ສະພາປະຊາຊົນ ນະຄອນຫຼວງວຽງຈັນ ສຳເລັດກອງປະຊຸມຝຶກອົບຮົມວຽກງານການສ້າງຄວາມເຂັ້ມແຂງໃຫ້ແກ່ພະນັກງານ-ລັດຖະກອນ ຂອງສະພາປະຊາຊົນ ນະຄອນຫຼວງວຽງຈັນ ແລະ ຄະນະຊ່ວຍວຽກຂອງຄະນະສະມາຊິກສະພາປະຊາຊົນ ນະຄອນຫຼວງວຽງຈັນ ປະຈໍາເຂດເລືອກຕັ້ງເມືອງ 9 ເມືອງ ນະຄອນຫຼວງວຽງຈັນ ໃນວັນທີ 27 ກຸມພາ 2024 ຢູ່ທີ່ສຳນັກງານອົງການປົກຄອງ ນະຄອນຫຼວງວຽງຈັນ ໂດຍການພັດປ່ຽນກັນເປັນປະທານຂອງ ທ່ານ ນາງ ລຳພອຍ ສີອັກຄະຈັນ, ຮອງປະທານ ສະພາປະຊາຊົນ ນະຄອນຫຼວງວຽງຈັນ ແລະ ທ່ານ ນະຄະເສນ ສີຫາລາດ, ເລຂາທິການສະພາປະຊາຊົນ ນະຄອນຫຼວງວຽງຈັນ, ມີບັນດາທ່ານຮອງເລຂາທິການ, ພະນັກງານພາຍໃນສະພາປະຊາຊົນ ແລະ ຄະນະຊ່ວຍວຽກຂອງຄະນະສະມາຊິກສະພາປະຊາຊົນ ນະຄອນຫຼວງວຽງຈັນ ເຂົ້າຮ່ວມ.

ກອງປະຊຸມຄັ້ງນີ້, ໃຫ້ກຽດເຂົ້າຮ່ວມເປັນວິທະຍາກອນໂດຍ ທ່ານ ປອ ນາງ ຈັນທາ ອ່ອນໄຊວຽງ, ຫົວໜ້າສະຖາບັນຄົ້ນຄວ້າວິທະຍາສາດປົກຄອງ ແລະ ຝຶກອົບຮົມ ກະຊວງພາຍໃນ ພ້ອມດ້ວຍຄະນະ ເຊິ່ງໄດ້​ເອົາ​ໃຈ​ໃສ່​ຄົ້ນຄວ້າ, ຮີບ​ໂຮມ​ເອົາ​ບົດຮຽນຕ່າງໆມາຖ່າຍທອດ ແລະ ​ນໍາ​ສະ​ເໜີ​ໃນ​ກອງ​ປະຊຸມ​ຄັ້ງ​ນີ້ ໃນ 02 ເນື້ອໃນຄື: (1) ບົດຮຽນໃນການຂີດຂຽນ, ຮ່າງເອກະສານທາງລັດຖະການ; (2) ທັກສະໃນການເວົ້າ, ການປະກອບຄໍາເຫັນໃນກອງປະຊຸມ. ການ​ດໍາ​​ເນີນ​ກອງ​ປະຊຸມ ຝຶກ​ອົບຮົມ​ການ​ສ້າງ​ຄວາມ​ເຂັ້ມ​ແຂງ ແມ່ນເພື່ອຍົກສູງການປະຕິບັດໜ້າທີ່ເປັນເສນາທິການ ໃຫ້ແກ່ການນໍາຂອງ ສະພາປະຊາຊົນ ນະຄອນຫຼວງ ແລະ ຄະນະສະມາຊິກສະພາປະ ຊາຊົນ ປະຈໍາເຂດເລືອກຕັ້ງເມືອງ ເຊິ່ງບົດຮຽນທີ່ນໍາຝຶກອົບຮົມຄັ້ງນີ້ ເປັນຄວາມຮູ້ພື້ນຖານ ໃຫ້ແກ່ບັນດາທ່ານທີ່ເຂົ້າຮ່ວມກອງປະຊຸມໃຫ້ສາມາດນໍາໄປຈັດຕັ້ງຜັນຂະຫຍາຍ ເຂົ້າໃນໜ້າທີ່ວຽກງານໃນຕໍ່ໜ້າໃຫ້ມີຄວາມເຂັ້ມແຂງ ເພື່ອເປັນສ່ວນສໍາຄັນໃນການເຊີດຊູບົດບາດຂອງສະພາປະຊາຊົນ ນະຄອນຫຼວງວຽງຈັນ ໃຫ້ນັບມື້ສູງຂື້ນ ແລະ ທັງ​ເປັນ​ພື້ນຖານ​ນໍາ​ໃຊ້​ເຂົ້າ​ໃນ​ຂອບ​ເຂດ​ວຽກງານຂອງແຕ່ລະຂະແໜງທີ່ເປັນເສນາທິການ ​ໃຫ້​ດີ​ຂື້ນ​ເປັນກ້າວໆ.