(ສປນວ) ວັນທີ 19 ກັນຍາ 2024, ທີ່ຫ້ອງວ່າການປົກຄອງ ນະຄອນຫຼວງວຽງຈັນ ທ່ານ ນາງ ລໍາພອຍ ສີອັກຄະຈັນ ກຳມະການປະຈຳພັກ ນະຄອນຫຼວງ, ຮອງປະທານ ສະພາປະຊາຊົນ ນະຄອນຫຼວງວຽງຈັນ ໄດ້ຕ້ອນຮັບຄະນະຜູ້ແທນ ສະພາປະຊາຊົນ ນະຄອນໂຮ່ຈິມິນ, ສສ. ຫວຽດນາມ ນຳໂດຍ ທ່ານຟາມ ທັ່ນ ກ່ຽນ ຄະນະປະຈຳພັກ, ຮອງປະທານ ສະພາປະຊາຊົນ ນະຄອນໂຮ່ຈິມິນ ພ້ອມດ້ວຍຄະນະ ທີ່ໄດ້ເດີນທາງມາຢ້ຽມຢາມ ແລະ ເຮັດວຽກ ກັບສະພາປະຊາຊົນ ນະຄອນຫຼວງວຽງຈັນ ເຂົ້າຮ່ວມຕ້ອນຮັບມີ ບັນດາທ່ານຄະນະປະຈຳ ສະພາປະຊາຊົນ ນະຄອນຫຼວງ, ບັນດາທ່ານປະທານ-ຮອງປະທານ ຄະນະກຳມະການ, ຄະນະເລຂາທິການ ສະພາປະຊາຊົນ, ພະແນກການຕ່າງປະເທດ ນະຄອນ ຫຼວງ ພ້ອມດ້ວຍວິຊາການກ່ຽວຂ້ອງຈຳນວນໜຶ່ງ.
ທ່ານ ນາງ ລຳພອຍ ສີອັກຄະຈັນ ໄດ້ສະເແດງຄວາມຍິນດີຕ້ອນຮັບ ພ້ອມທັງຕີລາຄາສູງຕໍ່ການເດີນທາງມາຢ້ຽມ ຢາມຄັ້ງນີ້ ເນື່ອງໃນໂອກາດທີ່ ທ່ານຟາມ ທັ່ນ ກ່ຽນ ພ້ອມດ້ວຍຄະນະ ໄດ້ເດີນທາງມາເຂົ້າຮ່ວມກອງປະຊຸມເວທີເຈົ້າຄອງ ນະຄອນອາຊຽນ ປີ 2024 ຢູ່ນະຄອນຫຼວງວຽງຈັນ ໃນລະຫວ່າງວັນທີ 17-20 ກັນຍາ 2024 ນີ້, ເຊິ່ງໄດ້ຖືໂອກາດນີ້ເພື່ອພົບປະ ແລະ ເຮັດວຽກຮ່ວມກັນ, ໂດຍຄະນະຜູ້ແທນທັງສອງຝ່າຍກໍ່ໄດ້ມີການຢື້ຢາມຖາມຂ່າວ ແລະ ແລກປ່ຽນຂໍ້ມູນນຳກັນ. ພ້ອມດຽວກັນນີ້, ທ່ານ ນາງ ລຳພອຍ ສີອັກຄະຈັນ ກໍ່ໄດ້ສະເໜີໃຫ້ທັງສອງສະພາ ເພີ່ມທະວີສາຍພົວພັນຮ່ວມມືກັນໃນຕໍ່ໜ້າ ກໍ່ຄືການຮ່ວມມືກັນສືບຕໍ່ຈັດຕັ້ງຜັນຂະຫຍາຍ ບົດບັນທຶກການຮ່ວມມື MOC ລະຫວ່າງ ສະພາປະຊາຊົນ ນະຄອນຫຼວງວຽງຈັນ ແລະ ສະພາປະຊາຊົນ ນະຄອນໂຮ່ຈິມິນ ໃນໄລຍະປີ 2024-2026 ທີ່ໄດ້ສຳເລັດການລົງນາມຮ່ວມກັນ ໃນເດືອນເມສາ 2024 ທີ່ຜ່ານມາ ໃຫ້ປະກົດຜົນເປັນຈິງ, ເພື່ອສືບຕໍ່ສ້າງສາຍພົວພັນຮ່ວມມືື ພາຍໃຕ້ການຊີ້ນຳ-ນຳພາຂອງສອງພັກ-ສອງລັດ, ໃຕ້ການຊີ້ນຳ-ນຳພາຂອງອົງຄະນະພັກ ນະຄອນໂຮ່ຈິມິນ ແລະ ອົງຄະນະພັກ ນະ ຄອນຫຼວງວຽງຈັນ ເພື່ອເຮັດໃຫ້ວຽກງານຂອງສອງສະພາປະຊາຊົນ ໃນຖານະທີ່ເປັນອົງການນິຕິບັນຍັດຂັ້ນທ້ອງຖິ່ນ ໃຫ້ ແໜ້ນແຟ້ນຍິ່ງຂຶ້ນ ແລະ ລົງເລິກຂື້ນຫຼາຍກວ່າເກົ່າ.
ທ່ານຟາມ ທັ່ນ ກ່ຽນ ຄະນະປະຈຳພັກ, ຮອງປະທານ ສະພາປະຊາຊົນ ນະຄອນໂຮ່ຈິມິນ, ສສ. ຫວຽດນາມ ໄດ້ສະແດງຄວາມຂອບໃຈ ຕໍ່ທ່ານ ນາງ ລຳພອຍ ສີອັກຄະຈັນ ພ້ອມດ້ວຍຄະນະ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ເຫັນດີເປັນເອກະພາບລົງເລິກການຈັດຕັ້ງປະຕິບັດ ບົດບັນທຶກການຮ່ວມມື MOC ທີ່ໄດ້ລົງນາມຮ່ວມກັນຜ່ານມາ, ເຊິ່ງທ່ານຍັງສະເໜີທິດທາງຮ່ວມມືໃນຕໍ່ໜ້າ ຂອງສອງສະພາປະຊົນ ຈະບໍ່ພຽງແຕ່ແລກປ່ຽນຄະນະຜູ້ແທນຮ່ວມກັນ ແຕ່ບັນ ດາຄະນະກຳມະການ, ຄະນະເລຂາທິການ ຂອງສອງສະພາປະຊາຊົນ ຈະໄດ້ລົງເລິກພົວພັນໃນຂົງເຂດວຽກງານຂອງຕົນ ໃຫ້ສະໜິດແໜ້ນຫຼາຍຂື້ນ ໂດຍສະເພາະ, ການແລກປ່ຽນບົດຮຽນທີ່ກ່ຽວຂ້ອງນຳກັນ ເປັນຕົ້ນ: ຍົກສູງບົດຮຽນການຕິດຕາມກວດກາ, ບົດຮຽນການອອກນິຕິກຳຕ່າງໆ ຮັບໃຊ້ໃຫ້ແກ່ຂົງເຂດວຽກງານຂອງສະພາປະຊາຊົນ.