ໃນຕອນເຊົ້າຂອງວັນທີ 09 ພຶດສະພາ 2024, ກອງປະຊຸມສໍາມະນາຮ່າງຂໍ້ຕົກລົງ ຂອງອົງການປົກຄອງ ນະຄອນຫຼວງວຽງຈັນ ວ່າດ້ວຍການຮັບຮອງລາຄາຫົວໜ່ວຍທົດແທນຕໍ່ຊັບສິນທີ່ໄດ້ຮັບຜົນກະທົບຈາກໂຄງການປັບປຸງ ແລະ ສ້ອມແປງທາງຫຼວງແຫ່ງຊາດ ເລກທີ 13 ໃຕ້ (ກມ 21 ຫາ ກມ 71) ເຂດບ້ານໂຄກສີວິໄລ, ເມືອງໄຊທານີ ຫາ ບ້ານສົມສະຫວາດ, ເມືອງປາກງື່ມ ນະຄອນຫຼວງວຽງຈັນ (ກມ 21 ຫາ ກມ 66) ໄດ້ດຳເນີນຂຶ້ນຢູ່ທີ່ຫ້ອງປະຊຸມຂອງອົງການປົກຄອງ ນະຄອນຫຼວງ ໂດຍການເປັນປະທານຂອງ ທ່ານ ບຸນທາມ ພຸດທະວົງສາ ກຳມະການພັກ ນະຄອນຫຼວງ, ຮອງປະທານ ສະພາປະຊາຊົນ ນະຄອນຫຼວງວຽງຈັນ, ເຂົ້າຮ່ວມມີ ບັນດາທ່ານ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1, ສະມາຊິກ ສະພາປະຊາຊົນ ນະຄອນຫຼວງ ແລະ ບັນດາພະແນກການກ່ຽວຂ້ອງ ອ້ອມຂ້າງນະຄອນຫຼວງວຽງຈັນ.

ໃນການດຳເນີນກອງປະຊຸມສຳມະນາຄັ້ງນີ້ ມີ 02 ຈຸດປະສົງຫຼັກ ຄື: 1) ເພື່ອຮັບປະກັນໃຫ້ແກ່ການສ້າງນິຕິກຳໃຕ້ກົດໝາຍຂອງອົງການປົກຄອງ ນະຄອນຫຼວງ ໃຫ້ມີເນື້ອໃນທີ່ຄົບຖ້ວນສົມບູນ, ຮັດກຸມ, ບັນລຸຜົນສຳເລັດຕາມລະດັບຄາດໝາຍ ແລະ ສາມາດຈັດຕັ້ງປະຕິບັດໄດ້ ແລະ 2) ເພື່ອຮັບຟັງຄຳຄິດຄຳເຫັນ ຂອງສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 1 ແລະ ສະມາຊິກສະພາປະຊາຊົນ ນະຄອນຫຼວງ ຕໍ່ຮ່າງຂໍ້ຕົກລົງດັ່ງກ່າວ; ເຊິ່ງ ທ່ານ ພຸດທະເສນ ສິນທະວົງ, ຮອງຫົວໜ້າພະແນກໂຍທາທິການ ແລະ ຂົນສົ່ງ ນະຄອນຫຼວງ ໄດ້ລາຍງານໂດຍຫຍໍ້ ກ່ຽວກັບຮ່າງຂໍ້ຕົກລົງວ່າດ້ວຍການຮັບຮອງເອົາຫົວໜ່ວຍທົດແທນ ຕໍ່ຊັບສິນທີ່ໄດ້ຮັບຜົນກະທົບຈາກໂຄງການປັບປຸງ ແລະ ສ້ອມແປງທາງຫຼວງແຫ່ງຊາດ ເລກທີ 13 ໃຕ້ ໂດຍໄດ້ລາຍງານກ່ຽວກັບປະຫວັດຄວາມເປັນມາ, ການອອກແບບໂຄງການ ແລະ ຄວາມຄືບໜ້າໄລຍະກະກຽມໂຄງການ. ໃນໂອກາດດັ່ງກ່າວ, ທ່ານ ປະທານກອງປະຊຸມ ກໍໄດ້ມີຄຳເຫັນເຈາະຈີ້ມຕໍ່ຮ່າງຂໍ້ຕົກລົງ ໂດຍໄດ້ເນັ້ນກ່ຽວກັບການກຳນົດທາງດ້ານໂຄງສ້າງ ແລະ ເນື້ອໃນຂອງຮ່າງຂໍ້ຕົກລົງ, ການກຳນົດລາຄາຫົວໜ່ວຍທົດແທນທີ່ດິນ ແລະ ສິ່ງປຸກສ້າງ, ການກຳນົດຂອບເຂດຂອງການນຳໃຊ້ຂໍ້ຕົກລົງ, ການກໍານົດຫຼັກການ ແລະ ວິທີຄິດໄລ່ຫົວໜ່ວຍລາຄາ ໃຫ້ຜູ້ທີ່ຖືກຜົນກະທົບຈາກໂຄງການດັ່ງກ່າວ, ເຊິ່ງ ບັນດາທ່ານຜູ້ແທນ ກໍໄດ້ປະກອບຄຳຄິດຄຳເຫັນຕໍ່ຮ່າງຂໍ້ຕົກລົງດັ່ງກ່າວ ຢ່າງມີຈຸດສຸມ ເພື່ອໃຫ້ຄະນະຮັບຜິດຊອບໄດ້ນຳໄປຄົ້ນຄວ້າ ແລະ ປັບປຸງຄືນ ໃຫ້ມີເນື້ອໃນຄົບຖ້ວນສົມບູນດ້ານຫຼັກການ ແລະ ເນື້ອໃນ ໃຫ້ຖືກຕ້ອງສອດຄ່ອງກັບກົດໝາຍ.

(ນາງ ພອນທິບ ອິນທິລາດ)