ໃນວັນທີ 21 ສິງຫາ 2024 ທີ່ຫ້ອງວ່າການປົກຄອງ ນະຄອນຫຼວງວຽງຈັນ ສະຫາຍ ອານຸພາບ ຕຸນາລົມ, ຄະນະເລຂາທິການສູນກາງພັກ, ເລຂາຄະນະພັກ ນວ, ປະທານສະພາປະຊາຊົນ ນວ ໄດ້ຕ້ອນຮັບການເຂົ້າຢ້ຽມຄໍານັບຂອງ ສະຫາຍ ຫງວຽນນາມດິງ, ກໍາມະການປະຈໍາພັກ, ຮອງປະທານ ສະພາປະຊາຊົນ ແຂວງແງະອ່ານ, ສສ ຫວຽດນາມ ພ້ອມດ້ວຍຄະນະ ເນື່ອງໃນໂອກາດທີ່ເດີນທາງມາເຄື່ອນໄຫວ ແລະ ເຮັດວຽກຢູ່ ນວ.

ໃນໂອກາດດັ່ງກ່າວ ສະຫາຍ ອານຸພາບ ຕຸນາລົມ ໄດ້ສະແດງຄວາມຕ້ອນຮັບຢ່າງອົບອຸ່ນຖານເພື່ອນມິດສະຫາຍອ້າຍນ້ອງມິດຕະພາບອັນດີ ດ້ວຍໄມຕີຈິດມິດຕະພາບທີ່ພິເສດ ທັງໄດ້ກ່າວຍ້ອງຍໍຊົມເຊີຍຕໍ່ການເດີນທາງມາຢ້ຽມຢາມ ແລະ ເຮັດວຽກຂອງຄະນະຮ່ວມກັບ ສະພາປະຊາຊົນ ນວ ໃນຄັ້ງນີ້ ເຊິ່ງເປັນການແລກປ່ຽນບົດຮຽນອັນເລິກເຊິ່ງ, ລໍ້າຄ່າ ສະແດງໃຫ້ເຫັນ ເຖີງການຜັນຂະຫຍາຍ, ການຮ່ວມມືອັນແໜ້ນແຟ້ນທີ່ມີມາຍາວນານໃຫ້ເກີດດອກອອກຜົນ ແລະ ມີການສືບຕໍ່ເສີມຂະຫຍາຍການຮ່ວມມືໃຫ້ກົມກຽວ ພ້ອມທັງຫວັງຢ່າງຍິ່ງວ່າ ທັງສອງສະພາຈະຮ່ວມມືກັນພັດທະນາສົ່ງເສີມວຽກງານໃນຂົງເຂດຕ່າງໆ ເປັນຕົ້ນ: ການສ້າງຄວາມເຂັ້ມແຂງໃຫ້ບຸກຄະລາກອນ ແລະ ເສດຖະກິດການຄ້າ, ການທ່ອງທ່ຽວ ພ້ອມທັງເປັນຈຸດປະສານໃຫ້ແກ່ການຮ່ວມມື ຂອງສອງອົງການປົກຄອງ ແລະ ປະຊາຊົນຂອງ ນະຄອນຫຼວງວຽງຈັນ ແລະ ແຂວງເງະອ່ານ. ພ້ອມດຽວກັນນີ້  ສະຫາຍ ຫງວຽນນາມດິງ ໄດ້ກ່າວຂອບໃຈ ຕໍ່ການຕ້ອນຮັບທີ່ອົບອຸ່ນ ພ້ອມທັງໄດ້ລາຍງານເຖີງຈຸດປະສົງໃນການມາຢ້ຽມຢາມ ແລະ ເຮັດວຽກ ເພື່ອແລກປ່ຽນບົດຮຽນຮ່ວມກັບ ສະພາປະຊາຊົນ ນວ ເຊິ່ງຈະເປັນການເສີມຂະຫຍາຍການຮ່ວມມືໃຫ້ແຕກດອກອອກຜົນ ແລະ ເປັນຮູບປະທຳ ໃນຫຼາຍດ້ານ ໂດຍສະເພາະ ເສີມຂະຫຍາຍຄວາມເຂັ້ມແຂງໃຫ້ວຽກງານສ້າງບຸກຄະລາກອນ, ພັດທະນາເສດຖະກິດການຄ້າ, ການທ່ອງທ່ຽວ ທັງເປັນຈຸດປະສານງານໃຫ້ແກ່ການຮ່ວມມືຕ່າງໆຂອງສອງນະຄອນ, ສອງແຂວງ ກໍຄື ສອງປະທານ ລາວ-ຫວຽດນາມ ໃຫ້ໝັ້ນຄົງທະນົງແກ່ນຕະຫຼອດໄປ.