຈຶ່ງໄດ້ເປີດກອງປະຊຸມທາບທາມຄໍາເຫັນໃສ່ຮ່າງກົດໝາຍ 11 ສະບັບ ເພື່ອໃຫ້ບັນດາທ່ານ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ, ພະແນກການ,ອົງການ, ຈົ່ງໄດ້ສຸມສະຕິປັນຍາ, ເຫື່ອແຮງ ໃນການຄົ້ນຄວ້າ, ປະກອບຄໍາເຫັນ ຕໍ່ທຸກບັນຫາຢ່າງຖິ່ຖວ້ນ,ພາວະວິໄສ ແລະ ເລິກເຊິ່ງ ບົນພື້ນຖານແນວທາງນະໂຍບາຍຂອງພັກ, ກົດໝາຍຂອງລັດ, ຖືກກັບສະພາບຄວາມເປັນຈິ່ງໃນປະຈຸບັນ ແລະ ສາມາດນໍາໄປຈັດຕັ້ງປະຕິບັດໃຫ້ເປັນຮູບປະທໍາ.

ເນື້ອໃນກອງປະຊຸມທາບທາມປະກອບມີ ຮ່າງກົດໝາຍສ້າງໃໜ່ ຈໍານວນ 5 ສະບັບ,ຮ່າງກົດໝາຍສະບັບປັບປຸງ ຈໍານວນ 6 ສະບັບ ຄື:

1. ຮ່າງກົດໝາຍວ່າດ້ວຍ ການຊົດເຊີຍຄ່າເສຍຫາຍຈາກລັດ (ສ້າງໃໜ່)
2. ຮ່າງກົດໝາຍວ່າດ້ວຍ ການປົກຄອງ (ສ້າງໃໜ່)
3. ຮ່າງກົດໝາຍວ່າດ້ວຍ ການຈັດຫາງານ (ສ້າງໃໜ່)
4. ຮ່າງກົດໝາຍວ່າດ້ວຍ ອາກອນທີ່ດິນ (ສ້າງໃໜ່)
5. ຮ່າງກົດໝາຍວ່າດ້ວຍ ສາທາລະນະສຸກ (ສ້າງໃໜ່)
6. ຮ່າງກົດໝາຍວ່າດ້ວຍ ການຈັດພິມຈໍາໝ່າຍ (ປັບປຸງ)
7. ຮ່າງກົດໝາຍວ່າດ້ວຍ ສັດນໍ້າ ແລະ ການປະມົງ (ປັບປຸງ)
8. ຮ່າງກົດໝາຍວ່າດ້ວຍ ສັດປ່າ (ປັບປຸງ)
9. ຮ່າງກົດໝາຍວ່າດ້ວຍ ການປົກປ້ອງສິດ ແລະ ຜົນປະໂຫຍດຂອງເດັກ (ປັບປຸງ)
10. ຮ່າງກົດໝາຍວ່າດ້ວຍ ທະນາຄານທຸລະກິດ (ປັບປຸງ)
11. ຮ່າງກົດໝາຍວ່າດ້ວຍ ສານທະຫານ (ປັບປຸງ)

ກອງປະຊຸມທາບທາມຮ່າງກົດໝາຍ ຈໍານວນ 11 ສະບັບນີ້ ຈະດໍາເນີນເປັນເວລາ 04 ວັນ ຄື: ວັນທີ 02 ຫາ ວັນທີ 05 ພຶດສະພາ 2023 ຈຶ່ງຈະສໍາເລັດ ໃນພິທີດັ່ງກ່າວບັນດາຜູ້ເຂົ້າຮ່ວມຍັງໄດ້ພ້ອມກັນປະກອບຄໍາຄິດ-ຄໍາເຫັນໃສ່ບັນດາຮ່າງກົດໝາຍຈໍານວນດັ່ງກ່າວຢ່າງມີວິທະຍາສາດເພື່ອໃຫ້ເນື້ອໃນຄົບຖ້ວນສົມບູນ ແລະ ມີໝາກຜົນ

(ພາບ-ຂ່າວ ໂດຍ: ນາງ ບູລາຕີ ແສນທະວົງ, ທ້າວ ຄໍາພັນ ໄຊຍະປະທຸມ)